Jump to: navigation, search

paJcamO'dhyAyaH

maitrEya uvAca

bhavO bhavAnyA nidhanaM prajApatErasatkRtAyA avagamya nAradAt|
svapArSadasainyaM ca tadadhvararbhubhirvidrAvitaM krOdhamapAramAdadhE||1||

kruddhaH sudaSTauSThapuTaH sa dhUrjaTirjaTAM taDidvahnisaTOgrarOciSam|
utkRtya rudraH sahasOtthitO hasangambhIranAdO visasarja tAM bhuvi||2||

tatO'tikAyastanuvA spRzandivaM sahasrabAhurghanaruktrisUryadRk|
karAladaMSTrO jvaladagnimUrdhajaH kapAlamAlI vividhOdyatAyudhaH||3||

taM kiM karOmIti gRNantamAha baddhAJjaliM bhagavAnbhUtanAthaH|
dakSaM sayajJaM jahi madbhaTAnAM tvamagraNI rudra bhaTAMzakO mE||4||

AjJapta EvaM kupitEna manyunA sa dEvadEvaM paricakramE vibhum|
mEnEtadAtmAnamasaGgaraMhasA mahIyasAM tAta sahaH sahiSNum||5||

anvIyamAnaH sa tu rudrapArSadairbhRzaM nadadbhirvyanadatsubhairavam|
udyamya zUlaM jagadantakAntakaM samprAdravadghOSaNabhUSaNAGghriH||6||

athartvijO yajamAnaH sadasyAH kakubhyudIcyAM prasamIkSya rENum|
tamaH kimEtatkuta EtadrajO'bhUditi dvijA dvijapatnyazca dadhyuH||7||

vAtA na vAnti na hi santi dasyavaH prAcInabarhirjIvati hOgradaNDaH|
gAvO na kAlyanta idaM kutO rajO lOkO'dhunA kiM pralayAya kalpatE||8||

prasUtimizrAH striya udvignacittA UcurvipAkO vRjinasyaiva tasya|
yatpazyantInAM duhitRRNAM prajEzaH sutAM satImavadadhyAvanAgAm||9||

yastvantakAlE vyuptajaTAkalApaH svazUlasUcyarpitadiggajEndraH|
vitatya nRtyatyuditAstradOrdhvajAnuccATTahAsastanayitnubhinnadik||10||

amarSayitvA tamasahyatEjasaM manyuplutaM durnirIkSyaM bhrukuTyA|
karAladaMSTrAbhirudastabhAgaNaM syAtsvasti kiM kOpayatO vidhAtuH||11||

bahvEvamudvignadRzOcyamAnE janEna dakSasya muhurmahAtmanaH|
utpEturutpAtatamAH sahasrazO bhayAvahA divi bhUmau ca paryak||12||

tAvatsa rudrAnucarairmahAmakhO nAnAyudhairvAmanakairudAyudhaiH|
piGgaiH pizaGgairmakarOdarAnanaiH paryAdravadbhirvidurAnvarudhyata||13||

kEcidbabhaJjuH prAgvaMzaM patnIzAlAM tathAparE|
sada AgnIdhrazAlAM ca tadvihAraM mahAnasam||14||

rurujuryajJapAtrANi tathaikE'gnInanAzayan|
kuNDESvamUtrayankEcidbibhidurvEdimEkhalAH||15||

abAdhanta munInanyE EkE patnIratarjayan|
aparE jagRhurdEvAnpratyAsannAnpalAyitAn||16||

bhRguM babandha maNimAnvIrabhadraH prajApatim|
caNDEzaH pUSaNaM dEvaM bhagaM nandIzvarO'grahIt||17||

sarva EvartvijO dRSTvA sadasyAH sadivaukasaH|
tairardyamAnAH subhRzaM grAvabhirnaikadhAdravan||18||

juhvataH sruvahastasya zmazrUNi bhagavAnbhavaH|
bhRgOrluluJcE sadasi yO'hasacchmazru darzayan||19||

bhagasya nEtrE bhagavAnpAtitasya ruSA bhuvi|
ujjahAra sadasthO'kSNA yaH zapantamasUsucat||20||

pUSNO hyapAtayaddantAnkAliGgasya yathA balaH|
zapyamAnE garimaNi yO'hasaddarzayandataH||21||

AkramyOrasi dakSasya zitadhArENa hEtinA|
chindannapi taduddhartuM nAzaknOttryambakastadA||22||

zastrairastrAnvitairEvamanirbhinnatvacaM haraH|
vismayaM paramApannO dadhyau pazupatizciram||23||

dRSTvA saMjJapanaM yOgaM pazUnAM sa patirmakhE|
yajamAnapazOH kasya kAyAttEnAharacchiraH||24||

sAdhuvAdastadA tESAM karma tattasya pazyatAm|
bhUtaprEtapizAcAnAm anyESAM tadviparyayaH||25||

juhAvaitacchirastasmindakSiNAgnAvamarSitaH
taddEvayajanaM dagdhvA prAtiSThadguhyakAlayam||26||

||iti zrImadbhAgavatE mahApurANE pAramahaMsyAM saMhitAyAM caturthaskandhE paJcamO'dhyAyaH||

See Also