From StotraSamhita
< Bhagavatam | Skandha 11
caturviMzO'dhyAyaH
zrIbhagavAnuvAca
atha tE sampravakSyAmi sAGkhyaM pUrvairvinizcitam| yadvijJAya pumAnsadyO jahyAdvaikalpikaM bhramam||1|| |
AsIjjJAnamathO artha EkamEvAvikalpitam| yadA vivEkanipuNA Adau kRtayugE'yugE||2|| |
tanmAyAphalarUpENa kEvalaM nirvikalpitam| vAGmanO'gOcaraM satyaM dvidhA samabhavadbRhat||3|| |
tayOrEkatarO hyarthaH prakRtiH sObhayAtmikA| jJAnaM tvanyatamO bhAvaH puruSaH sO'bhidhIyatE||4|| |
tamO rajaH sattvamiti prakRtErabhavanguNAH| mayA prakSObhyamANAyAH puruSAnumatEna ca||5|| |
tEbhyaH samabhavatsUtraM mahAnsUtrENa saMyutaH| tatO vikurvatO jAtO yO'haGkArO vimOhanaH||6|| |
vaikArikastaijasazca tAmasazcEtyahaM trivRt| tanmAtrEndriyamanasAM kAraNaM cidacinmayaH||7|| |
arthastanmAtrikAjjajJE tAmasAdindriyANi ca| taijasAddEvatA AsannEkAdaza ca vaikRtAt||8|| |
mayA saJcOditA bhAvAH sarvE saMhatyakAriNaH| aNDamutpAdayAmAsurmamAyatanamuttamam||9|| |
tasminnahaM samabhavamaNDE salilasaMsthitau| mama nAbhyAmabhUtpadmaM vizvAkhyaM tatra cAtmabhUH||10|| |
sO'sRjattapasA yuktO rajasA madanugrahAt| lOkAnsapAlAnvizvAtmA bhUrbhuvaH svariti tridhA||11|| |
dEvAnAmOka AsItsvarbhUtAnAM ca bhuvaH padam| martyAdInAM ca bhUrlOkaH siddhAnAM tritayAtparam||12|| |
adhO'surANAM nAgAnAM bhUmErOkO'sRjatprabhuH| trilOkyAM gatayaH sarvAH karmaNAM triguNAtmanAm||13|| |
yOgasya tapasazcaiva nyAsasya gatayO'malAH| maharjanastapaH satyaM bhaktiyOgasya madgatiH||14|| |
mayA kAlAtmanA dhAtrA karmayuktamidaM jagat| guNapravAha Etasminnunmajjati nimajjati||15|| |
aNurbRhatkRzaH sthUlO yO yO bhAvaH prasidhyati| sarvO'pyubhayasaMyuktaH prakRtyA puruSENa ca||16|| |
yastu yasyAdirantazca sa vai madhyaM ca tasya san| vikArO vyavahArArthO yathA taijasapArthivAH||17|| |
yadupAdAya pUrvastu bhAvO vikurutE'param| AdirantO yadA yasya tatsatyamabhidhIyatE||18|| |
prakRtiryasyOpAdAnamAdhAraH puruSaH paraH| satO'bhivyaJjakaH kAlO brahma tattritayaM tvaham||19|| |
sargaH pravartatE tAvatpaurvAparyENa nityazaH| mahAnguNavisargArthaH sthityantO yAvadIkSaNam||20|| |
virANmayAsAdyamAnO lOkakalpavikalpakaH| paJcatvAya vizESAya kalpatE bhuvanaiH saha||21|| |
annE pralIyatE martyamannaM dhAnAsu lIyatE| dhAnA bhUmau pralIyantE bhUmirgandhE pralIyatE||22|| |
apsu pralIyatE gandha Apazca svaguNE rasE| lIyatE jyOtiSi rasO jyOtI rUpE pralIyatE||23|| |
rUpaM vAyau sa ca sparzE lIyatE sO'pi cAmbarE| ambaraM zabdatanmAtra indriyANi svayOniSu||24|| |
yOnirvaikArikE saumya lIyatE manasIzvarE| zabdO bhUtAdimapyEti bhUtAdirmahati prabhuH||25|| |
sa lIyatE mahAnsvESu guNEsu guNavattamaH| tE'vyaktE sampralIyantE tatkAlE lIyatE'vyayE||26|| |
kAlO mAyAmayE jIvE jIva Atmani mayyajE| AtmA kEvala AtmasthO vikalpApAyalakSaNaH||27|| |
EvamanvIkSamANasya kathaM vaikalpikO bhramaH| manasO hRdi tiSThEta vyOmnIvArkOdayE tamaH||28|| |
ESa sAGkhyavidhiH prOktaH saMzayagranthibhEdanaH pratilOmAnulOmAbhyAM parAvaradRza mayA||29|| |
||iti zrImadbhAgavatE mahApurANE pAramahaMsyAM saMhitAyAM EkAdazaskandhE caturviMzO'dhyAyaH||
