dazamO'dhyAyaH

khaTvAGgAddIrghabAhuzca raghustasmAtpRthuzravAH|
ajastatO mahArAjastasmAddazarathO'bhavat||1||

tasyApi bhagavAnESa sAkSAdbrahmamayO hariH
aMzAMzEna caturdhAgAtputratvaM prArthitaH suraiH
rAmalakSmaNabharata zatrughnA iti saMjJayA||2||

tasyAnucaritaM rAjannRSibhistattvadarzibhiH|
zrutaM hi varNitaM bhUri tvayA sItApatErmuhuH||3||

gurvarthE tyaktarAjyO vyacaradanuvanaM padmapadbhyAM priyAyAH
pANisparzAkSamAbhyAM mRjitapatharujO yO harIndrAnujAbhyAm|
vairUpyAcchUrpaNakhyAH priyaviraharuSArOpitabhrUvijRmbha
trastAbdhirbaddhasEtuH khaladavadahanaH kOsalEndrO'vatAnnaH||4||

vizvAmitrAdhvarE yEna mArIcAdyA nizAcarAH|
pazyatO lakSmaNasyaiva hatA nairRtapuGgavAH||5||

yO lOkavIrasamitau dhanuraizamugraM
sItAsvayaMvaragRhE trizatOpanItam|
AdAya bAlagajalIla ivEkSuyaSTiM
sajjyIkRtaM nRpa vikRSya babhaJja madhyE||6||

jitvAnurUpaguNazIlavayO'GgarUpAM
sItAbhidhAM zriyamurasyabhilabdhamAnAm|
mArgE vrajanbhRgupatErvyanayatprarUDhaM
darpaM mahImakRta yastrirarAjabIjAm||7||

yaH satyapAzaparivItapiturnidEzaM
straiNasya cApi zirasA jagRhE sabhAryaH|
rAjyaM zriyaM praNayinaH suhRdO nivAsaM
tyaktvA yayau vanamasUniva muktasaGgaH||8||

rakSaHsvasurvyakRta rUpamazuddhabuddhEs
tasyAH kharatriziradUSaNamukhyabandhUn|
jaghnE caturdazasahasramapAraNIya
kOdaNDapANiraTamAna uvAsa kRcchram||9||

sItAkathAzravaNadIpitahRcchayEna
sRSTaM vilOkya nRpatE dazakandharENa|
jaghnE'dbhutaiNavapuSAzramatO'pakRSTO
mArIcamAzu vizikhEna yathA kamugraH||10||

rakSO'dhamEna vRkavadvipinE'samakSaM
vaidEharAjaduhitaryapayApitAyAm|
bhrAtrA vanE kRpaNavatpriyayA viyuktaH
strIsaGginAM gatimiti prathayaMzcacAra||11||

dagdhvAtmakRtyahatakRtyamahankabandhaM
sakhyaM vidhAya kapibhirdayitAgatiM taiH|
buddhvAtha vAlini hatE plavagEndrasainyair
vElAmagAtsa manujO'jabhavArcitAGghriH||12||

yadrOSavibhramavivRttakaTAkSapAta
sambhrAntanakramakarO bhayagIrNaghOSaH|
sindhuH zirasyarhaNaM parigRhya rUpI
pAdAravindamupagamya babhASa Etat||13||

na tvAM vayaM jaDadhiyO nu vidAma bhUman
kUTasthamAdipuruSaM jagatAmadhIzam|
yatsattvataH suragaNA rajasaH prajEzA
manyOzca bhUtapatayaH sa bhavAnguNEzaH||14||

kAmaM prayAhi jahi vizravasO'vamEhaM
trailOkyarAvaNamavApnuhi vIra patnIm|
badhnIhi sEtumiha tE yazasO vitatyai
gAyanti digvijayinO yamupEtya bhUpAH||15||

baddhvOdadhau raghupatirvividhAdrikUTaiH
sEtuM kapIndrakarakampitabhUruhAGgaiH|
sugrIvanIlahanumatpramukhairanIkair
laGkAM vibhISaNadRzAvizadagradagdhAm||16||

sA vAnarEndrabalaruddhavihArakOSTha
zrIdvAragOpurasadOvalabhIviTaGkA|
nirbhajyamAnadhiSaNadhvajahEmakumbha
zRGgATakA gajakulairhradinIva ghUrNA||17||

rakSaHpatistadavalOkya nikumbhakumbha
dhUmrAkSadurmukhasurAntakanarAntakAdIn|
putraM prahastamatikAyavikampanAdIn
sarvAnugAnsamahinOdatha kumbhakarNam||18||

tAM yAtudhAnapRtanAmasizUlacApa
prAsarSTizaktizaratOmarakhaDgadurgAm|
sugrIvalakSmaNamarutsutagandhamAda
nIlAGgadarkSapanasAdibhiranvitO'gAt||19||

tE'nIkapA raghupatErabhipatya sarvE
dvandvaM varUthamibhapattirathAzvayOdhaiH|
jaghnurdrumairgirigadESubhiraGgadAdyAH
sItAbhimarSahatamaGgalarAvaNEzAn||20||

rakSaHpatiH svabalanaSTimavEkSya ruSTa
Aruhya yAnakamathAbhisasAra rAmam|
svaHsyandanE dyumati mAtalinOpanItE
vibhrAjamAnamahanannizitaiH kSurapraiH||21||

rAmastamAha puruSAdapurISa yannaH
kAntAsamakSamasatApahRtA zvavattE|
tyaktatrapasya phalamadya jugupsitasya
yacchAmi kAla iva karturalaGghyavIryaH||22||

