dazamO'dhyAyaH

atha sindhusauvIrapatE rahUgaNasya vrajata ikSumatyAstaTE tatkulapatinA zibikAvAha
puruSAnvESaNasamayE daivEnOpasAditaH sa dvijavara upalabdha ESa pIvA yuvA saMhananAGgO gO
kharavaddhuraM vODhumalamiti pUrvaviSTigRhItaiH saha gRhItaH prasabhamatadarha uvAha zibikAM sa
mahAnubhAvaH||1||

yadA hi dvijavarasyESumAtrAvalOkAnugatErna samAhitA puruSagatistadA viSamagatAM svazibikAM
rahUgaNa upadhArya puruSAnadhivahata Aha hE vODhAraH sAdhvatikramata kimiti viSamamuhyatE yAnamiti||2||

atha ta IzvaravacaH sOpAlambhamupAkarNyOpAyaturIyAcchaGkitamanasastaM vijJApayAM
babhUvuH||3||

na vayaM naradEva pramattA bhavanniyamAnupathAH sAdhvEva vahAmaH ayamadhunaiva niyuktO
'pi na drutaM vrajati nAnEna saha vODhumu ha vayaM pArayAma iti||4||

sAMsargikO dOSa Eva nUnamEkasyApi sarvESAM sAMsargikANAM bhavitumarhatIti nizcitya nizamya
kRpaNavacO rAjA rahUgaNa upAsitavRddhO'pi nisargENa balAtkRta ISadutthitamanyuravispaSTabrahma
tEjasaM jAtavEdasamiva rajasAvRtamatirAha||5||

ahO kaSTaM bhrAtarvyaktamuruparizrAntO dIrghamadhvAnamEka Eva UhivAnsuciraM nAtipIvA na
saMhananAGgO jarasA cOpadrutO bhavAnsakhE nO EvApara EtE saGghaTTina iti bahuvipralabdhO'pyavidyayA
racitadravyaguNakarmAzayasvacaramakalEvarE'vastuni saMsthAnavizESE'haM mamEtyanadhyArOpita
mithyApratyayO brahmabhUtastUSNIM zibikAM pUrvavaduvAha||6||

atha punaH svazibikAyAM viSamagatAyAM prakupita uvAca rahUgaNaH kimidamarE tvaM jIvanmRtO
mAM kadarthIkRtya bhartRzAsanamaticarasi pramattasya ca tE karOmi cikitsAM daNDapANiriva janatAyA yathA
prakRtiM svAM bhajiSyasa iti||7||

EvaM bahvabaddhamapi bhASamANaM naradEvAbhimAnaM rajasA tamasAnuviddhEna madEna
tiraskRtAzESabhagavatpriyanikEtaM paNDitamAninaM sa bhagavAnbrAhmaNO brahmabhUtasarvabhUta
suhRdAtmA yOgEzvaracaryAyAM nAtivyutpannamatiM smayamAna iva vigatasmaya idamAha||8||

tvayOditaM vyaktamavipralabdhaM bhartuH sa mE syAdyadi vIra bhAraH|
ganturyadi syAdadhigamyamadhvA pIvEti rAzau na vidAM pravAdaH||9||

sthaulyaM kArzyaM vyAdhaya Adhayazca kSuttRDbhayaM kaliricchA jarA ca|
nidrA ratirmanyurahaM madaH zucO dEhEna jAtasya hi mE na santi||10||

jIvanmRtatvaM niyamEna rAjanAdyantavadyadvikRtasya dRSTam|
svasvAmyabhAvO dhruva IDya yatra tarhyucyatE'sau vidhikRtyayOgaH||11||

vizESabuddhErvivaraM manAkca pazyAma yanna vyavahAratO'nyat|
ka Izvarastatra kimIzitavyaM tathApi rAjankaravAma kiM tE||12||

unmattamattajaDavatsvasaMsthAM gatasya mE vIra cikitsitEna|
arthaH kiyAnbhavatA zikSitEna stabdhapramattasya ca piSTapESaH||13||

EtAvadanuvAdaparibhASayA pratyudIrya munivara upazamazIla uparatAnAtmyanimitta upabhOgEna
karmArabdhaM vyapanayanrAjayAnamapi tathOvAha||14||

sa cApi pANDavEya sindhusauvIrapatistattvajijJAsAyAM samyak
zraddhayAdhikRtAdhikArastaddhRdayagranthimOcanaM dvijavaca Azrutya bahuyOgagranthasammataM
tvarayAvaruhya zirasA pAdamUlamupasRtaH kSamApayanvigatanRpadEvasmaya uvAca||15||

kastvaM nigUDhazcarasi dvijAnAM bibharSi sUtraM katamO'vadhUtaH|
kasyAsi kutratya ihApi kasmAtkSEmAya nazcEdasi nOta zuklaH||16||

nAhaM vizaGkE surarAjavajrAnna tryakSazUlAnna yamasya daNDAt|
nAgnyarkasOmAnilavittapAstrAcchaGkE bhRzaM brahmakulAvamAnAt||17||

tadbrUhyasaGgO jaDavannigUDha vijJAnavIryO vicarasyapAraH|
vacAMsi yOgagrathitAni sAdhO na naH kSamantE manasApi bhEttum||18||

ahaM ca yOgEzvaramAtmatattva vidAM munInAM paramaM guruM vai|
praSTuM pravRttaH kimihAraNaM tatsAkSAddhariM jJAnakalAvatIrNam||19||

sa vai bhavA lOkanirIkSaNArthamavyaktaliGgO vicaratyapi svit|
yOgEzvarANAM gatimandhabuddhiH kathaM vicakSIta gRhAnubandhaH||20||

dRSTaH zramaH karmata AtmanO vai bharturganturbhavatazcAnumanyE|
yathAsatOdAnayanAdyabhAvAtsamUla iSTO vyavahAramArgaH||21||

sthAlyagnitApAtpayasO'bhitApastattApatastaNDulagarbharandhiH|
dEhEndriyAsvAzayasannikarSAttatsaMsRtiH puruSasyAnurOdhAt||22||

zAstAbhigOptA nRpatiH prajAnAM yaH kiGkarO vai na pinaSTi piSTam|
svadharmamArAdhanamacyutasya yadIhamAnO vijahAtyaghaugham||23||

tanmE bhavAnnaradEvAbhimAna madEna tucchIkRtasattamasya|
kRSISTa maitrIdRzamArtabandhO yathA tarE sadavadhyAnamaMhaH||24||

na vikriyA vizvasuhRtsakhasya sAmyEna vItAbhimatEstavApi
mahadvimAnAtsvakRtAddhi mAdRGnaGkSyatyadUrAdapi zUlapANiH||25||