From StotraSamhita
< Bhagavatam | Skandha 03
paJcadazO'dhyAyaH
maitrEya uvAca
prAjApatyaM tu tattEjaH paratEjOhanaM ditiH| dadhAra varSANi zataM zaGkamAnA surArdanAt||1|| |
lOkE tEnAhatAlOkE lOkapAlA hataujasaH| nyavEdayanvizvasRjE dhvAntavyatikaraM dizAm||2|| |
dEvA UcuH
tama EtadvibhO vEttha saMvignA yadvayaM bhRzam| na hyavyaktaM bhagavataH kAlEnAspRSTavartmanaH||3|| |
dEvadEva jagaddhAtarlOkanAthazikhAmaNE| parESAmaparESAM tvaM bhUtAnAmasi bhAvavit||4|| |
namO vijJAnavIryAya mAyayEdamupEyuSE| gRhItaguNabhEdAya namastE'vyaktayOnayE||5|| |
yE tvAnanyEna bhAvEna bhAvayantyAtmabhAvanam| Atmani prOtabhuvanaM paraM sadasadAtmakam||6|| |
tESAM supakvayOgAnAM jitazvAsEndriyAtmanAm| labdhayuSmatprasAdAnAM na kutazcitparAbhavaH||7|| |
yasya vAcA prajAH sarvA gAvastantyEva yantritAH| haranti balimAyattAstasmai mukhyAya tE namaH||8|| |
sa tvaM vidhatsva zaM bhUmaMstamasA luptakarmaNAm| adabhradayayA dRSTyA ApannAnarhasIkSitum||9|| |
ESa dEva ditErgarbha OjaH kAzyapamarpitam| dizastimirayansarvA vardhatE'gnirivaidhasi||10|| |
maitrEya uvAca
sa prahasya mahAbAhO bhagavAnzabdagOcaraH| pratyAcaSTAtmabhUrdEvAnprINanrucirayA girA||11|| |
brahmOvAca
mAnasA mE sutA yuSmat pUrvajAH sanakAdayaH| cErurvihAyasA lOkAllOkESu vigataspRhAH||12|| |
ta EkadA bhagavatO vaikuNThasyAmalAtmanaH| yayurvaikuNThanilayaM sarvalOkanamaskRtam||13|| |
vasanti yatra puruSAH sarvE vaikuNThamUrtayaH| yE'nimittanimittEna dharmENArAdhayanharim||14|| |
yatra cAdyaH pumAnAstE bhagavAnzabdagOcaraH| sattvaM viSTabhya virajaM svAnAM nO mRDayanvRSaH||15|| |
yatra naiHzrEyasaM nAma vanaM kAmadughairdrumaiH| sarvartuzrIbhirvibhrAjatkaivalyamiva mUrtimat||16|| |
vaimAnikAH salalanAzcaritAni zazvad gAyanti yatra zamalakSapaNAni bhartuH| antarjalE'nuvikasanmadhumAdhavInAM gandhEna khaNDitadhiyO'pyanilaM kSipantaH||17|| |
pArAvatAnyabhRtasArasacakravAka dAtyUhahaMsazukatittiribarhiNAM yaH| kOlAhalO viramatE'ciramAtramuccair bhRGgAdhipE harikathAmiva gAyamAnE||18|| |
mandArakundakurabOtpalacampakArNa punnAganAgabakulAmbujapArijAtAH| gandhE'rcitE tulasikAbharaNEna tasyA yasmiMstapaH sumanasO bahu mAnayanti||19|| |
yatsaGkulaM haripadAnatimAtradRSTair vaidUryamArakatahEmamayairvimAnaiH| yESAM bRhatkaTitaTAH smitazObhimukhyaH kRSNAtmanAM na raja AdadhurutsmayAdyaiH||20|| |
zrI rUpiNI kvaNayatI caraNAravindaM lIlAmbujEna harisadmani muktadOSA| saMlakSyatE sphaTikakuDya upEtahEmni sammArjatIva yadanugrahaNE'nyayatnaH||21|| |
