From StotraSamhita
< Bhagavatam | Skandha 05
EkAdazO'dhyAyaH
brAhmaNa uvAca
akOvidaH kOvidavAdavAdAnvadasyathO nAtividAM variSThaH| na sUrayO hi vyavahAramEnaM tattvAvamarzEna sahAmananti||1|| |
tathaiva rAjannurugArhamEdha vitAnavidyOruvijRmbhitESu| na vEdavAdESu hi tattvavAdaH prAyENa zuddhO nu cakAsti sAdhuH||2|| |
na tasya tattvagrahaNAya sAkSAdvarIyasIrapi vAcaH samAsan| svapnE niruktyA gRhamEdhisaukhyaM na yasya hEyAnumitaM svayaM syAt||3|| |
yAvanmanO rajasA pUruSasya sattvEna vA tamasA vAnuruddham| cEtObhirAkUtibhirAtanOti niraGkuzaM kuzalaM cEtaraM vA||4|| |
sa vAsanAtmA viSayOparaktO guNapravAhO vikRtaH SODazAtmA| bibhratpRthaGnAmabhi rUpabhEdamantarbahiSTvaM ca puraistanOti||5|| |
duHkhaM sukhaM vyatiriktaM ca tIvraM kAlOpapannaM phalamAvyanakti| AliGgya mAyAracitAntarAtmA svadEhinaM saMsRticakrakUTaH||6|| |
tAvAnayaM vyavahAraH sadAviH kSEtrajJasAkSyO bhavati sthUlasUkSmaH| tasmAnmanO liGgamadO vadanti guNAguNatvasya parAvarasya||7|| |
guNAnuraktaM vyasanAya jantOH kSEmAya nairguNyamathO manaH syAt yathA pradIpO ghRtavartimaznanzikhAH sadhUmA bhajati hyanyadA svam padaM tathA guNakarmAnubaddhaM vRttIrmanaH zrayatE'nyatra tattvam||8|| |
EkAdazAsanmanasO hi vRttaya AkUtayaH paJca dhiyO'bhimAnaH| mAtrANi karmANi puraM ca tAsAM vadanti haikAdaza vIra bhUmIH||9|| |
gandhAkRtisparzarasazravAMsi visargaratyartyabhijalpazilpAH| EkAdazaM svIkaraNaM mamEti zayyAmahaM dvAdazamEka AhuH||10|| |
dravyasvabhAvAzayakarmakAlairEkAdazAmI manasO vikArAH| sahasrazaH zatazaH kOTizazca kSEtrajJatO na mithO na svataH syuH||11|| |
kSEtrajJa EtA manasO vibhUtIrjIvasya mAyAracitasya nityAH| AvirhitAH kvApi tirOhitAzca zuddhO vicaSTE hyavizuddhakartuH||12|| |
kSEtrajJa AtmA puruSaH purANaH sAkSAtsvayaM jyOtirajaH parEzaH| nArAyaNO bhagavAnvAsudEvaH svamAyayAtmanyavadhIyamAnaH||13|| |
yathAnilaH sthAvarajaGgamAnAmAtmasvarUpENa niviSTa IzEt| EvaM parO bhagavAnvAsudEvaH kSEtrajJa AtmEdamanupraviSTaH||14|| |
na yAvadEtAM tanubhRnnarEndra vidhUya mAyAM vayunOdayEna| vimuktasaGgO jitaSaTsapatnO vEdAtmatattvaM bhramatIha tAvat||15|| |
na yAvadEtanmana AtmaliGgaM saMsAratApAvapanaM janasya| yacchOkamOhAmayarAgalObha vairAnubandhaM mamatAM vidhattE||16|| |
bhrAtRvyamEnaM tadadabhravIryamupEkSayAdhyEdhitamapramattaH gurOrharEzcaraNOpAsanAstrO jahi vyalIkaM svayamAtmamOSam||17|| |
||iti zrImadbhAgavatE mahApurANE pAramahaMsyAM saMhitAyAM paJcamaskandhE EkAdazO'dhyAyaH||
