trayastriMzO'dhyAyaH

itthaM bhagavatO gOpyaH zrutvA vAcaH supEzalAH|
jahurvirahajaM tApaM tadaGgOpacitAziSaH||1||

tatrArabhata gOvindO rAsakrIDAmanuvrataiH|
strIratnairanvitaH prItairanyOnyAbaddhabAhubhiH||2||

rAsOtsavaH sampravRttO gOpImaNDalamaNDitaH
yOgEzvarENa kRSNEna tAsAM madhyE dvayOrdvayOH
praviSTEna gRhItAnAM kaNThE svanikaTaM striyaH
yaM manyErannabhastAvadvimAnazatasaGkulam
divaukasAM sadArANAmautsukyApahRtAtmanAm||3||

tatO dundubhayO nEdurnipEtuH puSpavRSTayaH|
jagurgandharvapatayaH sastrIkAstadyazO'malam||4||

valayAnAM nUpurANAM kiGkiNInAM ca yOSitAm|
sapriyANAmabhUcchabdastumulO rAsamaNDalE||5||

tatrAtizuzubhE tAbhirbhagavAndEvakIsutaH|
madhyE maNInAM haimAnAM mahAmarakatO yathA||6||

pAdanyAsairbhujavidhutibhiH sasmitairbhrUvilAsair
bhajyanmadhyaizcalakucapaTaiH kuNDalairgaNDalOlaiH|
svidyanmukhyaH kavararasanAgranthayaH kRSNavadhvO
gAyantyastaM taDita iva tA mEghacakrE virEjuH||7||

uccairjagurnRtyamAnA raktakaNThyO ratipriyAH|
kRSNAbhimarzamuditA yadgItEnEdamAvRtam||8||

kAcitsamaM mukundEna svarajAtIramizritAH
unninyE pUjitA tEna prIyatA sAdhu sAdhviti
tadEva dhruvamunninyE tasyai mAnaM ca bahvadAt||9||

kAcidrAsaparizrAntA pArzvasthasya gadAbhRtaH|
jagrAha bAhunA skandhaM zlathadvalayamallikA||10||

tatraikAMsagataM bAhuM kRSNasyOtpalasaurabham|
candanAliptamAghrAya hRSTarOmA cucumba ha||11||

kasyAzcinnATyavikSipta kuNDalatviSamaNDitam|
gaNDaM gaNDE sandadhatyAH prAdAttAmbUlacarvitam||12||

nRtyatI gAyatI kAcitkUjannUpuramEkhalA|
pArzvasthAcyutahastAbjaM zrAntAdhAtstanayOH zivam||13||

gOpyO labdhvAcyutaM kAntaM zriya EkAntavallabham|
gRhItakaNThyastaddOrbhyAM gAyantyastamvijahrirE||14||

karNOtpalAlakaviTaGkakapOlagharma
vaktrazriyO valayanUpuraghOSavAdyaiH|
gOpyaH samaM bhagavatA nanRtuH svakEza
srastasrajO bhramaragAyakarAsagOSThyAm||15||

EvaM pariSvaGgakarAbhimarza snigdhEkSaNOddAmavilAsahAsaiH|
rEmE ramEzO vrajasundarIbhiryathArbhakaH svapratibimbavibhramaH||16||

tadaGgasaGgapramudAkulEndriyAH kEzAndukUlaM kucapaTTikAM vA|
nAJjaH prativyODhumalaM vrajastriyO visrastamAlAbharaNAH kurUdvaha||17||

kRSNavikrIDitaM vIkSya mumuhuH khEcarastriyaH|
kAmArditAH zazAGkazca sagaNO vismitO'bhavat||18||

kRtvA tAvantamAtmAnaM yAvatIrgOpayOSitaH|
rEmE sa bhagavAMstAbhirAtmArAmO'pi lIlayA||19||

tAsAM rativihArENa zrAntAnAM vadanAni saH|
prAmRjatkaruNaH prEmNA zantamEnAGga pANinA||20||

gOpyaH sphuratpuraTakuNDalakuntalatviD
gaNDazriyA sudhitahAsanirIkSaNEna|
mAnaM dadhatya RSabhasya jaguH kRtAni
puNyAni tatkararuhasparzapramOdAH||21||

tAbhiryutaH zramamapOhitumaGgasaGga
ghRSTasrajaH sa kucakuGkumaraJjitAyAH|
gandharvapAlibhiranudruta AvizadvAH
zrAntO gajIbhiribharADiva bhinnasEtuH||22||

sO'mbhasyalaM yuvatibhiH pariSicyamAnaH
prEmNEkSitaH prahasatIbhiritastatO'Gga|
vaimAnikaiH kusumavarSibhirIdyamAnO
rEmE svayaM svaratiratra gajEndralIlaH||23||

tatazca kRSNOpavanE jalasthala prasUnagandhAnilajuSTadiktaTE|
cacAra bhRGgapramadAgaNAvRtO yathA madacyuddviradaH karENubhiH||24||

EvaM zazAGkAMzuvirAjitA nizAH sa satyakAmO'nuratAbalAgaNaH|
siSEva AtmanyavaruddhasaurataH sarvAH zaratkAvyakathArasAzrayAH||25||

saMsthApanAya dharmasya prazamAyEtarasya ca|
avatIrNO hi bhagavAnaMzEna jagadIzvaraH||26||

sa kathaM dharmasEtUnAM vaktA kartAbhirakSitA|
pratIpamAcaradbrahmanparadArAbhimarzanam||27||

AptakAmO yadupatiH kRtavAnvai jugupsitam|
kimabhiprAya EtannaH zaMzayaM chindhi suvrata||28||

dharmavyatikramO dRSTa IzvarANAM ca sAhasam|
tEjIyasAM na dOSAya vahnEH sarvabhujO yathA||29||

naitatsamAcarEjjAtu manasApi hyanIzvaraH|
vinazyatyAcaranmauDhyAdyathArudrO'bdhijaM viSam||30||

IzvarANAM vacaH satyaM tathaivAcaritaM kvacit|
tESAM yatsvavacOyuktaM buddhimAMstatsamAcarEt||31||

kuzalAcaritEnaiSAmiha svArthO na vidyatE|
viparyayENa vAnarthO nirahaGkAriNAM prabhO||32||

kimutAkhilasattvAnAM tiryaGmartyadivaukasAm|
IzituzcEzitavyAnAM kuzalAkuzalAnvayaH||33||

yatpAdapaGkajaparAganiSEvatRptA
yOgaprabhAvavidhutAkhilakarmabandhAH|
svairaM caranti munayO'pi na nahyamAnAs
tasyEcchayAttavapuSaH kuta Eva bandhaH||34||

gOpInAM tatpatInAM ca sarvESAmEva dEhinAm|
yO'ntazcarati sO'dhyakSaH krIDanEnEha dEhabhAk||35||

anugrahAya bhaktAnAM mAnuSaM dEhamAsthitaH|
bhajatE tAdRzIH krIDa yAH zrutvA tatparO bhavEt||36||

nAsUyankhalu kRSNAya mOhitAstasya mAyayA|
manyamAnAH svapArzvasthAnsvAnsvAndArAnvrajaukasaH||37||

brahmarAtra upAvRttE vAsudEvAnumOditAH|
anicchantyO yayurgOpyaH svagRhAnbhagavatpriyAH||38||

vikrIDitaM vrajavadhUbhiridaM ca viSNOH
zraddhAnvitO'nuzRNuyAdatha varNayEdyaH
bhaktiM parAM bhagavati pratilabhya kAmaM
hRdrOgamAzvapahinOtyacirENa dhIraH||39||