From StotraSamhita

dwitIyO'dhyAyaH

zrIzuka uvAca

EvaM gatE'tha sudyumnE manurvaivasvataH sutE| putrakAmastapastEpE yamunAyAM zataM samAH||1||

tatO'yajanmanurdEvamapatyArthaM hariM prabhum| ikSvAkupUrvajAnputrAnlEbhE svasadRzAndaza||2||

pRSadhrastu manOH putrO gOpAlO guruNA kRtaH| pAlayAmAsa gA yattO rAtryAM vIrAsanavrataH||3||

EkadA prAvizadgOSThaM zArdUlO nizi varSati| zayAnA gAva utthAya bhItAstA babhramurvrajE||4||

EkAM jagrAha balavAnsA cukrOza bhayAturA| tasyAstu kranditaM zrutvA pRSadhrO'nusasAra ha||5||

khaDgamAdAya tarasA pralInODugaNE nizi| ajAnannacchinOdbabhrOH ziraH zArdUlazaGkayA||6||

vyAghrO'pi vRkNazravaNO nistriMzAgrAhatastataH| nizcakrAma bhRzaM bhItO raktaM pathi samutsRjan||7||

manyamAnO hataM vyAghraM pRSadhraH paravIrahA| adrAkSItsvahatAM babhruM vyuSTAyAM nizi duHkhitaH||8||

taM zazApa kulAcAryaH kRtAgasamakAmataH| na kSatrabandhuH zUdrastvaM karmaNA bhavitAmunA||9||

EvaM zaptastu guruNA pratyagRhNAtkRtAJjaliH| adhArayadvrataM vIra UrdhvarEtA munipriyam||10||

vAsudEvE bhagavati sarvAtmani parE'malE| EkAntitvaM gatO bhaktyA sarvabhUtasuhRtsamaH||11||

vimuktasaGgaH zAntAtmA saMyatAkSO'parigrahaH| yadRcchayOpapannEna kalpayanvRttimAtmanaH||12||

AtmanyAtmAnamAdhAya jJAnatRptaH samAhitaH| vicacAra mahImEtAM jaDAndhabadhirAkRtiH||13||

EvaM vRttO vanaM gatvA dRSTvA dAvAgnimutthitam| tEnOpayuktakaraNO brahma prApa paraM muniH||14||

kaviH kanIyAnviSayESu niHspRhO visRjya rAjyaM saha bandhubhirvanam| nivEzya cittE puruSaM svarOciSaM vivEza kaizOravayAH paraM gataH||15||

karUSAnmAnavAdAsankArUSAH kSatrajAtayaH| uttarApathagOptArO brahmaNyA dharmavatsalAH||16||

dhRSTAddhArSTamabhUtkSatraM brahmabhUyaM gataM kSitau| nRgasya vaMzaH sumatirbhUtajyOtistatO vasuH||17||

vasOH pratIkastatputra OghavAnOghavatpitA| kanyA caughavatI nAma sudarzana uvAha tAm||18||

citrasEnO nariSyantAdRkSastasya sutO'bhavat| tasya mIDhvAMstataH pUrNa indrasEnastu tatsutaH||19||

vItihOtrastvindrasEnAttasya satyazravA abhUt| uruzravAH sutastasya dEvadattastatO'bhavat||20||

tatO'gnivEzyO bhagavAnagniH svayamabhUtsutaH| kAnIna iti vikhyAtO jAtUkarNyO mahAnRSiH||21||

tatO brahmakulaM jAtamAgnivEzyAyanaM nRpa| nariSyantAnvayaH prOktO diSTavaMzamataH zRNu||22||

nAbhAgO diSTaputrO'nyaH karmaNA vaizyatAM gataH| bhalandanaH sutastasya vatsaprItirbhalandanAt||23||

vatsaprItEH sutaH prAMzustatsutaM pramatiM viduH| khanitraH pramatEstasmAccAkSuSO'tha viviMzatiH||24||

viviMzatEH sutO rambhaH khanInEtrO'sya dhArmikaH| karandhamO mahArAja tasyAsIdAtmajO nRpa||25||

tasyAvIkSitsutO yasya maruttazcakravartyabhUt| saMvartO'yAjayadyaM vai mahAyOgyaGgiraHsutaH||26||

maruttasya yathA yajJO na tathAnyO'sti kazcana| sarvaM hiraNmayaM tvAsIdyatkiJciccAsya zObhanam||27||

amAdyadindraH sOmEna dakSiNAbhirdvijAtayaH| marutaH parivESTArO vizvEdEvAH sabhAsadaH||28||

maruttasya damaH putrastasyAsIdrAjyavardhanaH| sudhRtistatsutO jajJE saudhRtEyO naraH sutaH||29||

tatsutaH kEvalastasmAddhundhumAnvEgavAMstataH| budhastasyAbhavadyasya tRNabindurmahIpatiH||30||

taM bhEjE'lambuSA dEvI bhajanIyaguNAlayam| varApsarA yataH putrAH kanyA cElavilAbhavat||31||

yasyAmutpAdayAmAsa vizravA dhanadaM sutam| prAdAya vidyAM paramAmRSiryOgEzvaraH pituH||32||

vizAlaH zUnyabandhuzca dhUmrakEtuzca tatsutAH| vizAlO vaMzakRdrAjA vaizAlIM nirmamE purIm||33||

hEmacandraH sutastasya dhUmrAkSastasya cAtmajaH| tatputrAtsaMyamAdAsItkRzAzvaH sahadEvajaH||34||

kRzAzvAtsOmadattO'bhUdyO'zvamEdhairiDaspatim| iSTvA puruSamApAgryAM gatiM yOgEzvarAzritAm||35||

saumadattistu sumatistatputrO janamEjayaH EtE vaizAlabhUpAlAstRNabindOryazOdharAH||36||

||iti zrImadbhAgavatE mahApurANE pAramahaMsyAM saMhitAyAM navamaskandhE dwitIyO'dhyAyaH||

See Also

• http://vedabase.net/sb/9/2/en