EkacatvAriMza-dazakam -- pUtanAdEhadAhaH

vrajEzvaraH zaurivacO nizamya samAvrajannadhvani bhItacEtAH|
niSpiSTanizzESataruM nirIkSya kaJcitpadArthaM zaraNaM gatastvAm||1||

nizamya gOpIvacanAdudantaM sarvE'pi gOpA bhayavismayAndhAH|
tvatpAtitaM ghOrapizAcadEhaM dEhurvidUrE'tha kuThArakRttam||2||

tvatpItapUtastanataccharIrAtsamuccalannuccatarO hi dhUmaH|
zaGkAmadhAdAgaravaH kimESu kiM cAndanO gaulgulavO'thavEti||3||

madaGgasaGgasya phalaM na dUraE kSaNEna tAvadbhavatAmapi syAt|
ityullapanvallavatallajEbhyastvaM pUtanAmAtanuthAssugandhim||4||

citraM pizAcyA na hataH kumArazcitraM puraivAkathi zauriNEdam|
iti prazaMsankila gOpalOkO bhavanmukhAlOkarasE nyamAGkSIt||5||

dinE dinE'tha prativRddhalakSmIrakSINamaGgalyazatO vrajO'yam|
bhavannivAsAdayi vAsudEva pramOdasAndraH paritO virEjE||6||

gRhESu tE kOmalarUpahAsamithaH kathAsaGkulitAH kamanyaH|
vRttESu kRtyESu bhavannirIkSAsamAgatAH pratyahamatyanandan||7||

ahO kumArO mayi dattadRSTiH smitaH kRtaM mAM prati vatsakEna|
EhyEhi mAmityupasArya pANiM tvayIza kiM kiM na kRtaM vadhUbhiH||8||

bhavadvapuHsparzanakautukEna karAtkaraM gOpavadhUjanEna|
nItastvamAtAmrasarOjamAlAvyAlambilOlambatulAmalAsIH||9||

nipAyayantI stanamaGkagaM tvAM vilOkayantI vadanaM hasantI|
dazAM yazOdA katamAnnna bhEjE sa tAdRzaH pAhi harE gadAnmAm||10||