From StotraSamhita

SaTpaJcAzattamO'dhyAyaH

zrIzuka uvAca

satrAjitaH svatanayAM kRSNAya kRtakilbiSaH| syamantakEna maNinA svayamudyamya dattavAn||1||

zrIrAjOvAca

satrAjitaH kimakarOdbrahmankRSNasya kilbiSaH| syamantakaH kutastasya kasmAddattA sutA harEH||2||

zrIzuka uvAca

AsItsatrAjitaH sUryO bhaktasya paramaH sakhA| prItastasmai maNiM prAdAtsa ca tuSTaH syamantakam||3||

sa taM bibhranmaNiM kaNThE bhrAjamAnO yathA raviH| praviSTO dvArakAM rAjantEjasA nOpalakSitaH||4||

taM vilOkya janA dUrAttEjasA muSTadRSTayaH| dIvyatE'kSairbhagavatE zazaMsuH sUryazaGkitAH||5||

nArAyaNa namastE'stu zaGkhacakragadAdhara| dAmOdarAravindAkSa gOvinda yadunandana||6||

ESa AyAti savitA tvAM didRkSurjagatpatE| muSNangabhasticakrENa nRNAM cakSUMSi tigmaguH||7||

nanvanvicchanti tE mArgaM trIlOkyAM vibudharSabhAH| jJAtvAdya gUDhaM yaduSu draSTuM tvAM yAtyajaH prabhO||8||

zrIzuka uvAca

nizamya bAlavacanaM prahasyAmbujalOcanaH| prAha nAsau ravirdEvaH satrAjinmaNinA jvalan||9||

satrAjitsvagRhaM zrImatkRtakautukamaGgalam| pravizya dEvasadanE maNiM viprairnyavEzayat||10||

dinE dinE svarNabhArAnaSTau sa sRjati prabhO durbhikSamAryariSTAni sarpAdhivyAdhayO'zubhAH na santi mAyinastatra yatrAstE'bhyarcitO maNiH||11||

sa yAcitO maNiM kvApi yadurAjAya zauriNA| naivArthakAmukaH prAdAdyAcJAbhaGgamatarkayan||12||

tamEkadA maNiM kaNThE pratimucya mahAprabham| prasEnO hayamAruhya mRgAyAM vyacaradvanE||13||

prasEnaM sahayaM hatvA maNimAcchidya kEzarI| giriM vizanjAmbavatA nihatO maNimicchatA||14||

sO'pi cakrE kumArasya maNiM krIDanakaM bilE| apazyanbhrAtaraM bhrAtA satrAjitparyatapyata||15||

prAyaH kRSNEna nihatO maNigrIvO vanaM gataH| bhrAtA mamEti tacchrutvA karNE karNE'japanjanAH||16||

bhagavAMstadupazrutya duryazO liptamAtmani| mArSTuM prasEnapadavImanvapadyata nAgaraiH||17||

hataM prasEnam azvaM ca vIkSya kEzariNA vanE| taM cAdripRSThE nihatamRkSENa dadRzurjanAH||18||

RkSarAjabilaM bhImamandhEna tamasAvRtam| EkO vivEza bhagavAnavasthApya bahiH prajAH||19||

tatra dRSTvA maNiprESThaM bAlakrIDanakaM kRtam| hartuM kRtamatistasminnavatasthE'rbhakAntikE||20||

tamapUrvaM naraM dRSTvA dhAtrI cukrOza bhItavat| tacchrutvAbhyadravatkruddhO jAmbavAnbalinAM varaH||21||

sa vai bhagavatA tEna yuyudhE svAmInAtmanaH| puruSamprAkRtaM matvA kupitO nAnubhAvavit||22||

dvandvayuddhaM sutumulamubhayOrvijigISatOH| AyudhAzmadrumairdOrbhiH kravyArthE zyEnayOriva||23||

AsIttadaSTAvimzAhamitarEtaramuSTibhiH| vajraniSpESaparuSairavizramamaharnizam||24||

kRSNamuSTiviniSpAta niSpiSTAGgOru bandhanaH| kSINasattvaH svinnagAtrastamAhAtIva vismitaH||25||

jAnE tvAM saRvabhUtAnAM prANa OjaH sahO balam| viSNuM purANapuruSaM prabhaviSNumadhIzvaram||26||

tvaM hi vizvasRjAmsraSTA sRSTAnAmapi yacca sat| kAlaH kalayatAmIzaH para AtmA tathAtmanAm||27||

yasyESadutkalitarOSakaTAkSamOkSair vartmAdizatkSubhitanakratimiGgalO'bdhiH| sEtuH kRtaH svayaza ujjvalitA ca laGkA rakSaHzirAMsi bhuvi pEturiSukSatAni||28||

iti vijJAtavIjJAnamRkSarAjAnamacyutaH| vyAjahAra mahArAja bhagavAndEvakIsutaH||29||

abhimRzyAravindAkSaH pANinA zaGkarENa tam| kRpayA parayA bhaktaM mEghagambhIrayA girA||30||

maNihEtOriha prAptA vayamRkSapatE bilam| mithyAbhizApaM pramRjannAtmanO maNinAmunA||31||

ityuktaH svAM duhitaraM kanyAM jAmbavatIM mudA| arhaNArthamsa maNinA kRSNAyOpajahAra ha||32||

adRSTvA nirgamaM zaurEH praviSTasya bilaM janAH| pratIkSya dvAdazAhAni duHkhitAH svapuraM yayuH||33||

nizamya dEvakI dEvI rakmiNyAnakadundubhiH| suhRdO jJAtayO'zOcanbilAtkRSNamanirgatam||34||

satrAjitaM zapantastE duHkhitA dvArakaukasaH| upatasthuzcandrabhAgAM durgAM kRSNOpalabdhayE||35||

tESAM tu dEvyupasthAnAtpratyAdiSTAziSA sa ca| prAdurbabhUva siddhArthaH sadArO harSayanhariH||36||

upalabhya hRSIkEzaM mRtaM punarivAgatam| saha patnyA maNigrIvaM sarvE jAtamahOtsavAH||37||

satrAjitaM samAhUya sabhAyAM rAjasannidhau| prAptiM cAkhyAya bhagavAnmaNiM tasmai nyavEdayat||38||

sa cAtivrIDitO ratnaM gRhItvAvAGmukhastataH| anutapyamAnO bhavanamagamatsvEna pApmanA||39||

sO'nudhyAyaMstadEvAghaM balavadvigrahAkulaH| kathaM mRjAmyAtmarajaH prasIdEdvAcyutaH katham||40||

kimkRtvA sAdhu mahyaM syAnna zapEdvA janO yathA| adIrghadarzanaM kSudraM mUDhaM draviNalOlupam||41||

dAsyE duhitaraM tasmai strIratnaM ratnamEva ca| upAyO'yaM samIcInastasya zAntirna cAnyathA||42||

EvaM vyavasitO buddhyA satrAjitsvasutAM zubhAm| maNiM ca svayamudyamya kRSNAyOpajahAra ha||43||

tAM satyabhAmAM bhagavAnupayEmE yathAvidhi| bahubhiryAcitAM zIla rUpaudAryaguNAnvitAm||44||

bhagavAnAha na maNiM pratIcchAmO vayaM nRpa tavAstAM dEvabhaktasya vayaM ca phalabhAginaH||45||

||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE SaTpaJcAzattamO'dhyAyaH||

See Also

• http://vedabase.net/sb/10/56/en