vApISu vidrumataTAsvamalAmRtApsu prESyAnvitA nijavanE tulasIbhirIzam| abhyarcatI svalakamunnasamIkSya vaktram ucchESitaM bhagavatEtyamatAGga yacchrIH||22|| |
yanna vrajantyaghabhidO racanAnuvAdAc chRNvanti yE'nyaviSayAH kukathA matighnIH| yAstu zrutA hatabhagairnRbhirAttasArAs tAMstAnkSipantyazaraNESu tamaHsu hanta||23|| |
yE'bhyarthitAmapi ca nO nRgatiM prapannA jJAnaM ca tattvaviSayaM sahadharmaM yatra| nArAdhanaM bhagavatO vitarantyamuSya sammOhitA vitatayA bata mAyayA tE||24|| |
yacca vrajantyanimiSAmRSabhAnuvRttyA dUrE yamA hyupari naH spRhaNIyazIlAH| bharturmithaH suyazasaH kathanAnurAga vaiklavyabASpakalayA pulakIkRtAGgAH||25|| |
tadvizvagurvadhikRtaM bhuvanaikavandyaM divyaM vicitravibudhAgryavimAnazOciH| ApuH parAM mudamapUrvamupEtya yOga mAyAbalEna munayastadathO vikuNTham||26|| |
tasminnatItya munayaH SaDasajjamAnAH kakSAH samAnavayasAvatha saptamAyAm| dEvAvacakSata gRhItagadau parArdhya kEyUrakuNDalakirITaviTaGkavESau||27|| |
mattadvirEphavanamAlikayA nivItau vinyastayAsitacatuSTayabAhumadhyE| vaktraM bhruvA kuTilayA sphuTanirgamAbhyAM raktEkSaNEna ca manAgrabhasaM dadhAnau||28|| |
dvAryEtayOrnivivizurmiSatOrapRSTvA pUrvA yathA puraTavajrakapATikA yAH| sarvatra tE'viSamayA munayaH svadRSTyA yE saJcarantyavihatA vigatAbhizaGkAH||29|| |
tAnvIkSya vAtarazanAMzcaturaH kumArAn vRddhAndazArdhavayasO viditAtmatattvAn| vEtrENa cAskhalayatAmatadarhaNAMstau tEjO vihasya bhagavatpratikUlazIlau||30|| |
tAbhyAM miSatsvanimiSESu niSidhyamAnAH svarhattamA hyapi harEH pratihArapAbhyAm| UcuH suhRttamadidRkSitabhaGga ISat kAmAnujEna sahasA ta upaplutAkSAH||31|| |
munaya UcuH
kO vAmihaitya bhagavatparicaryayOccais taddharmiNAM nivasatAM viSamaH svabhAvaH| tasminprazAntapuruSE gatavigrahE vAM kO vAtmavatkuhakayOH parizaGkanIyaH||32|| |
na hyantaraM bhagavatIha samastakukSAv AtmAnamAtmani nabhO nabhasIva dhIrAH| pazyanti yatra yuvayOH suraliGginOH kiM vyutpAditaM hyudarabhEdi bhayaM yatO'sya||33|| |
tadvAmamuSya paramasya vikuNThabhartuH kartuM prakRSTamiha dhImahi mandadhIbhyAm| lOkAnitO vrajatamantarabhAvadRSTyA pApIyasastraya imE ripavO'sya yatra||34|| |
tESAmitIritamubhAvavadhArya ghOraM taM brahmadaNDamanivAraNamastrapUgaiH| sadyO harEranucarAvuru bibhyatastat pAdagrahAvapatatAmatikAtarENa||35|| |
bhUyAdaghOni bhagavadbhirakAri daNDO yO nau harEta surahElanamapyazESam| mA vO'nutApakalayA bhagavatsmRtighnO mOhO bhavEdiha tu nau vrajatOradhO'dhaH||36|| |
