aSTacatvAriMza-dazakam -- nalakUbaraMaNigrIvayOH zApamOkSaH

mudA suraudhaistvamudArasammadairudIrya dAmOdara ityabhiSTutaH|
mRdUdaraH svairamulUkhalE lagannadUratO dvau kakubhAvudaikSathAH||1||

kubErasUnurnaLakUbarAbhidhaH parO maNigrIva iti prathAM gataH|
mahEzasEvAdhigatazriyOnmadau ciraM kila tvadvimukhAvakhElatAm||2||

surApagAyAM kila tau madOtkaTau surApagAyadbahuyauvatAvRtau|
vivAsasau kELiparau sa nAradO bhavatpadaikapravaNO niraikSata||3||

bhiyA priyAlOkamupAttavAsasaM purO nirIkSyApi madAndhacEtasau|
imau bhavadbhaktyupazAntisiddhayE munirjagau zAntimRtE kutassukham||4||

yuvAmavAptau kakubhAtmatAM ciraM hariM nirIkSyAtha padaM svamApnutam|
itIritau tau bhavadIkSaNaspRhAM gatau vrajAntE kakubhau babhUvatuH||5||

atandramindradRyugaM tathAvidhaM samEyuSA mantharagAminA tvayA|
tirAyitOlUkhalarOdhanirdhutau cirAya jIrNau paripAtitau tarU||6||

abhAji zAkhidvitayaM yadA tvayA tadaiva tadgarbhatalAnnirEyuSA|
mahAtviSA yakSayugEna tatkSaNAdabhAji gOvinda bhavAnapi stavaiH||7||

ihAnyabhaktO'pi samESyati kramAdbhavantamEtau khalu rudrasEvakau|
muniprasAdAdbhavadaG{}ghrimAgatau gatau vRNAnau khalu bhaktimuttamAm||8||

tatastarUddAraNadAruNAravaprakampisampAtini gOpamaNDalE|
vilajjitatvajjananImukhEkSiNA vyamOkSi nandanE bhavAnvimOkSadaH||9||

mahIruhOrmadhyagatO batArbhakO harEH prabhAvAdaparikSatO'dhunA|
iti bravANairgamitO gRhaM bhavAnmarutpurAdhIzvara pAhi mAM gadAt||10||