From StotraSamhita
< Bhagavatam | Skandha 03
caturdazO'dhyAyaH
zrIzuka uvAca
nizamya kauSAraviNOpavarNitAM harEH kathAM kAraNasUkarAtmanaH| punaH sa papraccha tamudyatAJjalirna cAtitRptO vidurO dhRtavrataH||1|| |
vidura uvAca
tEnaiva tu munizrESTha hariNA yajJamUrtinA| AdidaityO hiraNyAkSO hata ityanuzuzruma||2|| |
tasya cOddharataH kSauNIM svadaMSTrAgrENa lIlayA| daityarAjasya ca brahmankasmAddhEtOrabhUnmRdhaH||3|| |
zraddadhAnAya bhaktAya brUhi tajjanmavistaram| RSE na tRpyati manaH paraM kautUhalaM hi mE||4|| |
maitrEya uvAca
sAdhu vIra tvayA pRSTamavatArakathAM harEH| yattvaM pRcchasi martyAnAM mRtyupAzavizAtanIm||5|| |
yayOttAnapadaH putrO muninA gItayArbhakaH| mRtyOH kRtvaiva mUrdhnyaGghrimArurOha harEH padam||6|| |
athAtrApItihAsO'yaM zrutO mE varNitaH purA| brahmaNA dEvadEvEna dEvAnAmanupRcchatAm||7|| |
ditirdAkSAyaNI kSattarmArIcaM kazyapaM patim| apatyakAmA cakamE sandhyAyAM hRcchayArditA||8|| |
iSTvAgnijihvaM payasA puruSaM yajuSAM patim| nimlOcatyarka AsInamagnyagArE samAhitam||9|| |
ditiruvAca
ESa mAM tvatkRtE vidvankAma AttazarAsanaH| dunOti dInAM vikramya rambhAmiva mataGgajaH||10|| |
tadbhavAndahyamAnAyAM sapatnInAM samRddhibhiH| prajAvatInAM bhadraM tE mayyAyuGktAmanugraham||11|| |
bhartaryAptOrumAnAnAM lOkAnAvizatE yazaH| patirbhavadvidhO yAsAM prajayA nanu jAyatE||12|| |
purA pitA nO bhagavAndakSO duhitRvatsalaH| kaM vRNIta varaM vatsA ityapRcchata naH pRthak||13|| |
sa viditvAtmajAnAM nO bhAvaM santAnabhAvanaH| trayOdazAdadAttAsAM yAstE zIlamanuvratAH||14|| |
atha mE kuru kalyANaM kAmaM kamalalOcana| ArtOpasarpaNaM bhUmannamOghaM hi mahIyasi||15|| |
iti tAM vIra mArIcaH kRpaNAM bahubhASiNIm| pratyAhAnunayanvAcA pravRddhAnaGgakazmalAm||16|| |
ESa tE'haM vidhAsyAmi priyaM bhIru yadicchasi| tasyAH kAmaM na kaH kuryAtsiddhistraivargikI yataH||17|| |
sarvAzramAnupAdAya svAzramENa kalatravAn| vyasanArNavamatyEti jalayAnairyathArNavam||18|| |
yAmAhurAtmanO hyardhaM zrEyaskAmasya mAnini| yasyAM svadhuramadhyasya pumAMzcarati vijvaraH||19|| |
yAmAzrityEndriyArAtIndurjayAnitarAzramaiH| vayaM jayEma hElAbhirdasyUndurgapatiryathA||20|| |
na vayaM prabhavastAM tvAmanukartuM gRhEzvari| apyAyuSA vA kArtsnyEna yE cAnyE guNagRdhnavaH||21|| |
athApi kAmamEtaM tE prajAtyai karavANyalam| yathA mAM nAtirOcanti muhUrtaM pratipAlaya||22|| |
ESA ghOratamA vElA ghOrANAM ghOradarzanA| caranti yasyAM bhUtAni bhUtEzAnucarANi ha||23|| |
EtasyAM sAdhvi sandhyAyAM bhagavAnbhUtabhAvanaH| parItO bhUtaparSadbhirvRSENATati bhUtarAT||24|| |
zmazAnacakrAniladhUlidhUmra vikIrNavidyOtajaTAkalApaH| bhasmAvaguNThAmalarukmadEhO dEvastribhiH pazyati dEvarastE||25|| |
na yasya lOkE svajanaH parO vA nAtyAdRtO nOta kazcidvigarhyaH| vayaM vratairyaccaraNApaviddhAmAzAsmahE'jAM bata bhuktabhOgAm||26|| |
