From StotraSamhita

saptadazO'dhyAyaH

zrIzuka uvAca

yatazcAntarhitO'nantastasyai kRtvA dizE namaH| vidyAdharazcitrakEtuzcacAra gaganE caraH||1||

sa lakSaM varSalakSANAmavyAhatabalEndriyaH| stUyamAnO mahAyOgI munibhiH siddhacAraNaiH||2||

kulAcalEndradrONISu nAnAsaGkalpasiddhiSu| rEmE vidyAdharastrIbhirgApayanharimIzvaram||3||

EkadA sa vimAnEna viSNudattEna bhAsvatA| girizaM dadRzE gacchanparItaM siddhacAraNaiH||4||

AliGgyAGkIkRtAM dEvIM bAhunA munisaMsadi| uvAca dEvyAH zRNvantyA jahAsOccaistadantikE||5||

citrakEturuvAca

ESa lOkaguruH sAkSAddharmaM vaktA zarIriNAm| AstE mukhyaH sabhAyAM vai mithunIbhUya bhAryayA||6||

jaTAdharastIvratapA brahmavAdisabhApatiH| aGkIkRtya striyaM cAstE gatahrIH prAkRtO yathA||7||

prAyazaH prAkRtAzcApi striyaM rahasi bibhrati| ayaM mahAvratadharO bibharti sadasi striyam||8||

zrIzuka uvAca

bhagavAnapi tacchrutvA prahasyAgAdhadhIrnRpa| tUSNIM babhUva sadasi sabhyAzca tadanuvratAH||9||

ityatadvIryaviduSi bruvANE bahvazObhanam| ruSAha dEvI dhRSTAya nirjitAtmAbhimAninE||10||

zrIpArvatyuvAca

ayaM kimadhunA lOkE zAstA daNDadharaH prabhuH| asmadvidhAnAM duSTAnAM nirlajjAnAM ca viprakRt||11||

na vEda dharmaM kila padmayOnirna brahmaputrA bhRgunAradAdyAH| na vai kumAraH kapilO manuzca yE nO niSEdhantyativartinaM haram||12||

ESAmanudhyEyapadAbjayugmaM jagadguruM maGgalamaGgalaM svayam| yaH kSatrabandhuH paribhUya sUrInprazAsti dhRSTastadayaM hi daNDyaH||13||

nAyamarhati vaikuNTha pAdamUlOpasarpaNam| sambhAvitamatiH stabdhaH sAdhubhiH paryupAsitam||14||

ataH pApIyasIM yOnimAsurIM yAhi durmatE| yathEha bhUyO mahatAM na kartA putra kilbiSam||15||

zrIzuka uvAca

EvaM zaptazcitrakEturvimAnAdavaruhya saH| prasAdayAmAsa satIM mUrdhnA namrENa bhArata||16||

citrakEturuvAca

pratigRhNAmi tE zApamAtmanO'JjalinAmbikE| dEvairmartyAya yatprOktaM pUrvadiSTaM hi tasya tat||17||

saMsAracakra EtasmiJjanturajJAnamOhitaH| bhrAmyansukhaM ca duHkhaM ca bhuGktE sarvatra sarvadA||18||

naivAtmA na parazcApi kartA syAtsukhaduHkhayOH| kartAraM manyatE'trAjJa AtmAnaM paramEva ca||19||

guNapravAha EtasminkaH zApaH kO nvanugrahaH| kaH svargO narakaH kO vA kiM sukhaM duHkhamEva vA||20||

EkaH sRjati bhUtAni bhagavAnAtmamAyayA| ESAM bandhaM ca mOkSaM ca sukhaM duHkhaM ca niSkalaH||21||

na tasya kazciddayitaH pratIpO na jJAtibandhurna parO na ca svaH| samasya sarvatra niraJjanasya sukhE na rAgaH kuta Eva rOSaH||22||

tathApi tacchaktivisarga ESAM sukhAya duHkhAya hitAhitAya| bandhAya mOkSAya ca mRtyujanmanOH zarIriNAM saMsRtayE'vakalpatE||23||

atha prasAdayE na tvAM zApamOkSAya bhAmini| yanmanyasE hyasAdhUktaM mama tatkSamyatAM sati||24||

zrIzuka uvAca

iti prasAdya girizau citrakEturarindama| jagAma svavimAnEna pazyatOH smayatOstayOH||25||

tatastu bhagavAnrudrO rudrANImidamabravIt| dEvarSidaityasiddhAnAM pArSadAnAM ca zRNvatAm||26||

zrIrudra uvAca

dRSTavatyasi suzrONi harEradbhutakarmaNaH| mAhAtmyaM bhRtyabhRtyAnAM niHspRhANAM mahAtmanAm||27||

nArAyaNaparAH sarvE na kutazcana bibhyati| svargApavarganarakESvapi tulyArthadarzinaH||28||

dEhinAM dEhasaMyOgAddvandvAnIzvaralIlayA| sukhaM duHkhaM mRtirjanma zApO'nugraha Eva ca||29||

avivEkakRtaH puMsO hyarthabhEda ivAtmani| guNadOSavikalpazca bhidEva srajivatkRtaH||30||

vAsudEvE bhagavati bhaktimudvahatAM nRNAm| jJAnavairAgyavIryANAM na hi kazcidvyapAzrayaH||31||

nAhaM viriJcO na kumAranAradau na brahmaputrA munayaH surEzAH| vidAma yasyEhitamaMzakAMzakA na tatsvarUpaM pRthagIzamAninaH||32||

na hyasyAsti priyaH kazcinnApriyaH svaH parO'pi vA| AtmatvAtsarvabhUtAnAM sarvabhUtapriyO hariH||33||

tasya cAyaM mahAbhAgazcitrakEtuH priyO'nugaH| sarvatra samadRkSAntO hyahaM caivAcyutapriyaH||34||

tasmAnna vismayaH kAryaH puruSESu mahAtmasu| mahApuruSabhaktESu zAntESu samadarziSu||35||

zrIzuka uvAca

iti zrutvA bhagavataH zivasyOmAbhibhASitam| babhUva zAntadhI rAjandEvI vigatavismayA||36||

iti bhAgavatO dEvyAH pratizaptumalantamaH| mUrdhnA sa jagRhE zApamEtAvatsAdhulakSaNam||37||

jajJE tvaSTurdakSiNAgnau dAnavIM yOnimAzritaH| vRtra ityabhivikhyAtO jJAnavijJAnasaMyutaH||38||

EtattE sarvamAkhyAtaM yanmAM tvaM paripRcchasi| vRtrasyAsurajAtEzca kAraNaM bhagavanmatEH||39||

itihAsamimaM puNyaM citrakEtOrmahAtmanaH| mAhAtmyaM viSNubhaktAnAM zrutvA bandhAdvimucyatE||40||

ya EtatprAtarutthAya zraddhayA vAgyataH paThEt itihAsaM hariM smRtvA sa yAti paramAM gatim||41||

||iti zrImadbhAgavatE mahApurANE pAramahaMsyAM saMhitAyAM SaSThaskandhE saptadazO'dhyAyaH||

See Also

• http://vedabase.net/sb/6/17/en