From StotraSamhita
< Bhagavatam | Skandha 11
prathamO'dhyAyaH
zrIzuka uvAca
kRtvA daityavadhaM kRSNaH sarAmO yadubhirvRtaH| bhuvO'vatArayadbhAraM javiSThaM janayankalim||1|| |
yE kOpitAH subahu pANDusutAH sapatnair durdyUtahElanakacagrahaNAdibhistAn| kRtvA nimittamitarEtarataH samEtAn hatvA nRpAnniraharatkSitibhAramIzaH||2|| |
bhUbhArarAjapRtanA yadubhirnirasya guptaiH svabAhubhiracintayadapramEyaH| manyE'vanErnanu gatO'pyagataM hi bhAraM yadyAdavaM kulamahO aviSahyamAstE||3|| |
naivAnyataH paribhavO'sya bhavEtkathaJcin matsaMzrayasya vibhavOnnahanasya nityam| antaH kaliM yadukulasya vidhAya vENu stambasya vahnimiva zAntimupaimi dhAma||4|| |
EvaM vyavasitO rAjansatyasaGkalpa IzvaraH| zApavyAjEna viprANAM saJjahrE svakulaM vibhuH||5|| |
svamUrtyA lOkalAvaNya nirmuktyA lOcanaM nRNAm| gIrbhistAH smaratAM cittaM padaistAnIkSatAM kriyAH||6|| |
Acchidya kIrtiM suzlOkAM vitatya hyaJjasA nu kau| tamO'nayA tariSyantItyagAtsvaM padamIzvaraH||7|| |
zrIrAjOvAca
brahmaNyAnAM vadAnyAnAM nityaM vRddhOpasEvinAm| viprazApaH kathamabhUdvRSNInAM kRSNacEtasAm||8|| |
yannimittaH sa vai zApO yAdRzO dvijasattama| kathamEkAtmanAM bhEda EtatsarvaM vadasva mE||9|| |
zrIbAdarAyaNiruvAca
bibhradvapuH sakalasundarasannivEzaM karmAcaranbhuvi sumaGgalamAptakAmaH| AsthAya dhAma ramamANa udArakIRtiH saMhartumaicchata kulaM sthitakRtyazESaH||10|| |
karmAni puNyanivahAni sumaGgalAni gAyajjagatkalimalApaharANi kRtvA| kAlAtmanA nivasatA yadudEvagEhE piNDArakaM samagamanmunayO nisRSTAH||11|| |
vizvAmitrO'sitaH kaNvO durvAsA bhRguraGgirAH| kazyapO vAmadEvO'trir vasiSThO nAradAdayaH||12|| |
krIDantastAnupavrajya kumArA yadunandanAH| upasaGgRhya papracchuravinItA vinItavat||13|| |
tE vESayitvA strIvESaiH sAmbaM jAmbavatIsutam| ESA pRcchati vO viprA antarvatnyasitEkSaNA||14|| |
praSTuM vilajjatI sAkSAtprabrUtAmOghadarzanAH| prasOSyantI putrakAmA kiM svitsaJjanayiSyati||15|| |
EvaM pralabdhA munayastAnUcuH kupitA nRpa| janayiSyati vO mandA muSalaM kulanAzanam||16|| |
tacchrutvA tE'tisantrastA vimucya sahasOdaram| sAmbasya dadRzustasminmuSalaM khalvayasmayam||17|| |
kiM kRtaM mandabhAgyairnaH kiM vadiSyanti nO janAH| iti vihvalitA gEhAnAdAya muSalaM yayuH||18|| |
taccOpanIya sadasi parimlAnamukhazriyaH| rAjJa AvEdayAM cakruH sarvayAdavasannidhau||19|| |
zrutvAmOghaM viprazApaM dRSTvA ca muSalaM nRpa| vismitA bhayasantrastA babhUvurdvArakaukasaH||20|| |
taccUrNayitvA muSalaM yadurAjaH sa AhukaH| samudrasalilE prAsyallOhaM cAsyAvazESitam||21|| |
kazcinmatsyO'grasIllOhaM cUrNAni taralaistataH| uhyamAnAni vElAyAM lagnAnyAsankilairakAH||22|| |
matsyO gRhItO matsyaghnairjAlEnAnyaiH sahArNavE| tasyOdaragataM lOhaM sa zalyE lubdhakO'karOt||23|| |
bhagavAnjJAtasarvArtha IzvarO'pi tadanyathA kartuM naicchadviprazApaM kAlarUpyanvamOdata||24|| |
||iti zrImadbhAgavatE mahApurANE pAramahaMsyAM saMhitAyAM EkAdazaskandhE prathamO'dhyAyaH||
