From StotraSamhita
< Bhagavatam | Skandha 11
dwitIyO'dhyAyaH
zrIzuka uvAca
gOvindabhujaguptAyAM dvAravatyAM kurUdvaha| avAtsInnAradO'bhIkSNaM kRSNOpAsanalAlasaH||1|| |
kO nu rAjannindriyavAnmukundacaraNAmbujam| na bhajEtsarvatOmRtyurupAsyamamarOttamaiH||2|| |
tamEkadA tu dEvarSiM vasudEvO gRhAgatam| arcitaM sukhamAsInamabhivAdyEdamabravIt||3|| |
zrIvasudEva uvAca
bhagavanbhavatO yAtrA svastayE sarvadEhinAm| kRpaNAnAM yathA pitrOruttamazlOkavartmanAm||4|| |
bhUtAnAM dEvacaritaM duHkhAya ca sukhAya ca| sukhAyaiva hi sAdhUnAM tvAdRzAmacyutAtmanAm||5|| |
bhajanti yE yathA dEvAndEvA api tathaiva tAn| chAyEva karmasacivAH sAdhavO dInavatsalAH||6|| |
brahmaMstathApi pRcchAmO dharmAnbhAgavatAMstava| yAnzrutvA zraddhayA martyO mucyatE sarvatO bhayAt||7|| |
ahaM kila purAnantaM prajArthO bhuvi muktidam| apUjayaM na mOkSAya mOhitO dEvamAyayA||8|| |
yathA vicitravyasanAdbhavadbhirvizvatObhayAt| mucyEma hyaJjasaivAddhA tathA naH zAdhi suvrata||9|| |
zrIzuka uvAca
rAjannEvaM kRtapraznO vasudEvEna dhImatA| prItastamAha dEvarSirharEH saMsmAritO guNaiH||10|| |
zrInArada uvAca
samyagEtadvyavasitaM bhavatA sAtvatarSabha| yatpRcchasE bhAgavatAndharmAMstvaM vizvabhAvanAn||11|| |
zrutO'nupaThitO dhyAta AdRtO vAnumOditaH| sadyaH punAti saddharmO dEvavizvadruhO'pi hi||12|| |
tvayA paramakalyANaH puNyazravaNakIrtanaH| smAritO bhagavAnadya dEvO nArAyaNO mama||13|| |
atrApyudAharantImamitihAsaM purAtanam| ArSabhANAM ca saMvAdaM vidEhasya mahAtmanaH||14|| |
priyavratO nAma sutO manOH svAyambhuvasya yaH| tasyAgnIdhrastatO nAbhirRSabhastatsutaH smRtaH||15|| |
tamAhurvAsudEvAMzaM mOkSadharmavivakSayA| avatIrNaM sutazataM tasyAsIdbrahmapAragam||16|| |
tESAM vai bharatO jyESThO nArAyaNaparAyaNaH| vikhyAtaM varSamEtadyan nAmnA bhAratamadbhutam||17|| |
sa bhuktabhOgAM tyaktvEmAM nirgatastapasA harim| upAsInastatpadavIM lEbhE vai janRnabhistribhiH||18|| |
tESAM nava navadvIpa patayO'sya samantataH| karmatantrapraNEtAra EkAzItirdvijAtayaH||19|| |
navAbhavanmahAbhAgA munayO hyarthazaMsinaH| zramaNA vAtarasanA AtmavidyAvizAradAH||20|| |
kavirhavirantarIkSaH prabuddhaH pippalAyanaH| AvirhOtrO'tha drumilazcamasaH karabhAjanaH||21|| |
ta EtE bhagavadrUpaM vizvaM sadasadAtmakam| AtmanO'vyatirEkENa pazyantO vyacaranmahIm||22|| |
avyAhatESTagatayaH surasiddhasAdhya gandharvayakSanarakinnaranAgalOkAn| muktAzcaranti municAraNabhUtanAtha vidyAdharadvijagavAM bhuvanAni kAmam||23|| |
ta EkadA nimEH satramupajagmuryadRcchayA| vitAyamAnamRSibhirajanAbhE mahAtmanaH||24|| |
tAndRSTvA sUryasaGkAzAnmahAbhAgavatAnnRpa| yajamAnO'gnayO viprAH sarva EvOpatasthirE||25|| |
vidEhastAnabhiprEtya nArAyaNaparAyaNAn| prItaH sampUjayAM cakrE AsanasthAnyathArhataH||26|| |
tAnrOcamAnAnsvarucA brahmaputrOpamAnnava| papraccha paramaprItaH prazrayAvanatO nRpaH||27|| |
zrIvidEha uvAca
manyE bhagavataH sAkSAtpArSadAnvO madhudvisaH| viSNOrbhUtAni lOkAnAM pAvanAya caranti hi||28|| |
durlabhO mAnuSO dEhO dEhinAM kSaNabhaGguraH| tatrApi durlabhaM manyE vaikuNThapriyadarzanam||29|| |
ata AtyantikaM kSEmaM pRcchAmO bhavatO'naghAH| saMsArE'sminkSaNArdhO'pi satsaGgaH zEvadhirnRNAm||30|| |
