From StotraSamhita
< Bhagavatam | Skandha 10
paJcamO'dhyAyaH
zrIzuka uvAca
nandastvAtmaja utpannE jAtAhlAdO mahAmanAH| AhUya viprAnvEdajJAnsnAtaH zuciralaGkRtaH||1|| |
vAcayitvA svastyayanaM jAtakarmAtmajasya vai| kArayAmAsa vidhivatpitRdEvArcanaM tathA||2|| |
dhEnUnAM niyutE prAdAdviprEbhyaH samalaGkRtE| tilAdrInsapta ratnaugha zAtakaumbhAmbarAvRtAn||3|| |
kAlEna snAnazaucAbhyAM saMskAraistapasEjyayA| zudhyanti dAnaiH santuSTyA dravyANyAtmAtmavidyayA||4|| |
saumaGgalyagirO viprAH sUtamAgadhavandinaH| gAyakAzca jagurnEdurbhEryO dundubhayO muhuH||5|| |
vrajaH sammRSTasaMsikta dvArAjiragRhAntaraH| citradhvajapatAkAsrak cailapallavatOraNaiH||6|| |
gAvO vRSA vatsatarA haridrAtailarUSitAH| vicitradhAtubarhasrag vastrakAJcanamAlinaH||7|| |
mahArhavastrAbharaNa kaJcukOSNISabhUSitAH| gOpAH samAyayU rAjannAnOpAyanapANayaH||8|| |
gOpyazcAkarNya muditA yazOdAyAH sutOdbhavam| AtmAnaM bhUSayAM cakrurvastrAkalpAJjanAdibhiH||9|| |
navakuGkumakiJjalka mukhapaGkajabhUtayaH| balibhistvaritaM jagmuH pRthuzrONyazcalatkucAH||10|| |
gOpyaH sumRSTamaNikuNDalaniSkakaNThyaz citrAmbarAH pathi zikhAcyutamAlyavarSAH| nandAlayaM savalayA vrajatIrvirEjur vyAlOlakuNDalapayOdharahArazObhAH||11|| |
tA AziSaH prayuJjAnAzciraM pAhIti bAlakE| haridrAcUrNatailAdbhiH siJcantyO'janamujjaguH||12|| |
avAdyanta vicitrANi vAditrANi mahOtsavE| kRSNE vizvEzvarE'nantE nandasya vrajamAgatE||13|| |
gOpAH parasparaM hRSTA dadhikSIraghRtAmbubhiH| AsiJcantO vilimpantO navanItaizca cikSipuH||14|| |
nandO mahAmanAstEbhyO vAsO'laGkAragOdhanam| sUtamAgadhavandibhyO yE'nyE vidyOpajIvinaH||15|| |
taistaiH kAmairadInAtmA yathOcitamapUjayat| viSNOrArAdhanArthAya svaputrasyOdayAya ca||16|| |
rOhiNI ca mahAbhAgA nandagOpAbhinanditA| vyacaraddivyavAsasrak kaNThAbharaNabhUSitA||17|| |
tata Arabhya nandasya vrajaH sarvasamRddhimAn| harErnivAsAtmaguNai ramAkrIDamabhUnnRpa||18|| |
gOpAngOkularakSAyAM nirUpya mathurAM gataH| nandaH kaMsasya vArSikyaM karaM dAtuM kurUdvaha||19|| |
vasudEva upazrutya bhrAtaraM nandamAgatam| jJAtvA dattakaraM rAjJE yayau tadavamOcanam||20|| |
taM dRSTvA sahasOtthAya dEhaH prANamivAgatam| prItaH priyatamaM dOrbhyAM sasvajE prEmavihvalaH||21|| |
pUjitaH sukhamAsInaH pRSTvAnAmayamAdRtaH| prasaktadhIH svAtmajayOridamAha vizAmpatE||22|| |
diSTyA bhrAtaH pravayasa idAnImaprajasya tE| prajAzAyA nivRttasya prajA yatsamapadyata||23|| |
diSTyA saMsAracakrE'sminvartamAnaH punarbhavaH| upalabdhO bhavAnadya durlabhaM priyadarzanam||24|| |
naikatra priyasaMvAsaH suhRdAM citrakarmaNAm| OghEna vyUhyamAnAnAM plavAnAM srOtasO yathA||25|| |
kaccitpazavyaM nirujaM bhUryambutRNavIrudham| bRhadvanaM tadadhunA yatrAssE tvaM suhRdvRtaH||26|| |
bhrAtarmama sutaH kaccinmAtrA saha bhavadvrajE| tAtaM bhavantaM manvAnO bhavadbhyAmupalAlitaH||27|| |
puMsastrivargO vihitaH suhRdO hyanubhAvitaH| na tESu klizyamAnESu trivargO'rthAya kalpatE||28|| |
zrInanda uvAca
ahO tE dEvakIputrAH kaMsEna bahavO hatAH| EkAvaziSTAvarajA kanyA sApi divaM gatA||29|| |
nUnaM hyadRSTaniSThO'yamadRSTaparamO janaH| adRSTamAtmanastattvaM yO vEda na sa muhyati||30|| |
zrIvasudEva uvAca
karO vai vArSikO dattO rAjJE dRSTA vayaM ca vaH| nEha sthEyaM bahutithaM santyutpAtAzca gOkulE||31|| |
zrIzuka uvAca
iti nandAdayO gOpAH prOktAstE zauriNA yayuH anObhiranaDudyuktaistamanujJApya gOkulam||32|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE paJcamO'dhyAyaH||
