From StotraSamhita

EkAzItitamO'dhyAyaH

zrIzuka uvAca

sa itthaM dvijamukhyEna saha saGkathayanhariH| sarvabhUtamanO'bhijJaH smayamAna uvAca tam||1||

brahmaNyO brAhmaNaM kRSNO bhagavAnprahasanpriyam| prEmNA nirIkSaNEnaiva prEkSankhalu satAM gatiH||2||

zrIbhagavAnuvAca

kimupAyanamAnItaM brahmanmE bhavatA gRhAt aNvapyupAhRtaM bhaktaiH prEmNA bhuryEva mE bhavEt bhUryapyabhaktOpahRtaM na mE tOSAya kalpatE||3||

patraM puSpaM phalaM tOyaM yO mE bhaktyA prayacchati| tadahaM bhaktyupahRtamaznAmi prayatAtmanaH||4||

ityuktO'pi dviyastasmai vrIDitaH patayE zriyaH| pRthukaprasRtiM rAjanna prAyacchadavAGmukhaH||5||

sarvabhUtAtmadRksAkSAttasyAgamanakAraNam| vijGAyAcintayannAyaM zrIkAmO mAbhajatpurA||6||

patnyAH pativratAyAstu sakhA priyacikIrSayA| prAptO mAmasya dAsyAmi sampadO'martyadurlabhAH||7||

itthaM vicintya vasanAccIrabaddhAndvijanmanaH| svayaM jahAra kimidamiti pRthukataNDulAn||8||

nanvEtadupanItaM mE paramaprINanaM sakhE| tarpayantyaGga mAM vizvamEtE pRthukataNDulAH||9||

iti muSTiM sakRjjagdhvA dvitIyAM jagdhumAdadE| tAvacchrIrjagRhE hastaM tatparA paramESThinaH||10||

EtAvatAlaM vizvAtmansarvasampatsamRddhayE| asminlOkE'tha vAmuSminpuMsastvattOSakAraNam||11||

brAhmaNastAM tu rajanImuSitvAcyutamandirE| bhuktvA pItvA sukhaM mEnE AtmAnaM svargataM yathA||12||

zvObhUtE vizvabhAvEna svasukhEnAbhivanditaH| jagAma svAlayaM tAta pathyanavrajya nanditaH||13||

sa cAlabdhvA dhanaM kRSNAnna tu yAcitavAnsvayam| svagRhAnvrIDitO'gacchanmahaddarzananirvRtaH||14||

ahO brahmaNyadEvasya dRSTA brahmaNyatA mayA| yaddaridratamO lakSmImAzliSTO bibhratOrasi||15||

kvAhaM daridraH pApIyAnkva kRSNaH zrInikEtanaH| brahmabandhuriti smAhaM bAhubhyAM parirambhitaH||16||

nivAsitaH priyAjuSTE paryaGkE bhrAtarO yathA| mahiSyA vIjitaH zrAntO bAlavyajanahastayA||17||

zuzrUSayA paramayA pAdasaMvAhanAdibhiH| pUjitO dEvadEvEna vipradEvEna dEvavat||18||

svargApavargayOH puMsAM rasAyAM bhuvi sampadAm| sarvAsAmapi siddhInAM mUlaM taccaraNArcanam||19||

adhanO'yaM dhanaM prApya mAdyannuccairna mAM smarEt| iti kAruNikO nUnaM dhanaM mE'bhUri nAdadAt||20||

iti taccintayannantaH prAptO niyagRhAntikam| sUryAnalEndusaGkAzairvimAnaiH sarvatO vRtam||21||

vicitrOpavanOdyAnaiH kUjaddvijakulAkulaiH| prOtphullakamudAmbhOja kahlArOtpalavAribhiH||22||

juSTaM svalaGkRtaiH pumbhiH strIbhizca hariNAkSibhiH| kimidaM kasya vA sthAnaM kathaM tadidamityabhUt||23||

EvaM mImAMsamAnaM taM narA nAryO'maraprabhAH| pratyagRhNanmahAbhAgaM gItavAdyEna bhUyasA||24||

patimAgatamAkarNya patnyuddharSAtisambhramA| nizcakrAma gRhAttUrNaM rUpiNI zrIrivAlayAt||25||

pativratA patiM dRSTvA prEmOtkaNThAzrulOcanA| mIlitAkSyanamadbuddhyA manasA pariSasvajE||26||

patnIM vIkSya visphurantIM dEvIM vaimAnikImiva| dAsInAM niSkakaNThInAM madhyE bhAntIM sa vismitaH||27||

prItaH svayaM tayA yuktaH praviSTO nijamandiram| maNistambhazatOpEtaM mahEndrabhavanaM yathA||28||

payaHphEnanibhAH zayyA dAntA rukmaparicchadAH| paryaGkA hEmadaNDAni cAmaravyajanAni ca||29||

AsanAni ca haimAni mRdUpastaraNAni ca| muktAdAmavilambIni vitAnAni dyumanti ca||30||

svacchasphaTikakuDyESu mahAmArakatESu ca| ratnadIpAnbhrAjamAnAnlalanA ratnasaMyutAH||31||

vilOkya brAhmaNastatra samRddhIH sarvasampadAm| tarkayAmAsa nirvyagraH svasamRddhimahaitukIm||32||

nUnaM bataitanmama durbhagasya zazvaddaridrasya samRddhihEtuH| mahAvibhUtEravalOkatO'nyO naivOpapadyEta yadUttamasya||33||

nanvabruvANO dizatE samakSaM yAciSNavE bhUryapi bhUribhOjaH| parjanyavattatsvayamIkSamANO dAzArhakANAmRSabhaH sakhA mE||34||

kiJcitkarOtyurvapi yatsvadattaM suhRtkRtaM phalgvapi bhUrikArI| mayOpaNItaM pRthukaikamuSTiM pratyagrahItprItiyutO mahAtmA||35||

tasyaiva mE sauhRdasakhyamaitrI dAsyaM punarjanmani janmani syAt| mahAnubhAvEna guNAlayEna viSajjatastatpuruSaprasaGgaH||36||

bhaktAya citrA bhagavAnhi sampadO rAjyaM vibhUtIrna samarthayatyajaH| adIrghabOdhAya vicakSaNaH svayaM pazyannipAtaM dhaninAM madOdbhavam||37||

itthaM vyavasitO buddhyA bhaktO'tIva janArdanE| viSayAnjAyayA tyakSyanbubhujE nAtilampaTaH||38||

tasya vai dEvadEvasya harEryajJapatEH prabhOH| brAhmaNAH prabhavO daivaM na tEbhyO vidyatE param||39||

EvaM sa viprO bhagavatsuhRttadA dRSTvA svabhRtyairajitaM parAjitam| taddhyAnavEgOdgrathitAtmabandhanastaddhAma lEbhE'cirataH satAM gatim||40||

EtadbrahmaNyadEvasya zrutvA brahmaNyatAM naraH labdhabhAvO bhagavati karmabandhAdvimucyatE||41||

||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE EkAzItitamO'dhyAyaH||

See Also

• http://vedabase.net/sb/10/81/en