SaDviMza-dazakam -- gajEndramOkSaH

indradyumnaH pANDyakhaNDAdhirAjastvadbhaktAtmA candanAdrau kadAcit|
tvatsEvAyAM magnadhIrAlulOkE naivAgastyaM prAptamAtithyakAmam||1||

kumbhOdbhUtissaMbhRtakrOdhabhAraH stabdhAtmA tvaM hastibhUyaM bhajEti|
zap{}tvAthainaM pratyagAtsO'pi lEbhE hastIndratvaM tvatsmRtivyaktidhanyam||2||

dugdhAmbhOdhErmadhyabhAji trikUTE krODaJchailE yUthapO'yaM vazAbhiH|
sarvAnjantUnatyavartiSTa zaktyA tvadbhaktAnAM kutra nOtkarSalAbhaH||3||

svEna sthEmnA divyadEhatvazaktyA sO'yaM khEdAnaprajAnan kadAcit|
zailaprAntE gharmatAntaH sarasyAM yUthaiH sArdhaM tvatpraNunnO'bhirEmE||4||

hUhUstAvaddEvalasyApi zApat grAhIbhUtastajjalE vartamAnaH|
jagrAhainaM hastinaM pAdadEzE zAntyarthaM hi zrAntidO'si svakAnAm||5||

tvatsEvAyA vaibhavAddurnirOdhaM yudhyantaM taM vatsarANAM sahasram|
prAptE kAlE tvatpadaikAgryasiddhyai nakrAkrAntaM hastivIraM vyadhAstvam||6||

ArtivyaktaprAktanajJAnabhaktiH zuNDOtkSiptaiH puNDarIkaissamarcan|
pUrvAbhyastaM nirvizESAtmaniSThaM stOtrazrESThaM sO'ndagAdItparAtman||7||

zrutvA stOtraM nirguNasthaM samastaM brahmEzAdyairnAhamityaprayAtE|
sarvAtmA tvaM bhUrikAruNyavEgAt tArkSyArUDhaH prEkSitO'bhUH purastAt||8||

hastIndraM taM hastapadmEna dhRtvA cakrENa tvaM nakravaryaM vyadArIH|
gandharvE'sminmuktazApE sa hastI tvatsArUpyaM prApya dEdIpyatE sma||9||

Etad{}vRttaM tvAM ca mAM ca pragE yO gAyEtsO'yaM bhUyasE zrEyasE syAt|
ityuktvainaM tEna sArdhaM gatastvaM dhiSNyaM viSNO pAhi vAtAlayEza||10||