From StotraSamhita
< Bhagavatam | Skandha 01
SODazO'dhyAyaH
sUta uvAca
tataH parIkSiddvijavaryazikSayA mahIM mahAbhAgavataH zazAsa ha| yathA hi sUtyAmabhijAtakOvidAH samAdizanvipra mahadguNastathA||1|| |
sa uttarasya tanayAmupayEma irAvatIm| janamEjayAdIMzcaturastasyAmutpAdayatsutAn||2|| |
AjahArAzvamEdhAMstrIngaGgAyAM bhUridakSiNAn| zAradvataM guruM kRtvA dEvA yatrAkSigOcarAH||3|| |
nijagrAhaujasA vIraH kaliM digvijayE kvacit| nRpaliGgadharaM zUdraM ghnantaM gOmithunaM padA||4|| |
zaunaka uvAca
kasya hEtOrnijagrAha kaliM digvijayE nRpaH nRdEvacihnadhRkSUdra kO'sau gAM yaH padAhanat tatkathyatAM mahAbhAga yadi kRSNakathAzrayam||5|| |
athavAsya padAmbhOja makarandalihAM satAm| kimanyairasadAlApairAyuSO yadasadvyayaH||6|| |
kSudrAyuSAM nRNAmaGga martyAnAmRtamicchatAm| ihOpahUtO bhagavAnmRtyuH zAmitrakarmaNi||7|| |
na kazcinmriyatE tAvadyAvadAsta ihAntakaH EtadarthaM hi bhagavAnAhUtaH paramarSibhiH ahO nRlOkE pIyEta harilIlAmRtaM vacaH||8|| |
mandasya mandaprajJasya vayO mandAyuSazca vai| nidrayA hriyatE naktaM divA ca vyarthakarmabhiH||9|| |
sUta uvAca
yadA parIkSitkurujAGgalE'vasatkaliM praviSTaM nijacakravartitE| nizamya vArtAmanatipriyAM tataH zarAsanaM saMyugazauNDirAdadE||10|| |
svalaGkRtaM zyAmaturaGgayOjitaM rathaM mRgEndradhvajamAzritaH purAt| vRtO rathAzvadvipapattiyuktayA svasEnayA digvijayAya nirgataH||11|| |
bhadrAzvaM kEtumAlaM ca bhArataM cOttarAnkurUn| kimpuruSAdIni varSANi vijitya jagRhE balim||12|| |
nagarAMzca vanAMzcaiva nadIzca vimalOdakAH| puruSAndEvakalpAMzca nArIzca priyadarzanAH||13|| |
adRSTapUrvAnsubhagAnsa dadarza dhanaJjayaH| sadanAni ca zubhrANi nArIzcApsarasAM nibhAH||14|| |
tatra tatrOpazRNvAnaH svapUrvESAM mahAtmanAm| pragIyamANaM ca yazaH kRSNamAhAtmyasUcakam||15|| |
AtmAnaM ca paritrAtamazvatthAmnO'stratEjasaH| snEhaM ca vRSNipArthAnAM tESAM bhaktiM ca kEzavE||16|| |
tEbhyaH paramasantuSTaH prItyujjRmbhitalOcanaH| mahAdhanAni vAsAMsi dadau hArAnmahAmanAH||17|| |
sArathyapAraSadasEvanasakhyadautya vIrAsanAnugamanastavanapraNAmAn| snigdhESu pANDuSu jagatpraNatiM ca viSNOr bhaktiM karOti nRpatizcaraNAravindE||18|| |
tasyaivaM vartamAnasya pUrvESAM vRttimanvaham| nAtidUrE kilAzcaryaM yadAsIttannibOdha mE||19|| |
dharmaH padaikEna caranvicchAyAmupalabhya gAm| pRcchati smAzruvadanAM vivatsAmiva mAtaram||20|| |
dharma uvAca
kaccidbhadrE'nAmayamAtmanastE vicchAyAsi mlAyatESanmukhEna| AlakSayE bhavatImantarAdhiM dUrE bandhuM zOcasi kaJcanAmba||21|| |
pAdairnyUnaM zOcasi maikapAdamAtmAnaM vA vRSalairbhOkSyamANam| AhO surAdInhRtayajJabhAgAnprajA uta svinmaghavatyavarSati||22|| |
arakSyamANAH striya urvi bAlAnzOcasyathO puruSAdairivArtAn| vAcaM dEvIM brahmakulE kukarmaNyabrahmaNyE rAjakulE kulAgryAn||23|| |
kiM kSatrabandhUnkalinOpasRSTAnrASTrANi vA tairavarOpitAni| itastatO vAzanapAnavAsaH snAnavyavAyOnmukhajIvalOkam||24|| |
yadvAmba tE bhUribharAvatAra kRtAvatArasya harErdharitri| antarhitasya smaratI visRSTA karmANi nirvANavilambitAni||25|| |
idaM mamAcakSva tavAdhimUlaM vasundharE yEna vikarzitAsi| kAlEna vA tE balinAM balIyasA surArcitaM kiM hRtamamba saubhagam||26|| |
dharaNyuvAca
bhavAnhi vEda tatsarvaM yanmAM dharmAnupRcchasi| caturbhirvartasE yEna pAdairlOkasukhAvahaiH||27|| |
satyaM zaucaM dayA kSAntistyAgaH santOSa Arjavam| zamO damastapaH sAmyaM titikSOparatiH zrutam||28|| |
jJAnaM viraktiraizvaryaM zauryaM tEjO balaM smRtiH| svAtantryaM kauzalaM kAntirdhairyaM mArdavamEva ca||29|| |
prAgalbhyaM prazrayaH zIlaM saha OjO balaM bhagaH| gAmbhIryaM sthairyamAstikyaM kIrtirmAnO'nahaGkRtiH||30|| |
EtE cAnyE ca bhagavannityA yatra mahAguNAH| prArthyA mahattvamicchadbhirna viyanti sma karhicit||31|| |
tEnAhaM guNapAtrENa zrInivAsEna sAmpratam| zOcAmi rahitaM lOkaM pApmanA kalinEkSitam||32|| |
AtmAnaM cAnuzOcAmi bhavantaM cAmarOttamam| dEvAnpitRRnRSInsAdhUnsarvAnvarNAMstathAzramAn||33|| |
brahmAdayO bahutithaM yadapAGgamOkSa kAmAstapaH samacaranbhagavatprapannAH| sA zrIH svavAsamaravindavanaM vihAya yatpAdasaubhagamalaM bhajatE'nuraktA||34|| |
tasyAhamabjakulizAGkuzakEtukEtaiH zrImatpadairbhagavataH samalaGkRtAGgI| trInatyarOca upalabhya tatO vibhUtiM lOkAnsa mAM vyasRjadutsmayatIM tadantE||35|| |
yO vai mamAtibharamAsuravaMzarAjJAm akSauhiNIzatamapAnudadAtmatantraH| tvAM duHsthamUnapadamAtmani pauruSENa sampAdayanyaduSu ramyamabibhradaGgam||36|| |
kA vA sahEta virahaM puruSOttamasya prEmAvalOkarucirasmitavalgujalpaiH| sthairyaM samAnamaharanmadhumAninInAM rOmOtsavO mama yadaGghriviTaGkitAyAH||37|| |
tayOrEvaM kathayatOH pRthivIdharmayOstadA parIkSinnAma rAjarSiH prAptaH prAcIM sarasvatIm||38|| |
||iti zrImadbhAgavatE mahApurANE pAramahaMsyAM saMhitAyAM prathamaskandhE SODazO'dhyAyaH||
