From StotraSamhita
< Bhagavatam | Skandha 06
EkAdazO'dhyAyaH
zrIzuka uvAca
ta EvaM zaMsatO dharmaM vacaH patyuracEtasaH| naivAgRhNanta sambhrAntAH palAyanaparA nRpa||1|| |
vizIryamANAM pRtanAmAsurImasurarSabhaH| kAlAnukUlaistridazaiH kAlyamAnAmanAthavat||2|| |
dRSTvAtapyata saGkruddha indrazatruramarSitaH| tAnnivAryaujasA rAjannirbhartsyEdamuvAca ha||3|| |
kiM va uccaritairmAturdhAvadbhiH pRSThatO hataiH| na hi bhItavadhaH zlAghyO na svargyaH zUramAninAm||4|| |
yadi vaH pradhanE zraddhA sAraM vA kSullakA hRdi| agrE tiSThata mAtraM mE na cEdgrAmyasukhE spRhA||5|| |
EvaM suragaNAnkruddhO bhISayanvapuSA ripUn| vyanadatsumahAprANO yEna lOkA vicEtasaH||6|| |
tEna dEvagaNAH sarvE vRtravisphOTanEna vai| nipEturmUrcchitA bhUmau yathaivAzaninA hatAH||7|| |
mamarda padbhyAM surasainyamAturaM nimIlitAkSaM raNaraGgadurmadaH| gAM kampayannudyatazUla OjasA nAlaM vanaM yUthapatiryathOnmadaH||8|| |
vilOkya taM vajradharO'tyamarSitaH svazatravE'bhidravatE mahAgadAm| cikSEpa tAmApatatIM suduHsahAM jagrAha vAmEna karENa lIlayA||9|| |
sa indrazatruH kupitO bhRzaM tayA mahEndravAhaM gadayOruvikramaH| jaghAna kumbhasthala unnadanmRdhE tatkarma sarvE samapUjayannRpa||10|| |
airAvatO vRtragadAbhimRSTO vighUrNitO'driH kulizAhatO yathA| apAsaradbhinnamukhaH sahEndrO muJcannasRksaptadhanurbhRzArtaH||11|| |
na sannavAhAya viSaNNacEtasE prAyuGkta bhUyaH sa gadAM mahAtmA| indrO'mRtasyandikarAbhimarza vItavyathakSatavAhO'vatasthE||12|| |
sa taM nRpEndrAhavakAmyayA ripuM vajrAyudhaM bhrAtRhaNaM vilOkya| smaraMzca tatkarma nRzaMsamaMhaH zOkEna mOhEna hasanjagAda||13|| |
zrIvRtra uvAca
diSTyA bhavAnmE samavasthitO ripuryO brahmahA guruhA bhrAtRhA ca| diSTyAnRNO'dyAhamasattama tvayA macchUlanirbhinnadRSaddhRdAcirAt||14|| |
yO nO'grajasyAtmavidO dvijAtErgurOrapApasya ca dIkSitasya| vizrabhya khaDgEna zirAMsyavRzcatpazOrivAkaruNaH svargakAmaH||15|| |
zrIhrIdayAkIrtibhirujjhitaM tvAM svakarmaNA puruSAdaizca garhyam| kRcchrENa macchUlavibhinnadEhamaspRSTavahniM samadanti gRdhrAH||16|| |
anyE'nu yE tvEha nRzaMsamajJA yadudyatAstrAH praharanti mahyam| tairbhUtanAthAnsagaNAnnizAta trizUlanirbhinnagalairyajAmi||17|| |
athO harE mE kulizEna vIra hartA pramathyaiva zirO yadIha| tatrAnRNO bhUtabaliM vidhAya manasvinAM pAdarajaH prapatsyE||18|| |
surEza kasmAnna hinOSi vajraM puraH sthitE vairiNi mayyamOgham| mA saMzayiSThA na gadEva vajraH syAnniSphalaH kRpaNArthEva yAcJA||19|| |
nanvESa vajrastava zakra tEjasA harErdadhIcEstapasA ca tEjitaH| tEnaiva zatruM jahi viSNuyantritO yatO harirvijayaH zrIrguNAstataH||20|| |
ahaM samAdhAya manO yathAha naH saGkarSaNastaccaraNAravindE| tvadvajraraMhOlulitagrAmyapAzO gatiM munEryAmyapaviddhalOkaH||21|| |
puMsAM kilaikAntadhiyAM svakAnAM yAH sampadO divi bhUmau rasAyAm| na rAti yaddvESa udvEga AdhirmadaH kalirvyasanaM samprayAsaH||22|| |
traivargikAyAsavighAtamasmatpatirvidhattE puruSasya zakra| tatO'numEyO bhagavatprasAdO yO durlabhO'kiJcanagOcarO'nyaiH||23|| |
ahaM harE tava pAdaikamUla dAsAnudAsO bhavitAsmi bhUyaH| manaH smarEtAsupatErguNAMstE gRNIta vAkkarma karOtu kAyaH||24|| |
na nAkapRSThaM na ca pAramESThyaM na sArvabhaumaM na rasAdhipatyam| na yOgasiddhIrapunarbhavaM vA samaJjasa tvA virahayya kAGkSE||25|| |
ajAtapakSA iva mAtaraM khagAH stanyaM yathA vatsatarAH kSudhArtAH| priyaM priyEva vyuSitaM viSaNNA manO'ravindAkSa didRkSatE tvAm||26|| |
mamOttamazlOkajanESu sakhyaM saMsAracakrE bhramataH svakarmabhiH tvanmAyayAtmAtmajadAragEhESvAsaktacittasya na nAtha bhUyAt||27|| |
||iti zrImadbhAgavatE mahApurANE pAramahaMsyAM saMhitAyAM SaSThaskandhE EkAdazO'dhyAyaH||
