From StotraSamhita
< Bhagavatam | Skandha 10
dazamO'dhyAyaH
zrIrAjOvAca
kathyatAM bhagavannEtattayOH zApasya kAraNam| yattadvigarhitaM karma yEna vA dEvarSEstamaH||1|| |
zrIzuka uvAca
rudrasyAnucarau bhUtvA sudRptau dhanadAtmajau| kailAsOpavanE ramyE mandAkinyAM madOtkaTau||2|| |
vAruNIM madirAM pItvA madAghUrNitalOcanau| strIjanairanugAyadbhizcEratuH puSpitE vanE||3|| |
antaH pravizya gaGgAyAmambhOjavanarAjini| cikrIDaturyuvatibhirgajAviva karENubhiH||4|| |
yadRcchayA ca dEvarSirbhagavAMstatra kaurava| apazyannAradO dEvau kSIbANau samabudhyata||5|| |
taM dRSTvA vrIDitA dEvyO vivastrAH zApazaGkitAH| vAsAMsi paryadhuH zIghraM vivastrau naiva guhyakau||6|| |
tau dRSTvA madirAmattau zrImadAndhau surAtmajau| tayOranugrahArthAya zApaM dAsyannidaM jagau||7|| |
zrInArada uvAca
na hyanyO juSatO jOSyAnbuddhibhraMzO rajOguNaH| zrImadAdAbhijAtyAdiryatra strI dyUtamAsavaH||8|| |
hanyantE pazavO yatra nirdayairajitAtmabhiH| manyamAnairimaM dEhamajarAmRtyu nazvaram||9|| |
dEvasaMjJitamapyantE kRmiviDbhasmasaMjJitam| bhUtadhruktatkRtE svArthaM kiM vEda nirayO yataH||10|| |
dEhaH kimannadAtuH svaM niSEkturmAturEva ca| mAtuH piturvA balinaH krEturagnEH zunO'pi vA||11|| |
EvaM sAdhAraNaM dEhamavyaktaprabhavApyayam| kO vidvAnAtmasAtkRtvA hanti jantUnRtE'sataH||12|| |
asataH zrImadAndhasya dAridryaM paramaJjanam| AtmaupamyEna bhUtAni daridraH paramIkSatE||13|| |
yathA kaNTakaviddhAGgO jantOrnEcchati tAM vyathAm| jIvasAmyaM gatO liGgairna tathAviddhakaNTakaH||14|| |
daridrO nirahaMstambhO muktaH sarvamadairiha| kRcchraM yadRcchayApnOti taddhi tasya paraM tapaH||15|| |
nityaM kSutkSAmadEhasya daridrasyAnnakAGkSiNaH| indriyANyanuzuSyanti hiMsApi vinivartatE||16|| |
daridrasyaiva yujyantE sAdhavaH samadarzinaH| sadbhiH kSiNOti taM tarSaM tata ArAdvizuddhyati||17|| |
sAdhUnAM samacittAnAM mukundacaraNaiSiNAm| upEkSyaiH kiM dhanastambhairasadbhirasadAzrayaiH||18|| |
tadahaM mattayOrmAdhvyA vAruNyA zrImadAndhayOH| tamOmadaM hariSyAmi straiNayOrajitAtmanOH||19|| |
yadimau lOkapAlasya putrau bhUtvA tamaHplutau| na vivAsasamAtmAnaM vijAnItaH sudurmadau||20|| |
atO'rhataH sthAvaratAM syAtAM naivaM yathA punaH| smRtiH syAnmatprasAdEna tatrApi madanugrahAt||21|| |
vAsudEvasya sAnnidhyaM labdhvA divyazaracchatE| vRttE svarlOkatAM bhUyO labdhabhaktI bhaviSyataH||22|| |
zrIzuka uvAca
EvamuktvA sa dEvarSirgatO nArAyaNAzramam| nalakUvaramaNigrIvAvAsaturyamalArjunau||23|| |
RSErbhAgavatamukhyasya satyaM kartuM vacO hariH| jagAma zanakaistatra yatrAstAM yamalArjunau||24|| |
dEvarSirmE priyatamO yadimau dhanadAtmajau| tattathA sAdhayiSyAmi yadgItaM tanmahAtmanA||25|| |
ityantarENArjunayOH kRSNastu yamayOryayau| AtmanirvEzamAtrENa tiryaggatamulUkhalam||26|| |
bAlEna niSkarSayatAnvagulUkhalaM tad dAmOdarENa tarasOtkalitAGghribandhau| niSpEtatuH paramavikramitAtivEpa skandhapravAlaviTapau kRtacaNDazabdau||27|| |
tatra zriyA paramayA kakubhaH sphurantau siddhAvupEtya kujayOriva jAtavEdAH| kRSNaM praNamya zirasAkhilalOkanAthaM baddhAJjalI virajasAvidamUcatuH sma||28|| |
kRSNa kRSNa mahAyOgiMstvamAdyaH puruSaH paraH| vyaktAvyaktamidaM vizvaM rUpaM tE brAhmaNA viduH||29|| |
tvamEkaH sarvabhUtAnAM dEhAsvAtmEndriyEzvaraH| tvamEva kAlO bhagavAnviSNuravyaya IzvaraH||30|| |
tvaM mahAnprakRtiH sUkSmA rajaHsattvatamOmayI| tvamEva puruSO'dhyakSaH sarvakSEtravikAravit||31|| |
gRhyamANaistvamagrAhyO vikAraiH prAkRtairguNaiH| kO nvihArhati vijJAtuM prAksiddhaM guNasaMvRtaH||32|| |
tasmai tubhyaM bhagavatE vAsudEvAya vEdhasE| AtmadyOtaguNaizchanna mahimnE brahmaNE namaH||33|| |
yasyAvatArA jJAyantE zarIrESvazarIriNaH| taistairatulyAtizayairvIryairdEhiSvasaGgataiH||34|| |
sa bhavAnsarvalOkasya bhavAya vibhavAya ca| avatIrNO'MzabhAgEna sAmprataM patirAziSAm||35|| |
namaH paramakalyANa namaH paramamaGgala| vAsudEvAya zAntAya yadUnAM patayE namaH||36|| |
anujAnIhi nau bhUmaMstavAnucarakiGkarau| darzanaM nau bhagavata RSErAsIdanugrahAt||37|| |
vANI guNAnukathanE zravaNau kathAyAM hastau ca karmasu manastava pAdayOrnaH| smRtyAM zirastava nivAsajagatpraNAmE dRSTiH satAM darzanE'stu bhavattanUnAm||38|| |
zrIzuka uvAca
itthaM saGkIrtitastAbhyAM bhagavAngOkulEzvaraH| dAmnA cOlUkhalE baddhaH prahasannAha guhyakau||39|| |
zrIbhagavAnuvAca
jJAtaM mama puraivaitadRSiNA karuNAtmanA| yacchrImadAndhayOrvAgbhirvibhraMzO'nugrahaH kRtaH||40|| |
sAdhUnAM samacittAnAM sutarAM matkRtAtmanAm| darzanAnnO bhavEdbandhaH puMsO'kSNOH savituryathA||41|| |
tadgacchataM matparamau nalakUvara sAdanam| saJjAtO mayi bhAvO vAmIpsitaH paramO'bhavaH||42|| |
zrIzuka uvAca
ityuktau tau parikramya praNamya ca punaH punaH baddhOlUkhalamAmantrya jagmaturdizamuttarAm||43|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE dazamO'dhyAyaH||
