paJcamO'dhyAyaH

nAyaM dEhO dEhabhAjAM nRlOkE kaSTAnkAmAnarhatE viDbhujAM yE|
tapO divyaM putrakA yEna sattvaM zuddhyEdyasmAdbrahmasaukhyaM tvanantam||1||

mahatsEvAM dvAramAhurvimuktEstamOdvAraM yOSitAM saGgisaGgam|
mahAntastE samacittAH prazAntA vimanyavaH suhRdaH sAdhavO yE||2||

yE vA mayIzE kRtasauhRdArthA janESu dEhambharavArtikESu|
gRhESu jAyAtmajarAtimatsu na prItiyuktA yAvadarthAzca lOkE||3||

nUnaM pramattaH kurutE vikarma yadindriyaprItaya ApRNOti|
na sAdhu manyE yata AtmanO'yamasannapi klEzada Asa dEhaH||4||

parAbhavastAvadabOdhajAtO yAvanna jijJAsata Atmatattvam|
yAvatkriyAstAvadidaM manO vai karmAtmakaM yEna zarIrabandhaH||5||

EvaM manaH karmavazaM prayuGktE avidyayAtmanyupadhIyamAnE|
prItirna yAvanmayi vAsudEvE na mucyatE dEhayOgEna tAvat||6||

yadA na pazyatyayathA guNEhAM svArthE pramattaH sahasA vipazcit|
gatasmRtirvindati tatra tApAnAsAdya maithunyamagAramajJaH||7||

puMsaH striyA mithunIbhAvamEtaM tayOrmithO hRdayagranthimAhuH|
atO gRhakSEtrasutAptavittairjanasya mOhO'yamahaM mamEti||8||

yadA manOhRdayagranthirasya karmAnubaddhO dRDha AzlathEta|
tadA janaH samparivartatE'smAdmuktaH paraM yAtyatihAya hEtum||9||

haMsE gurau mayi bhaktyAnuvRtyA vitRSNayA dvandvatitikSayA ca|
sarvatra jantOrvyasanAvagatyA jijJAsayA tapasEhAnivRttyA||10||

matkarmabhirmatkathayA ca nityaM maddEvasaGgAdguNakIrtanAnmE|
nirvairasAmyOpazamEna putrA jihAsayA dEhagEhAtmabuddhEH||11||

adhyAtmayOgEna viviktasEvayA prANEndriyAtmAbhijayEna sadhryak|
sacchraddhayA brahmacaryENa zazvadasampramAdEna yamEna vAcAm||12||

sarvatra madbhAvavicakSaNEna jJAnEna vijJAnavirAjitEna|
yOgEna dhRtyudyamasattvayuktO liGgaM vyapOhEtkuzalO'hamAkhyam||13||

karmAzayaM hRdayagranthibandhamavidyayAsAditamapramattaH|
anEna yOgEna yathOpadEzaM samyagvyapOhyOparamEta yOgAt||14||

putrAMzca ziSyAMzca nRpO gururvA mallOkakAmO madanugrahArthaH
itthaM vimanyuranuziSyAdatajjJAnna yOjayEtkarmasu karmamUDhAn
kaM yOjayanmanujO'rthaM labhEta nipAtayannaSTadRzaM hi gartE||15||

lOkaH svayaM zrEyasi naSTadRSTiryO'rthAnsamIhEta nikAmakAmaH|
anyOnyavairaH sukhalEzahEtOranantaduHkhaM ca na vEda mUDhaH||16||

kastaM svayaM tadabhijJO vipazcidavidyAyAmantarE vartamAnam|
dRSTvA punastaM saghRNaH kubuddhiM prayOjayEdutpathagaM yathAndham||17||

gururna sa syAtsvajanO na sa syAtpitA na sa syAjjananI na sA syAt|
daivaM na tatsyAnna patizca sa syAnna mOcayEdyaH samupEtamRtyum||18||

idaM zarIraM mama durvibhAvyaM sattvaM hi mE hRdayaM yatra dharmaH|
pRSThE kRtO mE yadadharma ArAdatO hi mAmRSabhaM prAhurAryAH||19||

tasmAdbhavantO hRdayEna jAtAH sarvE mahIyAMsamamuM sanAbham|
akliSTabuddhyA bharataM bhajadhvaM zuzrUSaNaM tadbharaNaM prajAnAm||20||

bhUtESu vIrudbhya uduttamA yE sarIsRpAstESu sabOdhaniSThAH|
tatO manuSyAH pramathAstatO'pi gandharvasiddhA vibudhAnugA yE||21||

