From StotraSamhita

viMzO'dhyAyaH

zrIzuka uvAca

balirEvaM gRhapatiH kulAcAryENa bhASitaH| tUSNIM bhUtvA kSaNaM rAjannuvAcAvahitO gurum||1||

zrIbaliruvAca

satyaM bhagavatA prOktaM dharmO'yaM gRhamEdhinAm| arthaM kAmaM yazO vRttiM yO na bAdhEta karhicit||2||

sa cAhaM vittalObhEna pratyAcakSE kathaM dvijam| pratizrutya dadAmIti prAhrAdiH kitavO yathA||3||

na hyasatyAtparO'dharma iti hOvAca bhUriyam| sarvaM sODhumalaM manyE RtE'lIkaparaM naram||4||

nAhaM bibhEmi nirayAnnAdhanyAdasukhArNavAt| na sthAnacyavanAnmRtyOryathA viprapralambhanAt||5||

yadyaddhAsyati lOkE'sminsamparEtaM dhanAdikam| tasya tyAgE nimittaM kiM viprastuSyEnna tEna cEt||6||

zrEyaH kurvanti bhUtAnAM sAdhavO dustyajAsubhiH| dadhyaGzibiprabhRtayaH kO vikalpO dharAdiSu||7||

yairiyaM bubhujE brahmandaityEndrairanivartibhiH| tESAM kAlO'grasIllOkAnna yazO'dhigataM bhuvi||8||

sulabhA yudhi viprarSE hyanivRttAstanutyajaH| na tathA tIrtha AyAtE zraddhayA yE dhanatyajaH||9||

manasvinaH kAruNikasya zObhanaM yadarthikAmOpanayEna durgatiH| kutaH punarbrahmavidAM bhavAdRzAM tatO vaTOrasya dadAmi vAJchitam||10||

yajanti yajJaM kratubhiryamAdRtA bhavanta AmnAyavidhAnakOvidAH| sa Eva viSNurvaradO'stu vA parO dAsyAmyamuSmai kSitimIpsitAM munE||11||

yadyapyasAvadharmENa mAM badhnIyAdanAgasam| tathApyEnaM na hiMsiSyE bhItaM brahmatanuM ripum||12||

ESa vA uttamazlOkO na jihAsati yadyazaH| hatvA mainAM harEdyuddhE zayIta nihatO mayA||13||

zrIzuka uvAca

EvamazraddhitaM ziSyamanAdEzakaraM guruH| zazApa daivaprahitaH satyasandhaM manasvinam||14||

dRDhaM paNDitamAnyajJaH stabdhO'syasmadupEkSayA| macchAsanAtigO yastvamacirAdbhrazyasE zriyaH||15||

EvaM zaptaH svaguruNA satyAnna calitO mahAn| vAmanAya dadAvEnAmarcitvOdakapUrvakam||16||

vindhyAvalistadAgatya patnI jAlakamAlinI| AninyE kalazaM haimamavanEjanyapAM bhRtam||17||

yajamAnaH svayaM tasya zrImatpAdayugaM mudA| avanijyAvahanmUrdhni tadapO vizvapAvanIH||18||

tadAsurEndraM divi dEvatAgaNA gandharvavidyAdharasiddhacAraNAH| tatkarma sarvE'pi gRNanta ArjavaM prasUnavarSairvavRSurmudAnvitAH||19||

nEdurmuhurdundubhayaH sahasrazO gandharvakimpUruSakinnarA jaguH| manasvinAnEna kRtaM suduSkaraM vidvAnadAdyadripavE jagattrayam||20||

tadvAmanaM rUpamavardhatAdbhutaM harEranantasya guNatrayAtmakam| bhUH khaM dizO dyaurvivarAH payOdhayastiryaGnRdEvA RSayO yadAsata||21||

kAyE balistasya mahAvibhUtEH sahartvigAcAryasadasya Etat| dadarza vizvaM triguNaM guNAtmakE bhUtEndriyArthAzayajIvayuktam||22||

rasAmacaSTAGghritalE'tha pAdayOrmahIM mahIdhrAnpuruSasya jaGghayOH| patattriNO jAnuni vizvamUrtErUrvOrgaNaM mArutamindrasEnaH||23||

sandhyAM vibhOrvAsasi guhya aikSatprajApatInjaghanE AtmamukhyAn| nAbhyAM nabhaH kukSiSu saptasindhUnurukramasyOrasi carkSamAlAm||24||

hRdyaGga dharmaM stanayOrmurArErRtaM ca satyaM ca manasyathEndum| zriyaM ca vakSasyaravindahastAM kaNThE ca sAmAni samastarEphAn||25||

indrapradhAnAnamarAnbhujESu tatkarNayOH kakubhO dyauzca mUrdhni| kEzESu mEghAnchvasanaM nAsikAyAmakSNOzca sUryaM vadanE ca vahnim||26||

vANyAM ca chandAMsi rasE jalEzaM bhruvOrniSEdhaM ca vidhiM ca pakSmasu| ahazca rAtriM ca parasya puMsO manyuM lalATE'dhara Eva lObham||27||

sparzE ca kAmaM nRpa rEtasAmbhaH pRSThE tvadharmaM kramaNESu yajJam| chAyAsu mRtyuM hasitE ca mAyAM tanUruhESvOSadhijAtayazca||28||

nadIzca nADISu zilA nakhESu buddhAvajaM dEvagaNAnRSIMzca| prANESu gAtrE sthirajaGgamAni sarvANi bhUtAni dadarza vIraH||29||

sarvAtmanIdaM bhuvanaM nirIkSya sarvE'surAH kazmalamApuraGga| sudarzanaM cakramasahyatEjO dhanuzca zArGgaM stanayitnughOSam||30||

parjanyaghOSO jalajaH pAJcajanyaH kaumOdakI viSNugadA tarasvinI| vidyAdharO'siH zatacandrayuktastUNOttamAvakSayasAyakau ca||31||

sunandamukhyA upatasthurIzaM pArSadamukhyAH sahalOkapAlAH| sphuratkirITAGgadamInakuNDalaH zrIvatsaratnOttamamEkhalAmbaraiH||32||

madhuvratasragvanamAlayAvRtO rarAja rAjanbhagavAnurukramaH| kSitiM padaikEna balErvicakramE nabhaH zarIrENa dizazca bAhubhiH||33||

padaM dvitIyaM kramatastriviSTapaM na vai tRtIyAya tadIyamaNvapi urukramasyAGghriruparyuparyathO maharjanAbhyAM tapasaH paraM gataH||34||

||iti zrImadbhAgavatE mahApurANE pAramahaMsyAM saMhitAyAM aSTamaskandhE viMzO'dhyAyaH||

See Also

• http://vedabase.net/sb/8/20/en