prathamO'dhyAyaH

janmAdyasya yatO'nvayAditaratazcArthESvabhijJaH svarAT
tEnE brahma hRdA ya AdikavayE muhyanti yatsUrayaH|
tEjOvArimRdAM yathA vinimayO yatra trisargO'mRSA
dhAmnA svEna sadA nirastakuhakaM satyaM paraM dhImahi||1||

dharmaH prOjjhitakaitavO'tra paramO nirmatsarANAM satAM
vEdyaM vAstavamatra vastu zivadaM tApatrayOnmUlanam|
zrImadbhAgavatE mahAmunikRtE kiM vA parairIzvaraH
sadyO hRdyavarudhyatE'tra kRtibhiH zuzrUSubhistatkSaNAt||2||

nigamakalpatarOrgalitaM phalaM
zukamukhAdamRtadravasaMyutam|
pibata bhAgavataM rasamAlayaM
muhurahO rasikA bhuvi bhAvukAH||3||

naimiSE'nimiSakSEtrE IzayaH zaunakAdayaH|
satraM svargAya lOkAya sahasrasamamAsata||4||

ta EkadA tu munayaH prAtarhutahutAgnayaH|
satkRtaM sUtamAsInaM papracchuridamAdarAt||5||

tvayA khalu purANAni sEtihAsAni cAnagha|
AkhyAtAnyapyadhItAni dharmazAstrANi yAnyuta||6||

yAni vEdavidAM zrESThO bhagavAnbAdarAyaNaH|
anyE ca munayaH sUta parAvaravidO viduH||7||

vEttha tvaM saumya tatsarvaM tattvatastadanugrahAt|
brUyuH snigdhasya ziSyasya guravO guhyamapyuta||8||

tatra tatrAJjasAyuSmanbhavatA yadvinizcitam|
puMsAmEkAntataH zrEyastannaH zaMsitumarhasi||9||

prAyENAlpAyuSaH sabhya kalAvasminyugE janAH|
mandAH sumandamatayO mandabhAgyA hyupadrutAH||10||

bhUrINi bhUrikarmANi zrOtavyAni vibhAgazaH
ataH sAdhO'tra yatsAraM samuddhRtya manISayA
brUhi bhadrAya bhUtAnAM yEnAtmA suprasIdati||11||

sUta jAnAsi bhadraM tE bhagavAnsAtvatAM patiH|
dEvakyAM vasudEvasya jAtO yasya cikIrSayA||12||

tannaH zuSrUSamANAnAmarhasyaGgAnuvarNitum|
yasyAvatArO bhUtAnAM kSEmAya ca bhavAya ca||13||

ApannaH saMsRtiM ghOrAM yannAma vivazO gRNan|
tataH sadyO vimucyEta yadbibhEti svayaM bhayam||14||

yatpAdasaMzrayAH sUta munayaH prazamAyanAH|
sadyaH punantyupaspRSTAH svardhunyApO'nusEvayA||15||

kO vA bhagavatastasya puNyazlOkEDyakarmaNaH|
zuddhikAmO na zRNuyAdyazaH kalimalApaham||16||

tasya karmANyudArANi parigItAni sUribhiH|
brUhi naH zraddadhAnAnAM lIlayA dadhataH kalAH||17||

athAkhyAhi harErdhImannavatArakathAH zubhAH|
IlA vidadhataH svairamIzvarasyAtmamAyayA||18||

vayaM tu na vitRpyAma uttamazlOkavikramE|
yacchRNvatAM rasajJAnAM svAdu svAdu padE padE||19||

kRtavAnkila karmANi saha rAmENa kEzavaH|
atimartyAni bhagavAngUDhaH kapaTamAnuSaH||20||

kalimAgatamAjJAya kSEtrE'sminvaiSNavE vayam|
AsInA dIrghasatrENa kathAyAM sakSaNA harEH||21||

tvaM naH sandarzitO dhAtrA dustaraM nistitIrSatAm|
kaliM sattvaharaM puMsAM karNadhAra ivArNavam||22||

brUhi yOgEzvarE kRSNE brahmaNyE dharmavarmaNi
svAM kASThAmadhunOpEtE dharmaH kaM zaraNaM gataH||23||