From StotraSamhita

trayastriMzO'dhyAyaH

maitrEya uvAca

EvaM nizamya kapilasya vacO janitrIsA kardamasya dayitA kila dEvahUtiH| visrastamOhapaTalA tamabhipraNamyatuSTAva tattvaviSayAGkitasiddhibhUmim||1||

dEvahUtiruvAca

athApyajO'ntaHsalilE zayAnaM bhUtEndriyArthAtmamayaM vapustE| guNapravAhaM sadazESabIjaM dadhyau svayaM yajjaTharAbjajAtaH||2||

sa Eva vizvasya bhavAnvidhattE guNapravAhENa vibhaktavIryaH| sargAdyanIhO'vitathAbhisandhirAtmEzvarO'tarkyasahasrazaktiH||3||

sa tvaM bhRtO mE jaTharENa nAtha kathaM nu yasyOdara EtadAsIt| vizvaM yugAntE vaTapatra EkaH zEtE sma mAyAzizuraGghripAnaH||4||

tvaM dEhatantraH prazamAya pApmanAM nidEzabhAjAM ca vibhO vibhUtayE| yathAvatArAstava sUkarAdayastathAyamapyAtmapathOpalabdhayE||5||

yannAmadhEyazravaNAnukIrtanAdyatprahvaNAdyatsmaraNAdapi kvacit| zvAdO'pi sadyaH savanAya kalpatE kutaH punastE bhagavannu darzanAt||6||

ahO bata zvapacO'tO garIyAnyajjihvAgrE vartatE nAma tubhyam| tEpustapastE juhuvuH sasnurAryA brahmAnUcurnAma gRNanti yE tE||7||

taM tvAmahaM brahma paraM pumAMsaM pratyaksrOtasyAtmani saMvibhAvyam| svatEjasA dhvastaguNapravAhaM vandE viSNuM kapilaM vEdagarbham||8||

maitrEya uvAca

IDitO bhagavAnEvaM kapilAkhyaH paraH pumAn| vAcAviklavayEtyAha mAtaraM mAtRvatsalaH||9||

kapila uvAca

mArgENAnEna mAtastE susEvyEnOditEna mE| AsthitEna parAM kASThAmacirAdavarOtsyasi||10||

zraddhatsvaitanmataM mahyaM juSTaM yadbrahmavAdibhiH| yEna mAmabhayaM yAyA mRtyumRcchantyatadvidaH||11||

maitrEya uvAca

iti pradarzya bhagavAnsatIM tAmAtmanO gatim| svamAtrA brahmavAdinyA kapilO'numatO yayau||12||

sA cApi tanayOktEna yOgAdEzEna yOgayuk| tasminnAzrama ApIDE sarasvatyAH samAhitA||13||

abhIkSNAvagAhakapizAnjaTilAnkuTilAlakAn| AtmAnaM cOgratapasA bibhratI cIriNaM kRzam||14||

prajApatEH kardamasya tapOyOgavijRmbhitam| svagArhasthyamanaupamyaM prArthyaM vaimAnikairapi||15||

payaHphEnanibhAH zayyA dAntA rukmaparicchadAH| AsanAni ca haimAni susparzAstaraNAni ca||16||

svacchasphaTikakuDyESu mahAmArakatESu ca| ratnapradIpA AbhAnti lalanA ratnasaMyutAH||17||

gRhOdyAnaM kusumitai ramyaM bahvamaradrumaiH| kUjadvihaGgamithunaM gAyanmattamadhuvratam||18||

yatra praviSTamAtmAnaM vibudhAnucarA jaguH| vApyAmutpalagandhinyAM kardamEnOpalAlitam||19||

hitvA tadIpsitatamamapyAkhaNDalayOSitAm| kiJciccakAra vadanaM putravizlESaNAturA||20||

vanaM pravrajitE patyAvapatyavirahAturA| jJAtatattvApyabhUnnaSTE vatsE gauriva vatsalA||21||

tamEva dhyAyatI dEvamapatyaM kapilaM harim| babhUvAciratO vatsa niHspRhA tAdRzE gRhE||22||

dhyAyatI bhagavadrUpaM yadAha dhyAnagOcaram| sutaH prasannavadanaM samastavyastacintayA||23||

bhaktipravAhayOgEna vairAgyENa balIyasA| yuktAnuSThAnajAtEna jJAnEna brahmahEtunA||24||

vizuddhEna tadAtmAnamAtmanA vizvatOmukham| svAnubhUtyA tirObhUta mAyAguNavizESaNam||25||

brahmaNyavasthitamatirbhagavatyAtmasaMzrayE| nivRttajIvApattitvAtkSINaklEzAptanirvRtiH||26||

nityArUDhasamAdhitvAtparAvRttaguNabhramA| na sasmAra tadAtmAnaM svapnE dRSTamivOtthitaH||27||

taddEhaH parataH pOSO'pyakRzazcAdhyasambhavAt| babhau malairavacchannaH sadhUma iva pAvakaH||28||

svAGgaM tapOyOgamayaM muktakEzaM gatAmbaram| daivaguptaM na bubudhE vAsudEvapraviSTadhIH||29||

EvaM sA kapilOktEna mArgENAcirataH param| AtmAnaM brahmanirvANaM bhagavantamavApa ha||30||

tadvIrAsItpuNyatamaM kSEtraM trailOkyavizrutam| nAmnA siddhapadaM yatra sA saMsiddhimupEyuSI||31||

tasyAstadyOgavidhuta mArtyaM martyamabhUtsarit| srOtasAM pravarA saumya siddhidA siddhasEvitA||32||

kapilO'pi mahAyOgI bhagavAnpiturAzramAt| mAtaraM samanujJApya prAgudIcIM dizaM yayau||33||

siddhacAraNagandharvairmunibhizcApsarOgaNaiH| stUyamAnaH samudrENa dattArhaNanikEtanaH||34||

AstE yOgaM samAsthAya sAGkhyAcAryairabhiSTutaH| trayANAmapi lOkAnAmupazAntyai samAhitaH||35||

EtannigaditaM tAta yatpRSTO'haM tavAnagha| kapilasya ca saMvAdO dEvahUtyAzca pAvanaH||36||

ya idamanuzRNOti yO'bhidhattE kapilamunErmatamAtmayOgaguhyam bhagavati kRtadhIH suparNakEtAvupalabhatE bhagavatpadAravindam||37||

||iti zrImadbhAgavatE mahApurANE pAramahaMsyAM saMhitAyAM tRtIyaskandhE trayastriMzO'dhyAyaH||

See Also

• http://vedabase.net/sb/3/33/en