paJcapaJcAzattama-dazakam -- kAliyamardanam

atha vAriNi ghOrataraM phaNinaM prativArayituM kRtadhIrbhagavan|
drutamAritha tIraganIpataruM viSamArutazOSitaparNacayam||1||

adhiruhya padAmburuhENa ca taM navapallavatulyamOjJarucA|
hRdavAriNi dUrataraM nyapataH parighUrNitaghOrataraGgagaNE||2||

bhuvanatrayabhArabhRtO bhavatO gurubhAravikrampivijRmbhijalA|
parimajjayati sma dhanuHzatakaM taTinI jhaTiti sphuTaghOSavatI||3||

atha dikSu vidikSu parikSubhitabhramitOdaravArininAdabharaiH|
udakAdudagAduragAdhipatistvadupAntamazAntaruSAndhamanAH||4||

phaNazRGgasahasravinissRmarajvaladagnikaNOgraviSAmbudharam|
purataH phaNinaM samalOkayathA bahuzRGgiNamaJjanazailamiva||5||

jvaladakSiparikSaradugraviSazvasaniSmabharaH sa mahAbhujagaH|
paridazya bhavantamanantabalaM samavESTayadasphuTacESTamahO||6||

avilOkya bhavantamathAkulitE taTagAmini bAlakadhEnugaNE|
vrajagEhatalE'pyanimittazataM samudIkSya gatA yamunAM pazupAH||7||

akhilESu vibhO bhavadIyadazAmavalOkya jihAsuSu jIvabharam|
phaNibandhanamAzu vimucya javAdudagamyata hAsajuSA bhavatA||8||

adhiruhya tataH phaNirAjaphaNAnnanRtE bhavatA mRdupAdarucA|
kalaziJcitanUpuramaJcumilatkarakaGkaNasaGkulasaGkvaNitam||9||

jahRSuH pazupAstutuSurmunayO vavRSuH kusumAni surEndragaNAH|
tvayi nRtyati mArutagEhapatE paripAhi sa mAM tvamadAntagadAt||10||