From StotraSamhita
< Bhagavatam | Skandha 10
SaDazItitamO'dhyAyaH
zrIrAjOvAca
brahmanvEditumicchAmaH svasArAM rAmakRSNayOH| yathOpayEmE vijayO yA mamAsItpitAmahI||1|| |
zrIzuka uvAca
arjunastIrthayAtrAyAM paryaTannavanIM prabhuH| gataH prabhAsamazRNOnmAtulEyIM sa AtmanaH||2|| |
duryOdhanAya rAmastAM dAsyatIti na cAparE| tallipsuH sa yatirbhUtvA tridaNDI dvArakAmagAt||3|| |
tatra vai vArSitAnmAsAnavAtsItsvArthasAdhakaH| pauraiH sabhAjitO'bhIkSNaM rAmENAjAnatA ca saH||4|| |
EkadA gRhamAnIya AtithyEna nimantrya tam| zraddhayOpahRtaM bhaikSyaM balEna bubhujE kila||5|| |
sO'pazyattatra mahatIM kanyAM vIramanOharAm| prItyutphullEkSaNastasyAM bhAvakSubdhaM manO dadhE||6|| |
sApi taM cakamE vIkSya nArINAM hRdayaGgamam| hasantI vrIDitApaGgI tannyastahRdayEkSaNA||7|| |
tAM paraM samanudhyAyannantaraM prEpsurarjunaH| na lEbhE zaM bhramaccittaH kAmEnAtibalIyasA||8|| |
mahatyAM dEvayAtrAyAM rathasthAM durganirgatAM| jahArAnumataH pitrOH kRSNasya ca mahArathaH||9|| |
rathasthO dhanurAdAya zUrAMzcArundhatO bhaTAn| vidrAvya krOzatAM svAnAM svabhAgaM mRgarADiva||10|| |
tacchrutvA kSubhitO rAmaH parvaNIva mahArNavaH| gRhItapAdaH kRSNEna suhRdbhizcAnusAntvitaH||11|| |
prAhiNOtpAribarhANi varavadhvOrmudA balaH| mahAdhanOpaskarEbha rathAzvanarayOSitaH||12|| |
zrIzuka uvAca
kRSNasyAsIddvijazrESThaH zrutadEva iti zrutaH| kRSNaikabhaktyA pUrNArthaH zAntaH kaviralampataH||13|| |
sa uvAsa vidEhESu mithilAyAM gRhAzramI| anIhayAgatAhArya nirvartitanijakriyaH||14|| |
yAtrAmAtraM tvaharahardaivAdupanamatyuta| nAdhikaM tAvatA tuSTaH kriyA cakrE yathOcitAH||15|| |
tathA tadrASTrapAlO'Gga bahulAzva iti zrutaH| maithilO nirahammAna ubhAvapyacyutapriyau||16|| |
tayOH prasannO bhagavAndArukENAhRtaM ratham| Aruhya sAkaM munibhirvidEhAnprayayau prabhuH||17|| |
nAradO vAmadEvO'triH kRSNO rAmO'sitO'ruNiH| ahaM bRhaspatiH kaNvO maitrEyazcyavanAdayaH||18|| |
tatra tatra tamAyAntaM paurA jAnapadA nRpa| upatasthuH sArghyahastA grahaiH sUryamivOditam||19|| |
AnartadhanvakurujAGgalakaGkamatsya pAJcAlakuntimadhukEkayakOzalArNAH| anyE ca tanmukhasarOjamudArahAsa snigdhEkSaNaM nRpa papurdRzibhirnrnAryaH||20|| |
tEbhyaH svavIkSaNavinaSTatamisradRgbhyaH kSEmaM trilOkagururarthadRzaM ca yacchan| zRNvandigantadhavalaM svayazO'zubhaghnaM gItaM surairnRbhiragAcchanakairvidEhAn||21|| |
tE'cyutaM prAptamAkarNya paurA jAnapadA nRpa| abhIyurmuditAstasmai gRhItArhaNapANayaH||22|| |
dRSTvA ta uttamaHzlOkaM prItyutphulAnanAzayAH| kairdhRtAJjalibhirnEmuH zrutapUrvAMstathA munIn||23|| |
svAnugrahAya samprAptaM manvAnau taM jagadgurum| maithilaH zrutadEvazca pAdayOH pEtatuH prabhOH||24|| |
nyamantrayEtAM dAzArhamAtithyEna saha dvijaiH| maithilaH zrutadEvazca yugapatsaMhatAJjalI||25|| |
bhagavAMstadabhiprEtya dvayOH priyacikIrSayA| ubhayOrAvizadgEhamubhAbhyAM tadalakSitaH||26|| |
zrAntAnapyatha tAndUrAjjanakaH svagRhAgatAn| AnItESvAsanAgryESu sukhAsInAnmahAmanAH||27|| |
pravRddhabhaktyA uddharSa hRdayAsrAvilEkSaNaH| natvA tadaGghrInprakSAlya tadapO lOkapAvanIH||28|| |
sakuTumbO vahanmUrdhnA pUjayAM cakra IzvarAn| gandhamAlyAmbarAkalpa dhUpadIpArghyagOvRSaiH||29|| |
vAcA madhurayA prINannidamAhAnnatarpitAn| pAdAvaGkagatau viSNOH saMspRzaJchanakairmudA||30|| |