dharmAnbhAgavatAnbrUta yadi naH zrutayE kSamam| yaiH prasannaH prapannAya dAsyatyAtmAnamapyajaH||31|| |
zrInArada uvAca
EvaM tE niminA pRSTA vasudEva mahattamAH| pratipUjyAbruvanprItyA sasadasyartvijaM nRpam||32|| |
zrIkaviruvAca
manyE'kutazcidbhayamacyutasya pAdAmbujOpAsanamatra nityam| udvignabuddhErasadAtmabhAvAdvizvAtmanA yatra nivartatE bhIH||33|| |
yE vai bhagavatA prOktA upAyA hyAtmalabdhayE| aJjaH puMsAmaviduSAM viddhi bhAgavatAnhi tAn||34|| |
yAnAsthAya narO rAjanna pramAdyEta karhicit| dhAvannimIlya vA nEtrE na skhalEnna patEdiha||35|| |
kAyEna vAcA manasEndriyairvA buddhyAtmanA vAnusRtasvabhAvAt| karOti yadyatsakalaM parasmai nArAyaNAyEti samarpayEttat||36|| |
bhayaM dvitIyAbhinivEzataH syAdIzAdapEtasya viparyayO'smRtiH| tanmAyayAtO budha AbhajEttaM bhaktyaikayEzaM gurudEvatAtmA||37|| |
avidyamAnO'pyavabhAti hi dvayO dhyAturdhiyA svapnamanOrathau yathA| tatkarmasaGkalpavikalpakaM manO budhO nirundhyAdabhayaM tataH syAt||38|| |
zRNvansubhadrANi rathAGgapANErjanmAni karmANi ca yAni lOkE| gItAni nAmAni tadarthakAni gAyanvilajjO vicarEdasaGgaH||39|| |
EvaMvrataH svapriyanAmakIrtyA jAtAnurAgO drutacitta uccaiH| hasatyathO rOditi rauti gAyatyunmAdavannRtyati lOkabAhyaH||40|| |
khaM vAyumagniM salilaM mahIM ca jyOtIMSi sattvAni dizO drumAdIn| saritsamudrAMzca harEH zarIraM yatkiM ca bhUtaM praNamEdananyaH||41|| |
bhaktiH parEzAnubhavO viraktiranyatra caiSa trika EkakAlaH| prapadyamAnasya yathAznataH syustuSTiH puSTiH kSudapAyO'nughAsam||42|| |
ityacyutAGghriM bhajatO'nuvRttyA bhaktirviraktirbhagavatprabOdhaH| bhavanti vai bhAgavatasya rAjaMstataH parAM zAntimupaiti sAkSAt||43|| |
zrIrAjOvAca
atha bhAgavataM brUta yaddharmO yAdRzO nRNAm| yathAcarati yadbrUtE yairliGgairbhagavatpriyaH||44|| |
zrIhaviruvAca
sarvabhUtESu yaH pazyEdbhagavadbhAvamAtmanaH| bhUtAni bhagavatyAtmanyESa bhAgavatOttamaH||45|| |
IsvarE tadadhInESu bAlizESu dviSatsu ca| prEmamaitrIkRpOpEkSA yaH karOti sa madhyamaH||46|| |
arcAyAmEva harayE pUjAM yaH zraddhayEhatE| na tadbhaktESu cAnyESu sa bhaktaH prAkRtaH smRtaH||47|| |
gRhItvApIndriyairarthAnyO na dvESTi na hRSyati| viSNOrmAyAmidaM pazyansa vai bhAgavatOttamaH||48|| |
dEhEndriyaprANamanOdhiyAM yO janmApyayakSudbhayatarSakRcchraiH| saMsAradharmairavimuhyamAnaH smRtyA harErbhAgavatapradhAnaH||49|| |
na kAmakarmabIjAnAM yasya cEtasi sambhavaH| vAsudEvaikanilayaH sa vai bhAgavatOttamaH||50|| |
na yasya janmakarmabhyAM na varNAzramajAtibhiH| sajjatE'sminnahaMbhAvO dEhE vai sa harEH priyaH||51|| |
na yasya svaH para iti vittESvAtmani vA bhidA| sarvabhUtasamaH zAntaH sa vai bhAgavatOttamaH||52|| |
tribhuvanavibhavahEtavE'pyakuNTha smRtirajitAtmasurAdibhirvimRgyAt| na calati bhagavatpadAravindAl lavanimiSArdhamapi yaH sa vaiSNavAgryaH||53|| |
bhagavata uruvikramAGghrizAkhA nakhamaNicandrikayA nirastatApE| hRdi kathamupasIdatAM punaH sa prabhavati candra ivOditE'rkatApaH||54|| |
visRjati hRdayaM na yasya sAkSAddhariravazAbhihitO'pyaghaughanAzaH praNayarasanayA dhRtAGghripadmaH sa bhavati bhAgavatapradhAna uktaH||55|| |
||iti zrImadbhAgavatE mahApurANE pAramahaMsyAM saMhitAyAM EkAdazaskandhE dwitIyO'dhyAyaH||
