From StotraSamhita
< Bhagavatam | Skandha 03
caturviMzO'dhyAyaH
maitrEya uvAca
nirvEdavAdinImEvaM manOrduhitaraM muniH| dayAluH zAlinImAha zuklAbhivyAhRtaM smaran||1|| |
RSiruvAca
mA khidO rAjaputrItthamAtmAnaM pratyaninditE| bhagavAMstE'kSarO garbhamadUrAtsamprapatsyatE||2|| |
dhRtavratAsi bhadraM tE damEna niyamEna ca| tapOdraviNadAnaizca zraddhayA cEzvaraM bhaja||3|| |
sa tvayArAdhitaH zuklO vitanvanmAmakaM yazaH| chEttA tE hRdayagranthimaudaryO brahmabhAvanaH||4|| |
maitrEya uvAca
dEvahUtyapi sandEzaM gauravENa prajApatEH| samyakSraddhAya puruSaM kUTasthamabhajadgurum||5|| |
tasyAM bahutithE kAlE bhagavAnmadhusUdanaH| kArdamaM vIryamApannO jajJE'gniriva dAruNi||6|| |
avAdayaMstadA vyOmni vAditrANi ghanAghanAH| gAyanti taM sma gandharvA nRtyantyapsarasO mudA||7|| |
pEtuH sumanasO divyAH khEcarairapavarjitAH| prasEduzca dizaH sarvA ambhAMsi ca manAMsi ca||8|| |
tatkardamAzramapadaM sarasvatyA parizritam| svayambhUH sAkamRSibhirmarIcyAdibhirabhyayAt||9|| |
bhagavantaM paraM brahma sattvEnAMzEna zatruhan| tattvasaGkhyAnavijJaptyai jAtaM vidvAnajaH svarAT||10|| |
sabhAjayanvizuddhEna cEtasA taccikIrSitam| prahRSyamANairasubhiH kardamaM cEdamabhyadhAt||11|| |
brahmOvAca
tvayA mE'pacitistAta kalpitA nirvyalIkataH| yanmE saJjagRhE vAkyaM bhavAnmAnada mAnayan||12|| |
EtAvatyEva zuzrUSA kAryA pitari putrakaiH| bADhamityanumanyEta gauravENa gurOrvacaH||13|| |
imA duhitaraH satyastava vatsa sumadhyamAH| sargamEtaM prabhAvaiH svairbRMhayiSyantyanEkadhA||14|| |
atastvamRSimukhyEbhyO yathAzIlaM yathAruci| AtmajAH paridEhyadya vistRNIhi yazO bhuvi||15|| |
vEdAhamAdyaM puruSamavatIrNaM svamAyayA| bhUtAnAM zEvadhiM dEhaM bibhrANaM kapilaM munE||16|| |
jJAnavijJAnayOgEna karmaNAmuddharanjaTAH| hiraNyakEzaH padmAkSaH padmamudrApadAmbujaH||17|| |
ESa mAnavi tE garbhaM praviSTaH kaiTabhArdanaH| avidyAsaMzayagranthiM chittvA gAM vicariSyati||18|| |
ayaM siddhagaNAdhIzaH sAGkhyAcAryaiH susammataH| lOkE kapila ityAkhyAM gantA tE kIrtivardhanaH||19|| |
maitrEya uvAca
tAvAzvAsya jagatsraSTA kumAraiH sahanAradaH| haMsO haMsEna yAnEna tridhAmaparamaM yayau||20|| |
gatE zatadhRtau kSattaH kardamastEna cOditaH| yathOditaM svaduhitH prAdAdvizvasRjAM tataH||21|| |
marIcayE kalAM prAdAdanasUyAmathAtrayE| zraddhAmaGgirasE'yacchatpulastyAya havirbhuvam||22|| |
pulahAya gatiM yuktAM kratavE ca kriyAM satIm| khyAtiM ca bhRgavE'yacchadvasiSThAyApyarundhatIm||23|| |
atharvaNE'dadAcchAntiM yayA yajJO vitanyatE| viprarSabhAnkRtOdvAhAnsadArAnsamalAlayat||24|| |
