From StotraSamhita
< Bhagavatam | Skandha 10
aSTapaJcAzattamO'dhyAyaH
zrIzuka uvAca
EkadA pANDavAndraSTuM pratItAnpuruSOttamaH| indraprasthaM gataH zRImAnyuyudhAnAdibhirvRtaH||1|| |
dRSTvA tamAgataM pArthA mukundamakhilEzvaram| uttasthuryugapadvIrAH prANA mukhyamivAgatam||2|| |
pariSvajyAcyutaM vIrA aGgasaGgahatainasaH| sAnurAgasmitaM vaktraM vIkSya tasya mudaM yayuH||3|| |
yudhiSThirasya bhImasya kRtvA pAdAbhivandanam| phAlgunaM parirabhyAtha yamAbhyAM cAbhivanditaH||4|| |
paramAsana AsInaM kRSNA kRSNamaninditA| navODhA vrIDitA kiJcicchanairEtyAbhyavandata||5|| |
tathaiva sAtyakiH pArthaiH pUjitazcAbhivanditaH| niSasAdAsanE'nyE ca pUjitAH paryupAsata||6|| |
pRthAmsamAgatya kRtAbhivAdanastayAtihArdArdradRzAbhirambhitaH| ApRSTavAMstAM kuzalaM sahasnuSAM pitRSvasAramparipRSTabAndhavaH||7|| |
tamAha prEmavaiklavya ruddhakaNThAzrulOcanA| smarantI tAnbahUnklEzAnklEzApAyAtmadarzanam||8|| |
tadaiva kuzalaM nO'bhUtsanAthAstE kRtA vayam| jJatInnaH smaratA kRSNa bhrAtA mE prESitastvayA||9|| |
na tE'sti svaparabhrAntirvizvasya suhRdAtmanaH| tathApi smaratAM zazvatklEzAnhaMsi hRdi sthitaH||10|| |
yudhiSThira uvAca
kiM na AcaritaM zrEyO na vEdAhamadhIzvara| yOgEzvarANAM durdarzO yannO dRSTaH kumEdhasAm||11|| |
iti vai vArSikAnmAsAnrAjJA sO'bhyarthitaH sukham| janayannayanAnandamindraprasthaukasAM vibhuH||12|| |
EkadA rathamAruhya vijayO vAnaradhvajam| gANDIvaM dhanurAdAya tUNau cAkSayasAyakau||13|| |
sAkaM kRSNEna sannaddhO vihartuM vipinaM mahat| bahuvyAlamRgAkIrNaM prAvizatparavIrahA||14|| |
tatrAvidhyaccharairvyAghrAnzUkarAnmahiSAnrurUn| zarabhAngavayAnkhaDgAnhariNAnzazazallakAn||15|| |
tAnninyuH kiGkarA rAjJE mEdhyAnparvaNyupAgatE| tRTparItaH parizrAntO bibhatsuryamunAmagAt||16|| |
tatrOpaspRzya vizadaM pItvA vAri mahArathau| kRSNau dadRzatuH kanyAM carantIM cArudarzanAm||17|| |
tAmAsAdya varArOhAM sudvijAM rucirAnanAm| papraccha prESitaH sakhyA phAlgunaH pramadOttamAm||18|| |
kA tvaM kasyAsi suzrONi kutO vA kiM cikIrSasi| manyE tvAM patimicchantIM sarvaM kathaya zObhanE||19|| |
zrIkAlindyuvAca
ahaM dEvasya saviturduhitA patimicchatI| viSNuM varENyaM varadaM tapaH paramamAsthitaH||20|| |
nAnyaM patiM vRNE vIra tamRtE zrInikEtanam| tuSyatAM mE sa bhagavAnmukundO'nAthasaMzrayaH||21|| |
kAlindIti samAkhyAtA vasAmi yamunAjalE| nirmitE bhavanE pitrA yAvadacyutadarzanam||22|| |
tathAvadadguDAkEzO vAsudEvAya sO'pi tAm| rathamArOpya tadvidvAndharmarAjamupAgamat||23|| |
yadaiva kRSNaH sandiSTaH pArthAnAM paramAdbutam| kArayAmAsa nagaraM vicitraM vizvakarmaNA||24|| |
bhagavAMstatra nivasansvAnAM priyacikIrSayA| agnayE khANDavaM dAtumarjunasyAsa sArathiH||25|| |
sO'gnistuSTO dhanuradAddhayAnzvEtAnrathaM nRpa| arjunAyAkSayau tUNau varma cAbhEdyamastribhiH||26|| |
mayazca mOcitO vahnEH sabhAM sakhya upAharat| yasminduryOdhanasyAsIjjalasthaladRzibhramaH||27|| |
sa tEna samanujJAtaH suhRdbhizcAnumOditaH| Ayayau dvArakAM bhUyaH sAtyakipramakhairvRtaH||28|| |
athOpayEmE kAlindIM supuNyartvRkSa UrjitE| vitanvanparamAnandaM svAnAM paramamaGgalaH||29|| |
