From StotraSamhita
< Bhagavatam | Skandha 04
dwAdazO'dhyAyaH
maitrEya uvAca
dhruvaM nivRttaM pratibuddhya vaizasAdapEtamanyuM bhagavAndhanEzvaraH| tatrAgatazcAraNayakSakinnaraiH saMstUyamAnO nyavadatkRtAJjalim||1|| |
dhanada uvAca
bhO bhOH kSatriyadAyAda parituSTO'smi tE'nagha| yattvaM pitAmahAdEzAdvairaM dustyajamatyajaH||2|| |
na bhavAnavadhIdyakSAnna yakSA bhrAtaraM tava| kAla Eva hi bhUtAnAM prabhurapyayabhAvayOH||3|| |
ahaM tvamityapArthA dhIrajJAnAtpuruSasya hi| svApnIvAbhAtyataddhyAnAdyayA bandhaviparyayau||4|| |
tadgaccha dhruva bhadraM tE bhagavantamadhOkSajam| sarvabhUtAtmabhAvEna sarvabhUtAtmavigraham||5|| |
bhajasva bhajanIyAGghrimabhavAya bhavacchidam| yuktaM virahitaM zaktyA guNamayyAtmamAyayA||6|| |
vRNIhi kAmaM nRpa yanmanOgataM mattastvamauttAnapadE'vizaGkitaH| varaM varArhO'mbujanAbhapAdayOranantaraM tvAM vayamaGga zuzruma||7|| |
maitrEya uvAca
sa rAjarAjEna varAya cOditO dhruvO mahAbhAgavatO mahAmatiH| harau sa vavrE'calitAM smRtiM yayA taratyayatnEna duratyayaM tamaH||8|| |
tasya prItEna manasA tAM dattvaiDaviDastataH| pazyatO'ntardadhE sO'pi svapuraM pratyapadyata||9|| |
athAyajata yajJEzaM kratubhirbhUridakSiNaiH| dravyakriyAdEvatAnAM karma karmaphalapradam||10|| |
sarvAtmanyacyutE'sarvE tIvraughAM bhaktimudvahan| dadarzAtmani bhUtESu tamEvAvasthitaM vibhum||11|| |
tamEvaM zIlasampannaM brahmaNyaM dInavatsalam| gOptAraM dharmasEtUnAM mEnirE pitaraM prajAH||12|| |
SaTtriMzadvarSasAhasraM zazAsa kSitimaNDalam| bhOgaiH puNyakSayaM kurvannabhOgairazubhakSayam||13|| |
EvaM bahusavaM kAlaM mahAtmAvicalEndriyaH| trivargaupayikaM nItvA putrAyAdAnnRpAsanam||14|| |
manyamAna idaM vizvaM mAyAracitamAtmani| avidyAracitasvapnagandharvanagarOpamam||15|| |
AtmastryapatyasuhRdO balamRddhakOzam antaHpuraM parivihArabhuvazca ramyAH| bhUmaNDalaM jaladhimEkhalamAkalayya kAlOpasRSTamiti sa prayayau vizAlAm||16|| |
tasyAM vizuddhakaraNaH zivavArvigAhya baddhvAsanaM jitamarunmanasAhRtAkSaH| sthUlE dadhAra bhagavatpratirUpa Etad dhyAyaMstadavyavahitO vyasRjatsamAdhau||17|| |
bhaktiM harau bhagavati pravahannajasram AnandabASpakalayA muhurardyamAnaH| viklidyamAnahRdayaH pulakAcitAGgO nAtmAnamasmaradasAviti muktaliGgaH||18|| |
sa dadarza vimAnAgryaM nabhasO'vataraddhruvaH| vibhrAjayaddaza dizO rAkApatimivOditam||19|| |
tatrAnu dEvapravarau caturbhujau zyAmau kizOrAvaruNAmbujEkSaNau| sthitAvavaSTabhya gadAM suvAsasau kirITahArAGgadacArukuNDalau||20|| |
vijJAya tAvuttamagAyakiGkarAv abhyutthitaH sAdhvasavismRtakramaH| nanAma nAmAni gRNanmadhudviSaH pArSatpradhAnAviti saMhatAJjaliH||21|| |
taM kRSNapAdAbhiniviSTacEtasaM baddhAJjaliM prazrayanamrakandharam| sunandanandAvupasRtya sasmitaM pratyUcatuH puSkaranAbhasammatau||22|| |
sunandanandAvUcatuH
bhO bhO rAjansubhadraM tE vAcaM nO'vahitaH zRNu| yaH paJcavarSastapasA bhavAndEvamatItRpat||23|| |
tasyAkhilajagaddhAturAvAM dEvasya zArGgiNaH| pArSadAviha samprAptau nEtuM tvAM bhagavatpadam||24|| |
sudurjayaM viSNupadaM jitaM tvayA yatsUrayO'prApya vicakSatE param| AtiSTha taccandradivAkarAdayO graharkSatArAH pariyanti dakSiNam||25|| |
