trayOdazO'dhyAyaH

duratyayE'dhvanyajayA nivEzitO rajastamaHsattvavibhaktakarmadRk|
sa ESa sArthO'rthaparaH paribhramanbhavATavIM yAti na zarma vindati||1||

yasyAmimE SaNnaradEva dasyavaH sArthaM vilumpanti kunAyakaM balAt|
gOmAyavO yatra haranti sArthikaM pramattamAvizya yathOraNaM vRkAH||2||

prabhUtavIruttRNagulmagahvarE kaThOradaMzairmazakairupadrutaH|
kvacittu gandharvapuraM prapazyati kvacitkvaciccAzurayOlmukagraham||3||

nivAsatOyadraviNAtmabuddhistatastatO dhAvati bhO aTavyAm|
kvacicca vAtyOtthitapAMsudhUmrA dizO na jAnAti rajasvalAkSaH||4||

adRzyajhillIsvanakarNazUla ulUkavAgbhirvyathitAntarAtmA|
apuNyavRkSAnzrayatE kSudhArditO marIcitOyAnyabhidhAvati kvacit||5||

kvacidvitOyAH saritO'bhiyAti parasparaM cAlaSatE nirandhaH|
AsAdya dAvaM kvacidagnitaptO nirvidyatE kva ca yakSairhRtAsuH||6||

zUrairhRtasvaH kva ca nirviNNacEtAH zOcanvimuhyannupayAti kazmalam|
kvacicca gandharvapuraM praviSTaH pramOdatE nirvRtavanmuhUrtam||7||

calankvacitkaNTakazarkarAGghrirnagArurukSurvimanA ivAstE|
padE padE'bhyantaravahninArditaH kauTumbikaH krudhyati vai janAya||8||

kvacinnigIrNO'jagarAhinA janO nAvaiti kiJcidvipinE'paviddhaH|
daSTaH sma zEtE kva ca dandazUkairandhO'ndhakUpE patitastamisrE||9||

karhi sma citkSudrarasAnvicinvaMstanmakSikAbhirvyathitO vimAnaH|
tatrAtikRcchrAtpratilabdhamAnO balAdvilumpantyatha taM tatO'nyE||10||

kvacicca zItAtapavAtavarSa pratikriyAM kartumanIza AstE|
kvacinmithO vipaNanyacca kiJcidvidvESamRcchatyuta vittazAThyAt||11||

kvacitkvacitkSINadhanastu tasminzayyAsanasthAnavihArahInaH|
yAcanparAdapratilabdhakAmaH pArakyadRSTirlabhatE'vamAnam||12||

anyOnyavittavyatiSaGgavRddha vairAnubandhO vivahanmithazca|
adhvanyamuSminnurukRcchravitta bAdhOpasargairviharanvipannaH||13||

tAMstAnvipannAnsa hi tatra tatra vihAya jAtaM parigRhya sArthaH|
AvartatE'dyApi na kazcidatra vIrAdhvanaH pAramupaiti yOgam||14||

manasvinO nirjitadiggajEndrA mamEti sarvE bhuvi baddhavairAH|
mRdhE zayIranna tu tadvrajanti yannyastadaNDO gatavairO'bhiyAti||15||

prasajjati kvApi latAbhujAzrayastadAzrayAvyaktapadadvijaspRhaH|
kvacitkadAciddharicakratastrasansakhyaM vidhattE bakakaGkagRdhraiH||16||

tairvaJcitO haMsakulaM samAvizannarOcayanzIlamupaiti vAnarAn|
tajjAtirAsEna sunirvRtEndriyaH parasparOdvIkSaNavismRtAvadhiH||17||

drumESu raMsyansutadAravatsalO vyavAyadInO vivazaH svabandhanE|
kvacitpramAdAdgirikandarE patanvallIM gRhItvA gajabhIta AsthitaH||18||

ataH kathaJcitsa vimukta ApadaH punazca sArthaM pravizatyarindama|
adhvanyamuSminnajayA nivEzitO bhramaJjanO'dyApi na vEda kazcana||19||

rahUgaNa tvamapi hyadhvanO'sya sannyastadaNDaH kRtabhUtamaitraH|
asajjitAtmA harisEvayA zitaM jJAnAsimAdAya tarAtipAram||20||

ahO nRjanmAkhilajanmazObhanaM kiM janmabhistvaparairapyamuSmin|
na yaddhRSIkEzayazaHkRtAtmanAM mahAtmanAM vaH pracuraH samAgamaH||21||

na hyadbhutaM tvaccaraNAbjarENubhirhatAMhasO bhaktiradhOkSajE'malA|
mauhUrtikAdyasya samAgamAcca mE dustarkamUlO'pahatO'vivEkaH||22||

namO mahadbhyO'stu namaH zizubhyO namO yuvabhyO nama AvaTubhyaH|
yE brAhmaNA gAmavadhUtaliGgAzcaranti tEbhyaH zivamastu rAjJAm||23||

ityEvamuttarAmAtaH sa vai brahmarSisutaH sindhupataya AtmasatattvaM vigaNayataH
parAnubhAvaH paramakAruNikatayOpadizya rahUgaNEna sakaruNamabhivanditacaraNa ApUrNArNava iva
nibhRtakaraNOrmyAzayO dharaNimimAM vicacAra||24||

sauvIrapatirapi sujanasamavagataparamAtmasatattva AtmanyavidyAdhyArOpitAM ca dEhAtma
matiM visasarja EvaM hi nRpa bhagavadAzritAzritAnubhAvaH||25||

yO ha vA iha bahuvidA mahAbhAgavata tvayAbhihitaH parOkSENa vacasA jIvalOkabhavAdhvA sa
hyAryamanISayA kalpitaviSayOnAJjasAvyutpannalOkasamadhigamaH atha tadEvaitadduravagamaM
samavEtAnukalpEna nirdizyatAmiti||26||