From StotraSamhita

caturthO'dhyAyaH

zrIzuka uvAca

kAlastE paramANvAdirdviparArdhAvadhirnRpa| kathitO yugamAnaM ca zRNu kalpalayAvapi||1||

caturyugasahasraM tu brahmaNO dinamucyatE| sa kalpO yatra manavazcaturdaza vizAmpatE||2||

tadantE pralayastAvAnbrAhmI rAtrirudAhRtA| trayO lOkA imE tatra kalpantE pralayAya hi||3||

ESa naimittikaH prOktaH pralayO yatra vizvasRk| zEtE'nantAsanO vizvamAtmasAtkRtya cAtmabhUH||4||

dviparArdhE tvatikrAntE brahmaNaH paramESThinaH| tadA prakRtayaH sapta kalpantE pralayAya vai||5||

ESa prAkRtikO rAjanpralayO yatra lIyatE| aNDakOSastu saGghAtO vighATa upasAditE||6||

parjanyaH zatavarSANi bhUmau rAjanna varSati tadA nirannE hyanyOnyaM bhakSyamANAH kSudhArditAH kSayaM yAsyanti zanakaiH kAlEnOpadrutAH prajAH||7||

sAmudraM daihikaM bhaumaM rasaM sAMvartakO raviH| razmibhiH pibatE ghOraiH sarvaM naiva vimuJcati||8||

tataH saMvartakO vahniH saGkarSaNamukhOtthitaH| dahatyanilavEgOtthaH zUnyAnbhUvivarAnatha||9||

uparyadhaH samantAcca zikhAbhirvahnisUryayOH| dahyamAnaM vibhAtyaNDaM dagdhagOmayapiNDavat||10||

tataH pracaNDapavanO varSANAmadhikaM zatam| paraH sAMvartakO vAti dhUmraM khaM rajasAvRtam||11||

tatO mEghakulAnyaGga citra varNAnyanEkazaH| zataM varSANi varSanti nadanti rabhasasvanaiH||12||

tata EkOdakaM vizvaM| brahmANDavivarAntaram||13||

tadA bhUmErgandhaguNaM grasantyApa udaplavE| grastagandhA tu pRthivI pralayatvAya kalpatE||14||

apAM rasamathO tEjastA lIyantE'tha nIrasAH| grasatE tEjasO rUpaM vAyustadrahitaM tadA||15||

lIyatE cAnilE tEjO vAyOH khaM grasatE guNam| sa vai vizati khaM rAjaMstatazca nabhasO guNam||16||

zabdaM grasati bhUtAdirnabhastamanu lIyatE| taijasazcEndriyANyaGga dEvAnvaikArikO guNaiH||17||

mahAngrasatyahaGkAraM guNAH sattvAdayazca tam| grasatE'vyAkRtaM rAjanguNAnkAlEna cOditam||18||

na tasya kAlAvayavaiH pariNAmAdayO guNAH| anAdyanantamavyaktaM nityaM kAraNamavyayam||19||

na yatra vAcO na manO na sattvaM tamO rajO vA mahadAdayO'mI| na prANabuddhIndriyadEvatA vA na sannivEzaH khalu lOkakalpaH||20||

na svapnajAgranna ca tatsuSuptaM na khaM jalaM bhUranilO'gnirarkaH| saMsuptavacchUnyavadapratarkyaM tanmUlabhUtaM padamAmananti||21||

layaH prAkRtikO hyESa puruSAvyaktayOryadA| zaktayaH sampralIyantE vivazAH kAlavidrutAH||22||

buddhIndriyArtharUpENa jJAnaM bhAti tadAzrayam| dRzyatvAvyatirEkAbhyAmAdyantavadavastu yat||23||

dIpazcakSuzca rUpaM ca jyOtiSO na pRthagbhavEt| EvaM dhIH khAni mAtrAzca na syuranyatamAdRtAt||24||

buddhErjAgaraNaM svapnaH suSuptiriti cOcyatE| mAyAmAtramidaM rAjannAnAtvaM pratyagAtmani||25||

yathA jaladharA vyOmni bhavanti na bhavanti ca| brahmaNIdaM tathA vizvamavayavyudayApyayAt||26||

satyaM hyavayavaH prOktaH sarvAvayavinAmiha| vinArthEna pratIyEranpaTasyEvAGga tantavaH||27||

yatsAmAnyavizESAbhyAmupalabhyEta sa bhramaH| anyOnyApAzrayAtsarvamAdyantavadavastu yat||28||

vikAraH khyAyamAnO'pi pratyagAtmAnamantarA| na nirUpyO'styaNurapi syAccEccitsama Atmavat||29||

na hi satyasya nAnAtvamavidvAnyadi manyatE| nAnAtvaM chidrayOryadvajjyOtiSOrvAtayOriva||30||

yathA hiraNyaM bahudhA samIyatE nRbhiH kriyAbhirvyavahAravartmasu| EvaM vacObhirbhagavAnadhOkSajO vyAkhyAyatE laukikavaidikairjanaiH||31||

yathA ghanO'rkaprabhavO'rkadarzitO hyarkAMzabhUtasya ca cakSuSastamaH| EvaM tvahaM brahmaguNastadIkSitO brahmAMzakasyAtmana AtmabandhanaH||32||

ghanO yadArkaprabhavO vidIryatE cakSuH svarUpaM ravimIkSatE tadA| yadA hyahaGkAra upAdhirAtmanO jijJAsayA nazyati tarhyanusmarEt||33||

yadaivamEtEna vivEkahEtinA mAyAmayAhaGkaraNAtmabandhanam| chittvAcyutAtmAnubhavO'vatiSThatE tamAhurAtyantikamaGga samplavam||34||

nityadA sarvabhUtAnAM brahmAdInAM parantapa| utpattipralayAvEkE sUkSmajJAH sampracakSatE||35||

kAlasrOtOjavEnAzu hriyamANasya nityadA| pariNAminAm avasthAstA janmapralayahEtavaH||36||

anAdyantavatAnEna kAlEnEzvaramUrtinA| avasthA naiva dRzyantE viyati jyOtiSAm iva||37||

nityO naimittikazcaiva tathA prAkRtikO layaH| Atyantikazca kathitaH kAlasya gatirIdRzI||38||

EtAH kuruzrESTha jagadvidhAturnArAyaNasyAkhilasattvadhAmnaH| lIlAkathAstE kathitAH samAsataH kArtsnyEna nAjO'pyabhidhAtumIzaH||39||

saMsArasindhumatidustaramuttitIrSOr nAnyaH plavO bhagavataH puruSOttamasya| lIlAkathArasaniSEvaNamantarENa puMsO bhavEdvividhaduHkhadavArditasya||40||

purANasaMhitAmEtAmRSirnArAyaNO'vyayaH| nAradAya purA prAha kRSNadvaipAyanAya saH||41||

sa vai mahyaM mahArAja bhagavAnbAdarAyaNaH| imAM bhAgavatIM prItaH saMhitAM vEdasammitAm||42||

imAM vakSyatyasau sUta RSibhyO naimiSAlayE dIrghasatrE kuruzrESTha sampRSTaH zaunakAdibhiH||43||

||iti zrImadbhAgavatE mahApurANE pAramahaMsyAM saMhitAyAM dwAdazaskandhE caturthO'dhyAyaH||

See Also

• http://vedabase.net/sb/12/4/en