From StotraSamhita

saptaviMzO'dhyAyaH

zrIbhagavAnuvAca

prakRtisthO'pi puruSO nAjyatE prAkRtairguNaiH| avikArAdakartRtvAnnirguNatvAjjalArkavat||1||

sa ESa yarhi prakRtErguNESvabhiviSajjatE| ahaGkriyAvimUDhAtmA kartAsmItyabhimanyatE||2||

tEna saMsArapadavImavazO'bhyEtyanirvRtaH| prAsaGgikaiH karmadOSaiH sadasanmizrayOniSu||3||

arthE hyavidyamAnE'pi saMsRtirna nivartatE| dhyAyatO viSayAnasya svapnE'narthAgamO yathA||4||

ata Eva zanaizcittaM prasaktamasatAM pathi| bhaktiyOgEna tIvrENa viraktyA ca nayEdvazam||5||

yamAdibhiryOgapathairabhyasaJzraddhayAnvitaH| mayi bhAvEna satyEna matkathAzravaNEna ca||6||

sarvabhUtasamatvEna nirvairENAprasaGgataH| brahmacaryENa maunEna svadharmENa balIyasA||7||

yadRcchayOpalabdhEna santuSTO mitabhuGmuniH| viviktazaraNaH zAntO maitraH karuNa AtmavAn||8||

sAnubandhE ca dEhE'sminnakurvannasadAgraham| jJAnEna dRSTatattvEna prakRtEH puruSasya ca||9||

nivRttabuddhyavasthAnO dUrIbhUtAnyadarzanaH| upalabhyAtmanAtmAnaM cakSuSEvArkamAtmadRk||10||

muktaliGgaM sadAbhAsamasati pratipadyatE| satO bandhumasaccakSuH sarvAnusyUtamadvayam||11||

yathA jalastha AbhAsaH sthalasthEnAvadRzyatE| svAbhAsEna tathA sUryO jalasthEna divi sthitaH||12||

EvaM trivRdahaGkArO bhUtEndriyamanOmayaiH| svAbhAsairlakSitO'nEna sadAbhAsEna satyadRk||13||

bhUtasUkSmEndriyamanO buddhyAdiSviha nidrayA| lInESvasati yastatra vinidrO nirahaGkriyaH||14||

manyamAnastadAtmAnamanaSTO naSTavanmRSA| naSTE'haGkaraNE draSTA naSTavitta ivAturaH||15||

EvaM pratyavamRzyAsAvAtmAnaM pratipadyatE| sAhaGkArasya dravyasya yO'vasthAnamanugrahaH||16||

dEvahUtiruvAca

puruSaM prakRtirbrahmanna vimuJcati karhicit| anyOnyApAzrayatvAcca nityatvAdanayOH prabhO||17||

yathA gandhasya bhUmEzca na bhAvO vyatirEkataH| apAM rasasya ca yathA tathA buddhEH parasya ca||18||

akartuH karmabandhO'yaM puruSasya yadAzrayaH| guNESu satsu prakRtEH kaivalyaM tESvataH katham||19||

kvacittattvAvamarzEna nivRttaM bhayamulbaNam| anivRttanimittatvAtpunaH pratyavatiSThatE||20||

zrIbhagavAnuvAca

animittanimittEna svadharmENAmalAtmanA| tIvrayA mayi bhaktyA ca zrutasambhRtayA ciram||21||

jJAnEna dRSTatattvEna vairAgyENa balIyasA| tapOyuktEna yOgEna tIvrENAtmasamAdhinA||22||

prakRtiH puruSasyEha dahyamAnA tvaharnizam| tirObhavitrI zanakairagnEryOnirivAraNiH||23||

bhuktabhOgA parityaktA dRSTadOSA ca nityazaH| nEzvarasyAzubhaM dhattE svE mahimni sthitasya ca||24||

yathA hyapratibuddhasya prasvApO bahvanarthabhRt| sa Eva pratibuddhasya na vai mOhAya kalpatE||25||

EvaM viditatattvasya prakRtirmayi mAnasam| yuJjatO nApakuruta AtmArAmasya karhicit||26||

yadaivamadhyAtmarataH kAlEna bahujanmanA| sarvatra jAtavairAgya AbrahmabhuvanAnmuniH||27||

madbhaktaH pratibuddhArthO matprasAdEna bhUyasA| niHzrEyasaM svasaMsthAnaM kaivalyAkhyaM madAzrayam||28||

prApnOtIhAJjasA dhIraH svadRzA cchinnasaMzayaH| yadgatvA na nivartEta yOgI liGgAdvinirgamE||29||

yadA na yOgOpacitAsu cEtO mAyAsu siddhasya viSajjatE'Gga ananyahEtuSvatha mE gatiH syAdAtyantikI yatra na mRtyuhAsaH||30||

||iti zrImadbhAgavatE mahApurANE pAramahaMsyAM saMhitAyAM tRtIyaskandhE saptaviMzO'dhyAyaH||

See Also

• http://vedabase.net/sb/3/27/en