tatasta RSayaH kSattaH kRtadArA nimantrya tam| prAtiSThannandimApannAH svaM svamAzramamaNDalam||25|| |
sa cAvatIrNaM triyugamAjJAya vibudharSabham| vivikta upasaGgamya praNamya samabhASata||26|| |
ahO pApacyamAnAnAM nirayE svairamaGgalaiH| kAlEna bhUyasA nUnaM prasIdantIha dEvatAH||27|| |
bahujanmavipakvEna samyagyOgasamAdhinA| draSTuM yatantE yatayaH zUnyAgArESu yatpadam||28|| |
sa Eva bhagavAnadya hElanaM na gaNayya naH| gRhESu jAtO grAmyANAM yaH svAnAM pakSapOSaNaH||29|| |
svIyaM vAkyamRtaM kartumavatIrNO'si mE gRhE| cikIrSurbhagavAnjJAnaM bhaktAnAM mAnavardhanaH||30|| |
tAnyEva tE'bhirUpANi rUpANi bhagavaMstava| yAni yAni ca rOcantE svajanAnAmarUpiNaH||31|| |
tvAM sUribhistattvabubhutsayAddhA sadAbhivAdArhaNapAdapITham| aizvaryavairAgyayazO'vabOdha vIryazriyA pUrtamahaM prapadyE||32|| |
paraM pradhAnaM puruSaM mahAntaM kAlaM kaviM trivRtaM lOkapAlam| AtmAnubhUtyAnugataprapaJcaM svacchandazaktiM kapilaM prapadyE||33|| |
a smAbhipRcchE'dya patiM prajAnAM tvayAvatIrNarNa utAptakAmaH| parivrajatpadavImAsthitO'haM cariSyE tvAM hRdi yuJjanvizOkaH||34|| |
zrIbhagavAnuvAca
mayA prOktaM hi lOkasya pramANaM satyalaukikE| athAjani mayA tubhyaM yadavOcamRtaM munE||35|| |
EtanmE janma lOkE'sminmumukSUNAM durAzayAt| prasaGkhyAnAya tattvAnAM sammatAyAtmadarzanE||36|| |
ESa AtmapathO'vyaktO naSTaH kAlEna bhUyasA| taM pravartayituM dEhamimaM viddhi mayA bhRtam||37|| |
gaccha kAmaM mayApRSTO mayi sannyastakarmaNA| jitvA sudurjayaM mRtyumamRtatvAya mAM bhaja||38|| |
mAmAtmAnaM svayaM jyOtiH sarvabhUtaguhAzayam| AtmanyEvAtmanA vIkSya vizOkO'bhayamRcchasi||39|| |
mAtra AdhyAtmikIM vidyAM zamanIM sarvakarmaNAm| vitariSyE yayA cAsau bhayaM cAtitariSyati||40|| |
maitrEya uvAca
EvaM samuditastEna kapilEna prajApatiH| dakSiNIkRtya taM prItO vanamEva jagAma ha||41|| |
vrataM sa AsthitO maunamAtmaikazaraNO muniH| niHsaGgO vyacaratkSONImanagniranikEtanaH||42|| |
manO brahmaNi yuJjAnO yattatsadasataH param| guNAvabhAsE viguNa EkabhaktyAnubhAvitE||43|| |
nirahaGkRtirnirmamazca nirdvandvaH samadRksvadRk| pratyakprazAntadhIrdhIraH prazAntOrmirivOdadhiH||44|| |
vAsudEvE bhagavati sarvajJE pratyagAtmani| parENa bhaktibhAvEna labdhAtmA muktabandhanaH||45|| |
AtmAnaM sarvabhUtESu bhagavantamavasthitam| apazyatsarvabhUtAni bhagavatyapi cAtmani||46|| |
icchAdvESavihInEna sarvatra samacEtasA bhagavadbhaktiyuktEna prAptA bhAgavatI gatiH||47|| |
||iti zrImadbhAgavatE mahApurANE pAramahaMsyAM saMhitAyAM tRtIyaskandhE caturviMzO'dhyAyaH||
