EkatriMza-dazakam -- balidarpOcchEdaH

prItyA daityastava tanumahaHprEkSaNItsarvathA'pi
tvAmArAdhyannajita racayannaJjaliM saJjagAda|
mattaH kiM tE samabhilaSitaM viprasUnO vada tvam
vittaM bhaktaM bhavanamavanIM vApi sarvaM pradAsyE||1||

tAmakSINAM baligiramupAkarNya kAruNyapUrNO'-
pyasyOtsEkaM zamayitumanA daityavaMzaM prazaMsan|
bhUmiM pAdatrayaparimitAM prArthayAmAsitha tvam
sarvaM dEhIti tu nigaditE kasya hAsyaM na vA syAt||2||

vizvEzaM mAM tripadamiha kiM yAcasE bAlizastvam
sarvAM bhUmiM vRNu kimamunEtyAlapattvAM sa dRpyan|
yasmAddarpAttripadaparipUrtyakSamaH kSEpavAdAn
bandhaM cAsAvagamadatadarhO'pi gADhOpazAntyai||3||

pAdatrayyA yadi na muditO viSTapairnApi tuSyE-
dityuktE'sminvarada bhavatE dAtukAmE'tha tOyam|
daityAcAryastava khalu parIkSArthinaH prEraNAttam
mA mA dEyaM harirayamiti vyaktamEvAbabhASE||4||

yAcatyEvaM yadi sa bhagavAnpUrNakAmO'smi sO'ham
dAsyAmyEva sthiramiti vadan kAvyazaptO'pi daityaH|
vindhyAvalyA nijadayitayA dattapAdyAya tubhyam
citraM citraM sakalamapi sa prArpayattOyapUrvam||5||

nissandEhaM ditikulapatau tvayyazESArpaNaM tad
vyAtanvAnE mumucurRSayaH sAmarAH puSpavarSam|
divyaM rUpaM tava ca tadidaM pazyatAM vizvabhAjA-
muccairuccairavRdhadavadhIkRtya vizvANDabhANDam||6||

tvatpAdAgraM nijapadagataM puNDarIkOdbhavO'sau
kuNDItOyairasicadapunAdyajjalaM vizvalOkAn|
harSOtkarSAt subahu khEcarairutsavE'smin
bhErIM nighnan-bhuvanamacarajjAmbavAn bhaktizAlI||7||

tAvaddaityAstvanumatimRtE bharturArabdhayuddhA
dEvOpEtairbhavadanucaraiH saGgatA bhaGgamApan|
kAlAtmAyaM vasati puratO yadvazAtprAgjitAH smaH
kiM vO yuddhairiti baligirA tE'tha pAtAlamApuH||8||

pAzairbaddhaM patagapatinA daityamuccairavAdI-
stArttIyIkaM diza mama padaM kiM na vizvEzvarO'si|
pAdaM mUrdhni praNaya bhagavannityakampaM vadantam
prahlAdastaM svayamupagatO mAnayannastavIttvAm||9||

darpOcchittyai vihitamakhilaM daitya siddhO'si puNyai-
rlOkastE'stu tridivavijayI vAsavatvaM ca pazcAt|
matsAyujyaM bhaja ca punarityanvagRhNA baliM tam
vipraissantAnitamakhavaraH pAhi vAtAlayEza||10||