From StotraSamhita

EkatriMzO'dhyAyaH

maitrEya uvAca

tata utpannavijJAnA AzvadhOkSajabhASitam| smaranta AtmajE bhAryAM visRjya prAvrajangRhAt||1||

dIkSitA brahmasatrENa sarvabhUtAtmamEdhasA| pratIcyAM dizi vElAyAM siddhO'bhUdyatra jAjaliH||2||

tAnnirjitaprANamanOvacOdRzO jitAsanAnzAntasamAnavigrahAn| parE'malE brahmaNi yOjitAtmanaH surAsurEDyO dadRzE sma nAradaH||3||

tamAgataM ta utthAya praNipatyAbhinandya ca| pUjayitvA yathAdEzaM sukhAsInamathAbruvan||4||

pracEtasa UcuH

svAgataM tE surarSE'dya diSTyA nO darzanaM gataH| tava caGkramaNaM brahmannabhayAya yathA ravEH||5||

yadAdiSTaM bhagavatA zivEnAdhOkSajEna ca| tadgRhESu prasaktAnAM prAyazaH kSapitaM prabhO||6||

tannaH pradyOtayAdhyAtma jJAnaM tattvArthadarzanam| yEnAJjasA tariSyAmO dustaraM bhavasAgaram||7||

maitrEya uvAca

iti pracEtasAM pRSTO bhagavAnnAradO muniH| bhagavatyuttamazlOka AviSTAtmAbravInnRpAn||8||

nArada uvAca

tajjanma tAni karmANi tadAyustanmanO vacaH| nRNAM yEna hi vizvAtmA sEvyatE harirIzvaraH||9||

kiM janmabhistribhirvEha zaukrasAvitrayAjJikaiH| karmabhirvA trayIprOktaiH puMsO'pi vibudhAyuSA||10||

zrutEna tapasA vA kiM vacObhizcittavRttibhiH| buddhyA vA kiM nipuNayA balEnEndriyarAdhasA||11||

kiM vA yOgEna sAGkhyEna nyAsasvAdhyAyayOrapi| kiM vA zrEyObhiranyaizca na yatrAtmapradO hariH||12||

zrEyasAmapi sarvESAmAtmA hyavadhirarthataH| sarvESAmapi bhUtAnAM harirAtmAtmadaH priyaH||13||

yathA tarOrmUlaniSEcanEna tRpyanti tatskandhabhujOpazAkhAH| prANOpahArAcca yathEndriyANAM tathaiva sarvArhaNamacyutEjyA||14||

yathaiva sUryAtprabhavanti vAraH punazca tasminpravizanti kAlE| bhUtAni bhUmau sthirajaGgamAni tathA harAvEva guNapravAhaH||15||

EtatpadaM tajjagadAtmanaH paraM sakRdvibhAtaM savituryathA prabhA| yathAsavO jAgrati suptazaktayO dravyakriyAjJAnabhidAbhramAtyayaH||16||

yathA nabhasyabhratamaHprakAzA bhavanti bhUpA na bhavantyanukramAt| EvaM parE brahmaNi zaktayastvamU rajastamaH sattvamiti pravAhaH||17||

tEnaikamAtmAnamazESadEhinAM kAlaM pradhAnaM puruSaM parEzam| svatEjasA dhvastaguNapravAhamAtmaikabhAvEna bhajadhvamaddhA||18||

dayayA sarvabhUtESu santuSTyA yEna kEna vA| sarvEndriyOpazAntyA ca tuSyatyAzu janArdanaH||19||

apahatasakalaiSaNAmalAtmanyaviratamEdhitabhAvanOpahUtaH| nijajanavazagatvamAtmanO'yanna sarati chidravadakSaraH satAM hi||20||

na bhajati kumanISiNAM sa ijyAM hariradhanAtmadhanapriyO rasajJaH| zrutadhanakulakarmaNAM madairyE vidadhati pApamakiJcanESu satsu||21||

zriyamanucaratIM tadarthinazca dvipadapatInvibudhAMzca yatsvapUrNaH| na bhajati nijabhRtyavargatantraH kathamamumudvisRjEtpumAnkRtajJaH||22||

maitrEya uvAca

iti pracEtasO rAjannanyAzca bhagavatkathAH| zrAvayitvA brahmalOkaM yayau svAyambhuvO muniH||23||

tE'pi tanmukhaniryAtaM yazO lOkamalApaham| harErnizamya tatpAdaM dhyAyantastadgatiM yayuH||24||

EtattE'bhihitaM kSattaryanmAM tvaM paripRSTavAn| pracEtasAM nAradasya saMvAdaM harikIrtanam||25||

zrIzuka uvAca

ya ESa uttAnapadO mAnavasyAnuvarNitaH| vaMzaH priyavratasyApi nibOdha nRpasattama||26||

yO nAradAdAtmavidyAmadhigamya punarmahIm| bhuktvA vibhajya putrEbhya aizvaraM samagAtpadam||27||

imAM tu kauSAraviNOpavarNitAM kSattA nizamyAjitavAdasatkathAm| pravRddhabhAvO'zrukalAkulO munErdadhAra mUrdhnA caraNaM hRdA harEH||28||

vidura uvAca

sO'yamadya mahAyOginbhavatA karuNAtmanA| darzitastamasaH pArO yatrAkiJcanagO hariH||29||

zrIzuka uvAca

ityAnamya tamAmantrya vidurO gajasAhvayam| svAnAM didRkSuH prayayau jJAtInAM nirvRtAzayaH||30||

EtadyaH zRNuyAdrAjanrAjJAM haryarpitAtmanAm AyurdhanaM yazaH svasti gatimaizvaryamApnuyAt||31||

||iti zrImadbhAgavatE mahApurANE pAramahaMsyAM saMhitAyAM caturthaskandhE EkatriMzO'dhyAyaH||

See Also

• http://vedabase.net/sb/4/31/en