zrIbahulAzva uvAca
bhavAnhi sarvabhUtAnAmAtmA sAkSI svadRgvibhO| atha nastvatpadAmbhOjaM smaratAM darzanaM gataH||31|| |
svavacastadRtaM kartumasmaddRggOcarO bhavAn| yadAtthaikAntabhaktAnmE nAnantaH zrIrajaH priyaH||32|| |
kO nu tvaccaraNAmbhOjamEvaMvidvisRjEtpumAn| niSkiJcanAnAM zAntAnAM munInAM yastvamAtmadaH||33|| |
yO'vatIrya yadOrvaMzE nRNAM saMsaratAmiha| yazO vitEnE tacchAntyai trailOkyavRjinApaham||34|| |
namastubhyaM bhagavatE kRSNAyAkuNThamEdhasE| nArAyaNAya RSayE suzAntaM tapa IyuSE||35|| |
dinAni katicidbhUmangRhAnnO nivasa dvijaiH| samEtaH pAdarajasA punIhIdaM nimEH kulam||36|| |
ityupAmantritO rAjJA bhagavAMllOkabhAvanaH| uvAsa kurvankalyANaM mithilAnarayOSitAm||37|| |
zrutadEvO'cyutaM prAptaM svagRhAJjanakO yathA| natvA munInsusaMhRSTO dhunvanvAsO nanarta ha||38|| |
tRNapIThabRSISvEtAnAnItESUpavEzya saH| svAgatEnAbhinandyAGghrInsabhAryO'vanijE mudA||39|| |
tadambhasA mahAbhAga AtmAnaM sagRhAnvayam| snApayAM cakra uddharSO labdhasarvamanOrathaH||40|| |
phalArhaNOzIrazivAmRtAmbubhirmRdA surabhyA tulasIkuzAmbuyaiH| ArAdhayAmAsa yathOpapannayA saparyayA sattvavivardhanAndhasA||41|| |
sa tarkayAmAsa kutO mamAnvabhUtgRhAndhakupE patitasya saGgamaH| yaH sarvatIrthAspadapAdarENubhiH kRSNEna cAsyAtmanikEtabhUsuraiH||42|| |
sUpaviSTAnkRtAtithyAnzrutadEva upasthitaH| sabhAryasvajanApatya uvAcAGghryabhimarzanaH||43|| |
zrutadEva uvAca
nAdya nO darzanaM prAptaH paraM paramapUruSaH| yarhIdaM zaktibhiH sRSTvA praviSTO hyAtmasattayA||44|| |
yathA zayAnaH puruSO manasaivAtmamAyayA| sRSTvA lOkaM paraM svApnamanuvizyAvabhAsatE||45|| |
zRNvatAM gadatAM zazvadarcatAM tvAbhivandatAm| NRNAM saMvadatAmantarhRdi bhAsyamalAtmanAm||46|| |
hRdisthO'pyatidUrasthaH karmavikSiptacEtasAm| AtmazaktibhiragrAhyO'pyantyupEtaguNAtmanAm||47|| |
namO'stu tE'dhyAtmavidAM parAtmanE anAtmanE svAtmavibhaktamRtyavE| sakAraNAkAraNaliGgamIyuSE svamAyayAsaMvRtaruddhadRSTayE||48|| |
sa tvaM zAdhi svabhRtyAnnaH kiM dEva karavAma hE| EtadantO nRNAM klEzO yadbhavAnakSigOcaraH||49|| |
zrIzuka uvAca
taduktamityupAkarNya bhagavAnpraNatArtihA| gRhItvA pANinA pANiM prahasaMstamuvAca ha||50|| |
zrIbhagavAnuvAca
brahmaMstE'nugrahArthAya samprAptAnviddhyamUnmunIn| saJcaranti mayA lOkAnpunantaH pAdarENubhiH||51|| |
dEvAH kSEtrANi tIrthAni darzanasparzanArcanaiH| zanaiH punanti kAlEna tadapyarhattamEkSayA||52|| |
brAhmaNO janmanA zrEyAnsarvESAmprANinAmiha| tapasA vidyayA tuSTyA kimu matkalayA yutaH||53|| |
na brAhmaNAnmE dayitaM rUpamEtaccaturbhujam| sarvavEdamayO vipraH sarvadEvamayO hyaham||54|| |
duSprajJA aviditvaivamavajAnantyasUyavaH| guruM mAM vipramAtmAnamarcAdAvijyadRSTayaH||55|| |
carAcaramidaM vizvaM bhAvA yE cAsya hEtavaH| madrUpANIti cEtasyAdhattE viprO madIkSayA||56|| |
tasmAdbrahmaRSInEtAnbrahmanmacchraddhayArcaya| EvaM cEdarcitO'smyaddhA nAnyathA bhUribhUtibhiH||57|| |
zrIzuka uvAca
sa itthaM prabhunAdiSTaH sahakRSNAndvijOttamAn| ArAdhyaikAtmabhAvEna maithilazcApa sadgatim||58|| |
EvaM svabhaktayO rAjanbhagavAnbhaktabhaktimAn uSitvAdizya sanmArgaM punardvAravatImagAt||59|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE SaDazItitamO'dhyAyaH||
