Jump to: navigation, search

EkOnaviMzO'dhyAyaH

zrIzuka uvAca

krIDAsaktESu gOpESu tadgAvO dUracAriNIH|
svairaM carantyO vivizustRNalObhEna gahvaram||1||

ajA gAvO mahiSyazca nirvizantyO vanAdvanam|
ISIkATavIM nirvivizuH krandantyO dAvatarSitAH||2||

tE'pazyantaH pazUngOpAH kRSNarAmAdayastadA|
jAtAnutApA na vidurvicinvantO gavAM gatim||3||

tRNaistatkhuradacchinnairgOSpadairaGkitairgavAm|
mArgamanvagamansarvE naSTAjIvyA vicEtasaH||4||

muJjATavyAM bhraSTamArgaM krandamAnaM svagOdhanam|
samprApya tRSitAH zrAntAstatastE sannyavartayan||5||

tA AhUtA bhagavatA mEghagambhIrayA girA|
svanAmnAM ninadaM zrutvA pratinEduH praharSitAH||6||

tataH samantAddavadhUmakEturyadRcchayAbhUtkSayakRdvanaukasAm|
samIritaH sArathinOlbaNOlmukairvilElihAnaH sthirajaGgamAnmahAn||7||

tamApatantaM paritO davAgniM gOpAzca gAvaH prasamIkSya bhItAH|
Ucuzca kRSNaM sabalaM prapannA yathA hariM mRtyubhayArditA janAH||8||

kRSNa kRSNa mahAvIra hE rAmAmOgha vikrama|
dAvAgninA dahyamAnAnprapannAMstrAtumarhathaH||9||

nUnaM tvadbAndhavAH kRSNa na cArhantyavasAditum|
vayaM hi sarvadharmajJa tvannAthAstvatparAyaNAH||10||

zrIzuka uvAca

vacO nizamya kRpaNaM bandhUnAM bhagavAnhariH|
nimIlayata mA bhaiSTa lOcanAnItyabhASata||11||

tathEti mIlitAkSESu bhagavAnagnimulbaNam|
pItvA mukhEna tAnkRcchrAdyOgAdhIzO vyamOcayat||12||

tatazca tE'kSINyunmIlya punarbhANDIramApitAH|
nizamya vismitA AsannAtmAnaM gAzca mOcitAH||13||

kRSNasya yOgavIryaM tadyOgamAyAnubhAvitam|
dAvAgnErAtmanaH kSEmaM vIkSya tE mEnirE'maram||14||

gAH sannivartya sAyAhnE saharAmO janArdanaH|
vENuM viraNayangOSThamagAdgOpairabhiSTutaH||15||

gOpInAM paramAnanda AsIdgOvindadarzanE
kSaNaM yugazatamiva yAsAM yEna vinAbhavat||16||

||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE EkOnaviMzO'dhyAyaH||

See Also