dEvAsurEbhyO maghavatpradhAnA dakSAdayO brahmasutAstu tESAm|
bhavaH paraH sO'tha viriJcavIryaH sa matparO'haM dvijadEvadEvaH||22||

na brAhmaNaistulayE bhUtamanyatpazyAmi viprAH kimataH paraM tu|
yasminnRbhiH prahutaM zraddhayAhamaznAmi kAmaM na tathAgnihOtrE||23||

dhRtA tanUruzatI mE purANI yEnEha sattvaM paramaM pavitram|
zamO damaH satyamanugrahazca tapastitikSAnubhavazca yatra||24||

mattO'pyanantAtparataH parasmAtsvargApavargAdhipatErna kiJcit|
yESAM kimu syAditarENa tESAmakiJcanAnAM mayi bhaktibhAjAm||25||

sarvANi maddhiSNyatayA bhavadbhizcarANi bhUtAni sutA dhruvANi|
sambhAvitavyAni padE padE vO viviktadRgbhistadu hArhaNaM mE||26||

manOvacOdRkkaraNEhitasya sAkSAtkRtaM mE paribarhaNaM hi|
vinA pumAnyEna mahAvimOhAtkRtAntapAzAnna vimOktumIzEt||27||

EvamanuzAsyAtmajAnsvayamanuziSTAnapi lOkAnuzAsanArthaM mahAnubhAvaH parama
suhRdbhagavAnRSabhApadEza upazamazIlAnAmuparatakarmaNAM mahAmunInAM bhaktijJAnavairAgya
lakSaNaM pAramahaMsyadharmamupazikSamANaH svatanayazatajyESThaM paramabhAgavataM bhagavaj
janaparAyaNaM bharataM dharaNipAlanAyAbhiSicya svayaM bhavana EvOrvaritazarIramAtraparigraha unmatta
iva gaganaparidhAnaH prakIrNakEza AtmanyArOpitAhavanIyO brahmAvartAtpravavrAja||28||

jaDAndhamUkabadhirapizAcOnmAdakavadavadhUtavESO'bhibhASyamANO'pi janAnAM gRhItamauna
vratastUSNIM babhUva||29||

tatra tatra puragrAmAkarakhETavATakharvaTazibiravrajaghOSasArthagiri
vanAzramAdiSvanupathamavanicarApasadaiH paribhUyamAnO makSikAbhiriva vanagajastarjana
tADanAvamEhanaSThIvanagrAvazakRdrajaHprakSEpapUtivAtaduruktaistadavigaNayannEvAsatsaMsthAna
EtasmindEhOpalakSaNE sadapadEza ubhayAnubhavasvarUpENa svamahimAvasthAnEnAsamArOpitAhaM
mamAbhimAnatvAdavikhaNDitamanAH pRthivImEkacaraH paribabhrAma||30||

atisukumArakaracaraNOraHsthalavipulabAhvaMsagalavadanAdyavayavavinyAsaH prakRti
sundarasvabhAvahAsasumukhO navanalinadalAyamAnaziziratArAruNAyatanayanaruciraH sadRzasubhaga
kapOlakarNakaNThanAsO vigUDhasmitavadanamahOtsavEna puravanitAnAM manasi kusuma
zarAsanamupadadhAnaH parAgavalambamAnakuTilajaTilakapizakEzabhUribhArO'vadhUtamalinanija
zarIrENa grahagRhIta ivAdRzyata||31||

yarhi vAva sa bhagavAnlOkamimaM yOgasyAddhA pratIpamivAcakSANastatpratikriyAkarma
bIbhatsitamiti vratamAjagaramAsthitaH zayAna EvAznAti pibati khAdatyavamEhati hadati sma cESTamAna
uccarita AdigdhOddEzaH||32||

tasya ha yaH purISasurabhisaugandhyavAyustaM dEzaM dazayOjanaM samantAtsurabhiM cakAra||33||

EvaM gOmRgakAkacaryayA vrajaMstiSThannAsInaH zayAnaH kAkamRgagOcaritaH pibati
khAdatyavamEhati sma||34||

iti nAnAyOgacaryAcaraNO bhagavAnkaivalyapatirRSabhO'virataparamamahAnandAnubhava Atmani
sarvESAM bhUtAnAmAtmabhUtE bhagavati vAsudEva AtmanO'vyavadhAnAnantarOdarabhAvEna siddha
samastArthaparipUrNO yOgaizvaryANi vaihAyasamanOjavAntardhAnaparakAyapravEzadUragrahaNAdIni
yadRcchayOpagatAni nAJjasA nRpa hRdayEnAbhyanandat||35||