dwicatvAriMza-dazakam -- zakaTAsuranigrahaH

kadApi janmarkSadinE tava prabhO nimantritajJAtivadhUmahIsurA|
mahAnasastvAM savidhE nidhAya sA mahAnasAdau vavRtE vrajEzvarI||1||

tatO bhavattrANaniyuktabAlakaprabhItisaGkrandanasaGkulAravaiH|
vimizramazrAvi bhavatsamIpataH parisphuTaddArucaTaccaTAravaH||2||

tatastadAkarNanasaMbhramazramaprakampivakSOjabharA vrajAGganAH|
bhavantamantardadRzuH samantatO viniSpataddAruNadArumadhyagam||3||

zizOrahO kiM kimabhUditi drutaM pradhAvya nandaH pazupAzca bhUsurAH|
bhavantamAlOkya yazOdayA dhRtaM samAzvasannazrujalArdralOcanAH||4||

kaskO nu kautaskuta ESa vismayO vizaGkaTaM yacchakaTaM vipATitam|
na kAraNaM kiJcidihEti tE sthitAH svanAsikAdattakarAstvadIkSakAH||5||

kumArakasyAsya payOdharArthinaH prarOdanE lOlapadAmbujAhatam|
mayA mayA dRSTamanO viparyagAditIza tE pAlakabAlakA jaguH||6||

bhiyA tadA kiJcidajAnatAmidaM kumArakANAmatidurghaTaM vacaH|
bhavatprabhAvAvidurairitIritaM manAgivAzaGkyata dRSTapUtanaiH||7||

pravALatAmraM kimidaM padaM kSataM sarOjaramyau nu karau virOjitau|
iti prasarpatkaruNAtaraGgitAstvadaGgamApaspRzuraGganAjanAH||8||

ayE sutaM dEhi jagatpatEH kRpAtaraGgapAtAtparipAtamadya mE|
iti sma saGgRhya pitA tvadaGgukaM muhurmuhuH zliSyati jItakaNTakaH||9||

anOnilInaH kila hantumAgataH surArirEvaM bhavatA vihiMsitaH|
rajO'pi nOdRSTamamuSya tatkathaM sa zuddhasattvE tvayi lInavAndhRvam||10||

prapUjitaistatra tatO dvijAtibhirvizESatO lambhitamaGgalAziSaH|
vrajaM nijairbAlyarasairvimOhayanmarutpurAdhIza rujAM jahIhi mE||11||