vindyAnuvindyAvAvantyau duryOdhanavazAnugau| svayaMvarE svabhaginIM kRSNE saktAM nyaSEdhatAm||30|| |
rAjAdhidEvyAstanayAM mitravindAM pitRSvasuH| prasahya hRtavAnkRSNO rAjanrAjJAM prapazyatAm||31|| |
nagnajinnAma kauzalya AsIdrAjAtidhArmikaH| tasya satyAbhavatkanyA dEvI nAgnajitI nRpa||32|| |
na tAM zEkurnRpA vODhumajitvA saptagOvRSAn| tIkSNazRGgAnsudurdharSAnvIryagandhAsahAnkhalAn||33|| |
tAM zrutvA vRSajillabhyAM bhagavAnsAtvatAM patiH| jagAma kauzalyapuraM sainyEna mahatA vRtaH||34|| |
sa kOzalapatiH prItaH pratyutthAnAsanAdibhiH| arhaNEnApi guruNA pUjayanpratinanditaH||35|| |
varaM vilOkyAbhimataM samAgataM narEndrakanyA cakamE ramApatim| bhUyAdayaM mE patirAziSO'nalaH karOtu satyA yadi mE dhRtO vrataH||36|| |
yatpAdapaGkajarajaH zirasA bibharti zRIrabyajaH sagirizaH saha lOkapAlaiH| lIlAtanuH svakRtasEtuparIpsayA yaH kAlE'dadhatsa bhagavAnmama kEna tuSyEt||37|| |
arcitaM punarityAha nArAyaNa jagatpatE| AtmAnandEna pUrNasya karavANi kimalpakaH||38|| |
zrIzuka uvAca
tamAha bhagavAnhRSTaH kRtAsanaparigrahaH| mEghagambhIrayA vAcA sasmitaM kurunandana||39|| |
zrIbhagavAnuvAca
narEndra yAcJA kavibhirvigarhitA rAjanyabandhOrnijadharmavartinaH| tathApi yAcE tava sauhRdEcchayA kanyAM tvadIyAM na hi zulkadA vayam||40|| |
zrIrAjOvAca
kO'nyastE'bhyadhikO nAtha kanyAvara ihEpsitaH| guNaikadhAmnO yasyAGgE zrIrvasatyanapAyinI||41|| |
kintvasmAbhiH kRtaH pUrvaM samayaH sAtvatarSabha| puMsAM vIryaparIkSArthaM kanyAvaraparIpsayA||42|| |
saptaitE gOvRSA vIra durdAntA duravagrahAH| EtairbhagnAH subahavO bhinnagAtrA nRpAtmajAH||43|| |
yadimE nigRhItAH syustvayaiva yadunandana| varO bhavAnabhimatO duhiturmE zriyaHpatE||44|| |
EvaM samayamAkarNya baddhvA parikaraM prabhuH| AtmAnaM saptadhA kRtvA nyagRhNAllIlayaiva tAn||45|| |
baddhvA tAndAmabhiH zaurirbhagnadarpAnhataujasaH| vyakarsallIlayA baddhAnbAlO dArumayAnyathA||46|| |
tataH prItaH sutAM rAjA dadau kRSNAya vismitaH| tAM pratyagRhNAdbhagavAnvidhivatsadRzIM prabhuH||47|| |
rAjapatnyazca duhituH kRSNaM labdhvA priyaM patim| lEbhirE paramAnandaM jAtazca paramOtsavaH||48|| |
zaGkhabhEryAnakA nEdurgItavAdyadvijAziSaH| narA nAryaH pramuditAH suvAsaHsragalaGkRtAH||49|| |
dazadhEnusahasrANi pAribarhamadAdvibhuH| yuvatInAM trisAhasraM niSkagrIvasuvAsasam||50|| |
navanAgasahasrANi nAgAcchataguNAnrathAn| rathAcchataguNAnazvAnazvAcchataguNAnnarAn||51|| |
dampatI rathamArOpya mahatyA sEnayA vRtau| snEhapraklinnahRdayO yApayAmAsa kOzalaH||52|| |
zrutvaitadrurudhurbhUpA nayantaM pathi kanyakAm| bhagnavIryAH sudurmarSA yadubhirgOvRSaiH purA||53|| |
tAnasyataH zaravrAtAnbandhupriyakRdarjunaH| gANDIvI kAlayAmAsa siMhaH kSudramRgAniva||54|| |
pAribarhamupAgRhya dvArakAmEtya satyayA| rEmE yadUnAmRSabhO bhagavAndEvakIsutaH||55|| |
zrutakIrtEH sutAM bhadrAm upayEmE pitRSvasuH| kaikEyIM bhrAtRbhirdattAM kRSNaH santardanAdibhiH||56|| |
sutAM ca madrAdhipatErlakSmaNAM lakSaNairyatAm| svayaMvarE jahAraikaH sa suparNaH sudhAmiva||57|| |
anyAzcaivaMvidhA bhAryAH kRSNasyAsansahasrazaH bhaumaM hatvA tannirOdhAdAhRtAzcArudarzanAH||58|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE aSTapaJcAzattamO'dhyAyaH||