anAsthitaM tE pitRbhiranyairapyaGga karhicit| AtiSTha jagatAM vandyaM tadviSNOH paramaM padam||26|| |
EtadvimAnapravaramuttamazlOkamaulinA| upasthApitamAyuSmannadhirODhuM tvamarhasi||27|| |
maitrEya uvAca
nizamya vaikuNThaniyOjyamukhyayOrmadhucyutaM vAcamurukramapriyaH| kRtAbhiSEkaH kRtanityamaGgalO munInpraNamyAziSamabhyavAdayat||28|| |
parItyAbhyarcya dhiSNyAgryaM pArSadAvabhivandya ca| iyESa tadadhiSThAtuM bibhradrUpaM hiraNmayam||29|| |
tadOttAnapadaH putrO dadarzAntakamAgatam| mRtyOrmUrdhni padaM dattvA ArurOhAdbhutaM gRham||30|| |
tadA dundubhayO nEdurmRdaGgapaNavAdayaH| gandharvamukhyAH prajaguH pEtuH kusumavRSTayaH||31|| |
sa ca svarlOkamArOkSyansunItiM jananIM dhruvaH| anvasmaradagaM hitvA dInAM yAsyE triviSTapam||32|| |
iti vyavasitaM tasya vyavasAya surOttamau| darzayAmAsaturdEvIM purO yAnEna gacchatIm||33|| |
tatra tatra prazaMsadbhiH pathi vaimAnikaiH suraiH| avakIryamANO dadRzE kusumaiH kramazO grahAn||34|| |
trilOkIM dEvayAnEna sO'tivrajya munInapi| parastAdyaddhruvagatirviSNOH padamathAbhyagAt||35|| |
yadbhrAjamAnaM svarucaiva sarvatO lOkAstrayO hyanu vibhrAjanta EtE| yannAvrajanjantuSu yE'nanugrahA vrajanti bhadrANi caranti yE'nizam||36|| |
zAntAH samadRzaH zuddhAH sarvabhUtAnuraJjanAH| yAntyaJjasAcyutapadamacyutapriyabAndhavAH||37|| |
ityuttAnapadaH putrO dhruvaH kRSNaparAyaNaH| abhUttrayANAM lOkAnAM cUDAmaNirivAmalaH||38|| |
gambhIravEgO'nimiSaM jyOtiSAM cakramAhitam| yasminbhramati kauravya mEDhyAmiva gavAM gaNaH||39|| |
mahimAnaM vilOkyAsya nAradO bhagavAnRSiH| AtOdyaM vitudaJzlOkAnsatrE'gAyatpracEtasAm||40|| |
nArada uvAca
nUnaM sunItEH patidEvatAyAstapaHprabhAvasya sutasya tAM gatim| dRSTvAbhyupAyAnapi vEdavAdinO naivAdhigantuM prabhavanti kiM nRpAH||41|| |
yaH paJcavarSO gurudAravAkSarairbhinnEna yAtO hRdayEna dUyatA| vanaM madAdEzakarO'jitaM prabhuM jigAya tadbhaktaguNaiH parAjitam||42|| |
yaH kSatrabandhurbhuvi tasyAdhirUDhamanvArurukSEdapi varSapUgaiH| SaTpaJcavarSO yadahObhiralpaiH prasAdya vaikuNThamavApa tatpadam||43|| |
maitrEya uvAca
EtattE'bhihitaM sarvaM yatpRSTO'hamiha tvayA| dhruvasyOddAmayazasazcaritaM sammataM satAm||44|| |
dhanyaM yazasyamAyuSyaM puNyaM svastyayanaM mahat| svargyaM dhrauvyaM saumanasyaM prazasyamaghamarSaNam||45|| |
zrutvaitacchraddhayAbhIkSNamacyutapriyacESTitam| bhavEdbhaktirbhagavati yayA syAtklEzasaGkSayaH||46|| |
mahattvamicchatAM tIrthaM zrOtuH zIlAdayO guNAH| yatra tEjastadicchUnAM mAnO yatra manasvinAm||47|| |
prayataH kIrtayEtprAtaH samavAyE dvijanmanAm| sAyaM ca puNyazlOkasya dhruvasya caritaM mahat||48|| |
paurNamAsyAM sinIvAlyAM dvAdazyAM zravaNE'thavA| dinakSayE vyatIpAtE saGkramE'rkadinE'pi vA||49|| |
zrAvayEcchraddadhAnAnAM tIrthapAdapadAzrayaH| nEcchaMstatrAtmanAtmAnaM santuSTa iti sidhyati||50|| |
jJAnamajJAtatattvAya yO dadyAtsatpathE'mRtam| kRpAlOrdInanAthasya dEvAstasyAnugRhNatE||51|| |
idaM mayA tE'bhihitaM kurUdvaha dhruvasya vikhyAtavizuddhakarmaNaH hitvArbhakaH krIDanakAni mAturgRhaM ca viSNuM zaraNaM yO jagAma||52|| |
||iti zrImadbhAgavatE mahApurANE pAramahaMsyAM saMhitAyAM caturthaskandhE dwAdazO'dhyAyaH||