EvaM kSipandhanuSi sandhitamutsasarja
bANaM sa vajramiva taddhRdayaM bibhEda|
sO'sRgvamandazamukhairnyapatadvimAnAd
dhAhEti jalpati janE sukRtIva riktaH||23||

tatO niSkramya laGkAyA yAtudhAnyaH sahasrazaH|
mandOdaryA samaM tatra prarudantya upAdravan||24||

svAnsvAnbandhUnpariSvajya lakSmaNESubhirarditAn|
ruruduH susvaraM dInA ghnantya AtmAnamAtmanA||25||

hA hatAH sma vayaM nAtha lOkarAvaNa rAvaNa|
kaM yAyAccharaNaM laGkA tvadvihInA parArditA||26||

na vai vEda mahAbhAga bhavAnkAmavazaM gataH|
tEjO'nubhAvaM sItAyA yEna nItO dazAmimAm||27||

kRtaiSA vidhavA laGkA vayaM ca kulanandana|
dEhaH kRtO'nnaM gRdhrANAmAtmA narakahEtavE||28||

svAnAM vibhISaNazcakrE kOsalEndrAnumOditaH|
pitRmEdhavidhAnEna yaduktaM sAmparAyikam||29||

tatO dadarza bhagavAnazOkavanikAzramE|
kSAmAM svavirahavyAdhiM ziMzapAmUlamAzritAm||30||

rAmaH priyatamAM bhAryAM dInAM vIkSyAnvakampata|
AtmasandarzanAhlAda vikasanmukhapaGkajAm||31||

ArOpyAruruhE yAnaM bhrAtRbhyAM hanumadyutaH|
vibhISaNAya bhagavAndattvA rakSOgaNEzatAm||32||

laGkAmAyuzca kalpAntaM yayau cIrNavrataH purIm|
avakIryamANaH sukusumairlOkapAlArpitaiH pathi||33||

upagIyamAnacaritaH zatadhRtyAdibhirmudA|
gOmUtrayAvakaM zrutvA bhrAtaraM valkalAmbaram||34||

mahAkAruNikO'tapyajjaTilaM sthaNDilEzayam|
bharataH prAptamAkarNya paurAmAtyapurOhitaiH||35||

pAdukE zirasi nyasya rAmaM pratyudyatO'grajam|
nandigrAmAtsvazibirAdgItavAditraniHsvanaiH||36||

brahmaghOSENa ca muhuH paThadbhirbrahmavAdibhiH|
svarNakakSapatAkAbhirhaimaizcitradhvajai rathaiH||37||

sadazvai rukmasannAhairbhaTaiH puraTavarmabhiH|
zrENIbhirvAramukhyAbhirbhRtyaizcaiva padAnugaiH||38||

pAramESThyAnyupAdAya paNyAnyuccAvacAni ca|
pAdayOrnyapatatprEmNA praklinnahRdayEkSaNaH||39||

pAdukE nyasya purataH prAJjalirbASpalOcanaH|
tamAzliSya ciraM dOrbhyAM snApayannEtrajairjalaiH||40||

rAmO lakSmaNasItAbhyAM viprEbhyO yE'rhasattamAH|
tEbhyaH svayaM namazcakrE prajAbhizca namaskRtaH||41||

dhunvanta uttarAsaGgAnpatiM vIkSya cirAgatam|
uttarAH kOsalA mAlyaiH kirantO nanRturmudA||42||

pAdukE bharatO'gRhNAccAmaravyajanOttamE|
vibhISaNaH sasugrIvaH zvEtacchatraM marutsutaH||43||

dhanurniSaGgAnchatrughnaH sItA tIrthakamaNDalum|
abibhradaGgadaH khaDgaM haimaM carmarkSarANnRpa||44||

puSpakasthO nutaH strIbhiH stUyamAnazca vandibhiH|
virEjE bhagavAnrAjangrahaizcandra ivOditaH||45||

bhrAtrAbhinanditaH sO'tha sOtsavAM prAvizatpurIm|
pravizya rAjabhavanaM gurupatnIH svamAtaram||46||

gurUnvayasyAvarajAnpUjitaH pratyapUjayat|
vaidEhI lakSmaNazcaiva yathAvatsamupEyatuH||47||

putrAnsvamAtarastAstu prANAMstanva ivOtthitAH|
ArOpyAGkE'bhiSiJcantyO bASpaughairvijahuH zucaH||48||

jaTA nirmucya vidhivatkulavRddhaiH samaM guruH|
abhyaSiJcadyathaivEndraM catuHsindhujalAdibhiH||49||

EvaM kRtaziraHsnAnaH suvAsAH sragvyalaGkRtaH|
svalaGkRtaiH suvAsObhirbhrAtRbhirbhAryayA babhau||50||

agrahIdAsanaM bhrAtrA praNipatya prasAditaH
prajAH svadharmaniratA varNAzramaguNAnvitAH
jugOpa pitRvadrAmO mEnirE pitaraM ca tam||51||

trEtAyAM vartamAnAyAM kAlaH kRtasamO'bhavat|
rAmE rAjani dharmajJE sarvabhUtasukhAvahE||52||

vanAni nadyO girayO varSANi dvIpasindhavaH|
sarvE kAmadughA AsanprajAnAM bharatarSabha||53||

nAdhivyAdhijarAglAni duHkhazOkabhayaklamAH|
mRtyuzcAnicchatAM nAsIdrAmE rAjanyadhOkSajE||54||

EkapatnIvratadharO rAjarSicaritaH zuciH|
svadharmaM gRhamEdhIyaM zikSayansvayamAcarat||55||

prEmNAnuvRttyA zIlEna prazrayAvanatA satI|
bhiyA hriyA ca bhAvajJA bhartuH sItAharanmanaH||56||