From StotraSamhita

paJcadazO'dhyAyaH

zrIrAjOvAca

balEH padatrayaM bhUmEH kasmAddharirayAcata| bhUtEzvaraH kRpaNavallabdhArthO'pi babandha tam||1||

EtadvEditumicchAmO mahatkautUhalaM hi naH| yajJEzvarasya pUrNasya bandhanaM cApyanAgasaH||2||

zrIzuka uvAca

parAjitazrIrasubhizca hApitO hIndrENa rAjanbhRgubhiH sa jIvitaH| sarvAtmanA tAnabhajadbhRgUnbaliH ziSyO mahAtmArthanivEdanEna||3||

taM brAhmaNA bhRgavaH prIyamANA ayAjayanvizvajitA triNAkam| jigISamANaM vidhinAbhiSicya mahAbhiSEkENa mahAnubhAvAH||4||

tatO rathaH kAJcanapaTTanaddhO hayAzca haryazvaturaGgavarNAH| dhvajazca siMhEna virAjamAnO hutAzanAdAsa havirbhiriSTAt||5||

dhanuzca divyaM puraTOpanaddhaM tUNAvariktau kavacaM ca divyam| pitAmahastasya dadau ca mAlAmamlAnapuSpAM jalajaM ca zukraH||6||

EvaM sa viprArjitayOdhanArthastaiH kalpitasvastyayanO'tha viprAn| pradakSiNIkRtya kRtapraNAmaH prahrAdamAmantrya namazcakAra||7||

athAruhya rathaM divyaM bhRgudattaM mahArathaH| susragdharO'tha sannahya dhanvI khaDgI dhRtESudhiH||8||

hEmAGgadalasadbAhuH sphuranmakarakuNDalaH| rarAja rathamArUDhO dhiSNyastha iva havyavAT||9||

tulyaizvaryabalazrIbhiH svayUthairdaityayUthapaiH| pibadbhiriva khaM dRgbhirdahadbhiH paridhIniva||10||

vRtO vikarSanmahatImAsurIM dhvajinIM vibhuH| yayAvindrapurIM svRddhAM kampayanniva rOdasI||11||

ramyAmupavanOdyAnaiH zrImadbhirnandanAdibhiH| kUjadvihaGgamithunairgAyanmattamadhuvrataiH||12||

pravAlaphalapuSpOru bhArazAkhAmaradrumaiH haMsasArasacakrAhva kAraNDavakulAkulAH nalinyO yatra krIDanti pramadAH surasEvitAH||13||

AkAzagaGgayA dEvyA vRtAM parikhabhUtayA| prAkArENAgnivarNEna sATTAlEnOnnatEna ca||14||

rukmapaTTakapATaizca dvAraiH sphaTikagOpuraiH| juSTAM vibhaktaprapathAM vizvakarmavinirmitAm||15||

sabhAcatvararathyADhyAM vimAnairnyarbudairyutAm| zRGgATakairmaNimayairvajravidrumavEdibhiH||16||

yatra nityavayOrUpAH zyAmA virajavAsasaH| bhrAjantE rUpavannAryO hyarcirbhiriva vahnayaH||17||

surastrIkEzavibhraSTa navasaugandhikasrajAm| yatrAmOdamupAdAya mArga AvAti mArutaH||18||

hEmajAlAkSanirgacchaddhUmEnAgurugandhinA| pANDurENa praticchanna mArgE yAnti surapriyAH||19||

muktAvitAnairmaNihEmakEtubhirnAnApatAkAvalabhIbhirAvRtAm| zikhaNDipArAvatabhRGganAditAM vaimAnikastrIkalagItamaGgalAm||20||

mRdaGgazaGkhAnakadundubhisvanaiH satAlavINAmurajESTavENubhiH| nRtyaiH savAdyairupadEvagItakairmanOramAM svaprabhayA jitaprabhAm||21||

yAM na vrajantyadharmiSThAH khalA bhUtadruhaH zaThAH| mAninaH kAminO lubdhA EbhirhInA vrajanti yat||22||

tAM dEvadhAnIM sa varUthinIpatirbahiH samantAdrurudhE pRtanyayA| AcAryadattaM jalajaM mahAsvanaM dadhmau prayuJjanbhayamindrayOSitAm||23||

maghavAMstamabhiprEtya balEH paramamudyamam| sarvadEvagaNOpEtO gurumEtaduvAca ha||24||

bhagavannudyamO bhUyAnbalErnaH pUrvavairiNaH| aviSahyamimaM manyE kEnAsIttEjasOrjitaH||25||

nainaM kazcitkutO vApi prativyODhumadhIzvaraH pibanniva mukhEnEdaM lihanniva dizO daza dahanniva dizO dRgbhiH saMvartAgnirivOtthitaH||26||

brUhi kAraNamEtasya durdharSatvasya madripOH| OjaH sahO balaM tEjO yata EtatsamudyamaH||27||

zrIgururuvAca

jAnAmi maghavanchatrOrunnatErasya kAraNam| ziSyAyOpabhRtaM tEjO bhRgubhirbrahmavAdibhiH||28||

OjasvinaM baliM jEtuM na samarthO'sti kazcana| bhavadvidhO bhavAnvApi varjayitvEzvaraM harim||29||

vijESyati na kO'pyEnaM brahmatEjaHsamEdhitam| nAsya zaktaH puraH sthAtuM kRtAntasya yathA janAH||30||

tasmAnnilayamutsRjya yUyaM sarvE triviSTapam| yAta kAlaM pratIkSantO yataH zatrOrviparyayaH||31||

ESa viprabalOdarkaH sampratyUrjitavikramaH| tESAmEvApamAnEna sAnubandhO vinaGkSyati||32||

EvaM sumantritArthAstE guruNArthAnudarzinA| hitvA triviSTapaM jagmurgIrvANAH kAmarUpiNaH||33||

dEvESvatha nilInESu balirvairOcanaH purIm| dEvadhAnImadhiSThAya vazaM ninyE jagattrayam||34||

taM vizvajayinaM ziSyaM bhRgavaH ziSyavatsalAH| zatEna hayamEdhAnAmanuvratamayAjayan||35||

tatastadanubhAvEna bhuvanatrayavizrutAm| kIrtiM dikSuvitanvAnaH sa rEja uDurADiva||36||

bubhujE ca zriyaM svRddhAM dvijadEvOpalambhitAm kRtakRtyamivAtmAnaM manyamAnO mahAmanAH||37||

||iti zrImadbhAgavatE mahApurANE pAramahaMsyAM saMhitAyAM aSTamaskandhE paJcadazO'dhyAyaH||

See Also

• http://vedabase.net/sb/8/15/en