EvaM tadaiva bhagavAnaravindanAbhaH svAnAM vibudhya sadatikramamAryahRdyaH| tasminyayau paramahaMsamahAmunInAm anvESaNIyacaraNau calayansahazrIH||37|| |
taM tvAgataM pratihRtaupayikaM svapumbhis tE'cakSatAkSaviSayaM svasamAdhibhAgyam| haMsazriyOrvyajanayOH zivavAyulOlac chubhrAtapatrazazikEsarazIkarAmbum||38|| |
kRtsnaprasAdasumukhaM spRhaNIyadhAma snEhAvalOkakalayA hRdi saMspRzantam| zyAmE pRthAvurasi zObhitayA zriyA svaz cUDAmaNiM subhagayantamivAtmadhiSNyam||39|| |
pItAMzukE pRthunitambini visphurantyA kAJcyAlibhirvirutayA vanamAlayA ca| valguprakOSThavalayaM vinatAsutAMsE vinyastahastamitarENa dhunAnamabjam||40|| |
vidyutkSipanmakarakuNDalamaNDanArha gaNDasthalOnnasamukhaM maNimatkirITam| dOrdaNDaSaNDavivarE haratA parArdhya hArENa kandharagatEna ca kaustubhEna||41|| |
atrOpasRSTamiti cOtsmitamindirAyAH svAnAM dhiyA viracitaM bahusauSThavADhyam| mahyaM bhavasya bhavatAM ca bhajantamaGgaM nEmurnirIkSya na vitRptadRzO mudA kaiH||42|| |
tasyAravindanayanasya padAravinda kiJjalkamizratulasImakarandavAyuH| antargataH svavivarENa cakAra tESAM saGkSObhamakSarajuSAmapi cittatanvOH||43|| |
tE vA amuSya vadanAsitapadmakOzam udvIkSya sundaratarAdharakundahAsam| labdhAziSaH punaravEkSya tadIyamaGghri dvandvaM nakhAruNamaNizrayaNaM nidadhyuH||44|| |
puMsAM gatiM mRgayatAmiha yOgamArgair dhyAnAspadaM bahumataM nayanAbhirAmam| pauMsnaM vapurdarzayAnamananyasiddhair autpattikaiH samagRNanyutamaSTabhOgaiH||45|| |
kumArA UcuH
yO'ntarhitO hRdi gatO'pi durAtmanAM tvaM sO'dyaiva nO nayanamUlamananta rAddhaH| yarhyEva karNavivarENa guhAM gatO naH pitrAnuvarNitarahA bhavadudbhavEna||46|| |
taM tvAM vidAma bhagavanparamAtmatattvaM sattvEna samprati ratiM racayantamESAm| yattE'nutApaviditairdRDhabhaktiyOgair udgranthayO hRdi vidurmunayO virAgAH||47|| |
nAtyantikaM vigaNayantyapi tE prasAdaM kimvanyadarpitabhayaM bhruva unnayaistE| yE'Gga tvadaGghrizaraNA bhavataH kathAyAH kIrtanyatIrthayazasaH kuzalA rasajJAH||48|| |
kAmaM bhavaH svavRjinairnirayESu naH stAc cEtO'livadyadi nu tE padayO ramEta| vAcazca nastulasivadyadi tE'GghrizObhAH pUryEta tE guNagaNairyadi karNarandhraH||49|| |
prAduzcakartha yadidaM puruhUta rUpaM tEnEza nirvRtimavApuralaM dRzO naH tasmA idaM bhagavatE nama idvidhEma yO'nAtmanAM durudayO bhagavAnpratItaH||50|| |
||iti zrImadbhAgavatE mahApurANE pAramahaMsyAM saMhitAyAM tRtIyaskandhE paJcadazO'dhyAyaH||
