From StotraSamhita
< Bhagavatam | Skandha 01
EkAdazO'dhyAyaH
sUta uvAca
AnartAnsa upavrajya svRddhAJjanapadAnsvakAn| dadhmau daravaraM tESAM viSAdaM zamayanniva||1|| |
sa uccakAzE dhavalOdarO darO'pyurukramasyAdharazONazONimA| dAdhmAyamAnaH karakaJjasampuTE yathAbjakhaNDE kalahaMsa utsvanaH||2|| |
tamupazrutya ninadaM jagadbhayabhayAvaham| pratyudyayuH prajAH sarvA bhartRdarzanalAlasAH||3|| |
tatrOpanItabalayO ravErdIpamivAdRtAH| AtmArAmaM pUrNakAmaM nijalAbhEna nityadA||4|| |
prItyutphullamukhAH prOcurharSagadgadayA girA| pitaraM sarvasuhRdamavitAramivArbhakAH||5|| |
natAH sma tE nAtha sadAGghripaGkajaM viriJcavairiJcyasurEndravanditam| parAyaNaM kSEmamihEcchatAM paraM na yatra kAlaH prabhavEtparaH prabhuH||6|| |
bhavAya nastvaM bhava vizvabhAvana tvamEva mAtAtha suhRtpatiH pitA| tvaM sadgururnaH paramaM ca daivataM yasyAnuvRttyA kRtinO babhUvima||7|| |
ahO sanAthA bhavatA sma yadvayaM traiviSTapAnAmapi dUradarzanam| prEmasmitasnigdhanirIkSaNAnanaM pazyEma rUpaM tava sarvasaubhagam||8|| |
yarhyambujAkSApasasAra bhO bhavAnkurUnmadhUnvAtha suhRddidRkSayA| tatrAbdakOTipratimaH kSaNO bhavEdraviM vinAkSNOriva nastavAcyuta||9|| |
kathaM vayaM nAtha cirOSitE tvayi prasannadRSTyAkhilatApazOSaNam| jIvEma tE sundarahAsazObhitamapazyamAnA vadanaM manOharam||10|| |
iti cOdIritA vAcaH prajAnAM bhaktavatsalaH| zRNvAnO'nugrahaM dRSTyA vitanvanprAvizatpuram||11|| |
madhubhOjadazArhArhakukurAndhakavRSNibhiH| AtmatulyabalairguptAM nAgairbhOgavatImiva||12|| |
sarvartusarvavibhavapuNyavRkSalatAzramaiH| udyAnOpavanArAmairvRtapadmAkarazriyam||13|| |
gOpuradvAramArgESu kRtakautukatOraNAm| citradhvajapatAkAgrairantaH pratihatAtapAm||14|| |
sammArjitamahAmArga rathyApaNakacatvarAm| siktAM gandhajalairuptAM phalapuSpAkSatAGkuraiH||15|| |
dvAri dvAri gRhANAM ca dadhyakSataphalEkSubhiH| alaGkRtAM pUrNakumbhairbalibhirdhUpadIpakaiH||16|| |
nizamya prESThamAyAntaM vasudEvO mahAmanAH| akrUrazcOgrasEnazca rAmazcAdbhutavikramaH||17|| |
pradyumnazcArudESNazca sAmbO jAmbavatIsutaH| praharSavEgOcchazitazayanAsanabhOjanAH||18|| |
vAraNEndraM puraskRtya brAhmaNaiH sasumaGgalaiH zaGkhatUryaninAdEna brahmaghOSENa cAdRtAH pratyujjagmU rathairhRSTAH praNayAgatasAdhvasAH||19|| |
vAramukhyAzca zatazO yAnaistaddarzanOtsukAH| lasatkuNDalanirbhAtakapOlavadanazriyaH||20|| |
naTanartakagandharvAH sUtamAgadhavandinaH| gAyanti cOttamazlOkacaritAnyadbhutAni ca||21|| |
bhagavAMstatra bandhUnAM paurANAmanuvartinAm| yathAvidhyupasaGgamya sarvESAM mAnamAdadhE||22|| |
prahvAbhivAdanAzlESakarasparzasmitEkSaNaiH| AzvAsya cAzvapAkEbhyO varaizcAbhimatairvibhuH||23|| |
svayaM ca gurubhirvipraiH sadAraiH sthavirairapi| AzIrbhiryujyamAnO'nyairvandibhizcAvizatpuram||24|| |
rAjamArgaM gatE kRSNE dvArakAyAH kulastriyaH| harmyANyAruruhurvipra tadIkSaNamahOtsavAH||25|| |
nityaM nirIkSamANAnAM yadapi dvArakaukasAm| na vitRpyanti hi dRzaH zriyO dhAmAGgamacyutam||26|| |
zriyO nivAsO yasyOraH pAnapAtraM mukhaM dRzAm| bAhavO lOkapAlAnAM sAraGgANAM padAmbujam||27|| |
sitAtapatravyajanairupaskRtaH prasUnavarSairabhivarSitaH pathi| pizaGgavAsA vanamAlayA babhau ghanO yathArkODupacApavaidyutaiH||28|| |
praviSTastu gRhaM pitrOH pariSvaktaH svamAtRbhiH| vavandE zirasA sapta dEvakIpramukhA mudA||29|| |
tAH putramaGkamArOpya snEhasnutapayOdharAH| harSavihvalitAtmAnaH siSicurnEtrajairjalaiH||30|| |
athAvizatsvabhavanaM sarvakAmamanuttamam| prAsAdA yatra patnInAM sahasrANi ca SODaza||31|| |
patnyaH patiM prOSya gRhAnupAgataM vilOkya saJjAtamanOmahOtsavAH| uttasthurArAtsahasAsanAzayAtsAkaM vratairvrIDitalOcanAnanAH||32|| |
tamAtmajairdRSTibhirantarAtmanA durantabhAvAH parirEbhirE patim| niruddhamapyAsravadambu nEtrayOrvilajjatInAM bhRguvarya vaiklavAt||33|| |
yadyapyasau pArzvagatO rahOgatastathApi tasyAGghriyugaM navaM navam| padE padE kA viramEta tatpadAccalApi yacchrIrna jahAti karhicit||34|| |
EvaM nRpANAM kSitibhArajanmanAmakSauhiNIbhiH parivRttatEjasAm| vidhAya vairaM zvasanO yathAnalaM mithO vadhEnOparatO nirAyudhaH||35|| |
sa ESa naralOkE'sminnavatIrNaH svamAyayA| rEmE strIratnakUTasthO bhagavAnprAkRtO yathA||36|| |
uddAmabhAvapizunAmalavalguhAsa vrIDAvalOkanihatO madanO'pi yAsAm| sammuhya cApamajahAtpramadOttamAstA yasyEndriyaM vimathituM kuhakairna zEkuH||37|| |
tamayaM manyatE lOkO hyasaGgamapi saGginam| AtmaupamyEna manujaM vyApRNvAnaM yatO'budhaH||38|| |
EtadIzanamIzasya prakRtisthO'pi tadguNaiH| na yujyatE sadAtmasthairyathA buddhistadAzrayA||39|| |
taM mEnirE'balA mUDhAH straiNaM cAnuvrataM rahaH apramANavidO bharturIzvaraM matayO yathA||40|| |
||iti zrImadbhAgavatE mahApurANE pAramahaMsyAM saMhitAyAM prathamaskandhE EkAdazO'dhyAyaH||