yasyAnavadyAcaritaM manISiNO gRNantyavidyApaTalaM bibhitsavaH| nirastasAmyAtizayO'pi yatsvayaM pizAcacaryAmacaradgatiH satAm||27|| |
hasanti yasyAcaritaM hi durbhagAH svAtmanratasyAviduSaH samIhitam| yairvastramAlyAbharaNAnulEpanaiH zvabhOjanaM svAtmatayOpalAlitam||28|| |
brahmAdayO yatkRtasEtupAlA yatkAraNaM vizvamidaM ca mAyA| AjJAkarI yasya pizAcacaryA ahO vibhUmnazcaritaM viDambanam||29|| |
maitrEya uvAca
saivaM saMviditE bhartrA manmathOnmathitEndriyA| jagrAha vAsO brahmarSErvRSalIva gatatrapA||30|| |
sa viditvAtha bhAryAyAstaM nirbandhaM vikarmaNi| natvA diSTAya rahasi tayAthOpavivEza hi||31|| |
athOpaspRzya salilaM prANAnAyamya vAgyataH| dhyAyaJjajApa virajaM brahma jyOtiH sanAtanam||32|| |
ditistu vrIDitA tEna karmAvadyEna bhArata| upasaGgamya viprarSimadhOmukhyabhyabhASata||33|| |
ditiruvAca
na mE garbhamimaM brahmanbhUtAnAmRSabhO'vadhIt| rudraH patirhi bhUtAnAM yasyAkaravamaMhasam||34|| |
namO rudrAya mahatE dEvAyOgrAya mIDhuSE| zivAya nyastadaNDAya dhRtadaNDAya manyavE||35|| |
sa naH prasIdatAM bhAmO bhagavAnurvanugrahaH| vyAdhasyApyanukampyAnAM strINAM dEvaH satIpatiH||36|| |
maitrEya uvAca
svasargasyAziSaM lOkyAmAzAsAnAM pravEpatIm| nivRttasandhyAniyamO bhAryAmAha prajApatiH||37|| |
kazyapa uvAca
aprAyatyAdAtmanastE dOSAnmauhUrtikAduta| mannidEzAticArENa dEvAnAM cAtihElanAt||38|| |
bhaviSyatastavAbhadrAvabhadrE jATharAdhamau| lOkAnsapAlAMstrIMzcaNDi muhurAkrandayiSyataH||39|| |
prANinAM hanyamAnAnAM dInAnAmakRtAgasAm| strINAM nigRhyamANAnAM kOpitESu mahAtmasu||40|| |
tadA vizvEzvaraH kruddhO bhagavAllOkabhAvanaH| haniSyatyavatIryAsau yathAdrInzataparvadhRk||41|| |
ditiruvAca
vadhaM bhagavatA sAkSAtsunAbhOdArabAhunA| AzAsE putrayOrmahyaM mA kruddhAdbrAhmaNAdprabhO||42|| |
na brahmadaNDadagdhasya na bhUtabhayadasya ca| nArakAzcAnugRhNanti yAM yAM yOnimasau gataH||43|| |
kazyapa uvAca
kRtazOkAnutApEna sadyaH pratyavamarzanAt| bhagavatyurumAnAcca bhavE mayyapi cAdarAt||44|| |
putrasyaiva ca putrANAM bhavitaikaH satAM mataH| gAsyanti yadyazaH zuddhaM bhagavadyazasA samam||45|| |
yOgairhEmEva durvarNaM bhAvayiSyanti sAdhavaH| nirvairAdibhirAtmAnaM yacchIlamanuvartitum||46|| |
yatprasAdAdidaM vizvaM prasIdati yadAtmakam| sa svadRgbhagavAnyasya tOSyatE'nanyayA dRzA||47|| |
sa vai mahAbhAgavatO mahAtmA mahAnubhAvO mahatAM mahiSThaH| pravRddhabhaktyA hyanubhAvitAzayE nivEzya vaikuNThamimaM vihAsyati||48|| |
alampaTaH zIladharO guNAkarO hRSTaH pararddhyA vyathitO duHkhitESu| abhUtazatrurjagataH zOkahartA naidAghikaM tApamivODurAjaH||49|| |
antarbahizcAmalamabjanEtraM svapUruSEcchAnugRhItarUpam| pautrastava zrIlalanAlalAmaM draSTA sphuratkuNDalamaNDitAnanam||50|| |
maitrEya uvAca
zrutvA bhAgavataM pautramamOdata ditirbhRzam putrayOzca vadhaM kRSNAdviditvAsInmahAmanAH||51|| |
||iti zrImadbhAgavatE mahApurANE pAramahaMsyAM saMhitAyAM tRtIyaskandhE caturdazO'dhyAyaH||
