From StotraSamhita
< Bhagavatam | Skandha 02
caturthO'dhyAyaH
sUta uvAca
vaiyAsakEriti vacastattvanizcayamAtmanaH| upadhArya matiM kRSNE auttarEyaH satIM vyadhAt||1|| |
AtmajAyAsutAgAra pazudraviNabandhuSu| rAjyE cAvikalE nityaM virUDhAM mamatAM jahau||2|| |
papraccha cEmamEvArthaM yanmAM pRcchatha sattamAH| kRSNAnubhAvazravaNE zraddadhAnO mahAmanAH||3|| |
saMsthAM vijJAya sannyasya karma traivargikaM ca yat| vAsudEvE bhagavati AtmabhAvaM dRDhaM gataH||4|| |
rAjOvAca
samIcInaM vacO brahmansarvajJasya tavAnagha| tamO vizIryatE mahyaM harEH kathayataH kathAm||5|| |
bhUya Eva vivitsAmi bhagavAnAtmamAyayA| yathEdaM sRjatE vizvaM durvibhAvyamadhIzvaraiH||6|| |
yathA gOpAyati vibhuryathA saMyacchatE punaH yAM yAM zaktimupAzritya puruzaktiH paraH pumAn AtmAnaM krIDayankrIDankarOti vikarOti ca||7|| |
nUnaM bhagavatO brahmanharEradbhutakarmaNaH| durvibhAvyamivAbhAti kavibhizcApi cESTitam||8|| |
yathA guNAMstu prakRtEryugapatkramazO'pi vA| bibharti bhUrizastvEkaH kurvankarmANi janmabhiH||9|| |
vicikitsitamEtanmE bravItu bhagavAnyathA| zAbdE brahmaNi niSNAtaH parasmiMzca bhavAnkhalu||10|| |
sUta uvAca
ityupAmantritO rAjJA guNAnukathanE harEH| hRSIkEzamanusmRtya prativaktuM pracakramE||11|| |
zrIzuka uvAca
namaH parasmai puruSAya bhUyasE sadudbhavasthAnanirOdhalIlayA| gRhItazaktitritayAya dEhinAmantarbhavAyAnupalakSyavartmanE||12|| |
bhUyO namaH sadvRjinacchidE'satAmasambhavAyAkhilasattvamUrtayE| puMsAM punaH pAramahaMsya AzramE vyavasthitAnAmanumRgyadAzuSE||13|| |
namO namastE'stvRSabhAya sAtvatAM vidUrakASThAya muhuH kuyOginAm| nirastasAmyAtizayEna rAdhasA svadhAmani brahmaNi raMsyatE namaH||14|| |
yatkIrtanaM yatsmaraNaM yadIkSaNaM yadvandanaM yacchravaNaM yadarhaNam| lOkasya sadyO vidhunOti kalmaSaM tasmai subhadrazravasE namO namaH||15|| |
vicakSaNA yaccaraNOpasAdanAtsaGgaM vyudasyObhayatO'ntarAtmanaH| vindanti hi brahmagatiM gataklamAstasmai subhadrazravasE namO namaH||16|| |
tapasvinO dAnaparA yazasvinO manasvinO mantravidaH sumaGgalAH| kSEmaM na vindanti vinA yadarpaNaM tasmai subhadrazravasE namO namaH||17|| |
kirAtahUNAndhrapulindapulkazA AbhIrazumbhA yavanAH khasAdayaH| yE'nyE ca pApA yadapAzrayAzrayAH zudhyanti tasmai prabhaviSNavE namaH||18|| |
sa ESa AtmAtmavatAmadhIzvarastrayImayO dharmamayastapOmayaH| gatavyalIkairajazaGkarAdibhirvitarkyaliGgO bhagavAnprasIdatAm||19|| |
zriyaH patiryajJapatiH prajApatirdhiyAM patirlOkapatirdharApatiH| patirgatizcAndhakavRSNisAtvatAM prasIdatAM mE bhagavAnsatAM patiH||20|| |
yadaGghryabhidhyAnasamAdhidhautayA dhiyAnupazyanti hi tattvamAtmanaH| vadanti caitatkavayO yathArucaM sa mE mukundO bhagavAnprasIdatAm||21|| |
pracOditA yEna purA sarasvatI vitanvatAjasya satIM smRtiM hRdi| svalakSaNA prAdurabhUtkilAsyataH sa mE RSINAmRSabhaH prasIdatAm||22|| |
bhUtairmahadbhirya imAH purO vibhurnirmAya zEtE yadamUSu pUruSaH| bhuGktE guNAnSODaza SODazAtmakaH sO'laGkRSISTa bhagavAnvacAMsi mE||23|| |
namastasmai bhagavatE vAsudEvAya vEdhasE| papurjJAnamayaM saumyA yanmukhAmburuhAsavam||24|| |
EtadEvAtmabhU rAjannAradAya vipRcchatE vEdagarbhO'bhyadhAtsAkSAdyadAha harirAtmanaH||25|| |
||iti zrImadbhAgavatE mahApurANE pAramahaMsyAM saMhitAyAM dwitIyaskandhE caturthO'dhyAyaH||
