From StotraSamhita
< Bhagavatam | Skandha 10
dvyazItitamO'dhyAyaH
zrIzuka uvAca
athaikadA dvAravatyAM vasatO rAmakRSNayOH| sUryOparAgaH sumahAnAsItkalpakSayE yathA||1|| |
taM jJAtvA manujA rAjanpurastAdEva sarvataH| samantapaJcakaM kSEtraM yayuH zrEyOvidhitsayA||2|| |
niHkSatriyAM mahIM kurvanrAmaH zastrabhRtAM varaH| nRpANAM rudhiraughENa yatra cakrE mahAhradAn||3|| |
IjE ca bhagavAnrAmO yatrAspRSTO'pi karmaNA| lOkaM saGgrAhayannIzO yathAnyO'ghApanuttayE||4|| |
mahatyAM tIrthayAtrAyAM tatrAganbhAratIH prajAH| vRSNayazca tathAkrUra vasudEvAhukAdayaH||5|| |
yayurbhArata tatkSEtraM svamaghaM kSapayiSNavaH gadapradyumnasAmbAdyAH sucandrazukasAraNaiH AstE'niruddhO rakSAyAM kRtavarmA ca yUthapaH||6|| |
tE rathairdEvadhiSNyAbhairhayaizca taralaplavaiH| gajairnadadbhirabhrAbhairnRbhirvidyAdharadyubhiH||7|| |
vyarOcanta mahAtEjAH pathi kAJcanamAlinaH| divyasragvastrasannAhAH kalatraiH khEcarA iva||8|| |
tatra snAtvA mahAbhAgA upOSya susamAhitAH| brAhmaNEbhyO dadurdhEnUrvAsaHsragrukmamAlinIH||9|| |
rAmahradESu vidhivatpunarAplutya vRSNayaH| dadaH svannaM dvijAgryEbhyaH kRSNE nO bhaktirastviti||10|| |
svayaM ca tadanujJAtA vRSNayaH kRSNadEvatAH| bhuktvOpavivizuH kAmaM snigdhacchAyAGghripAGghriSu||11|| |
tatrAgatAMstE dadRzuH suhRtsambandhinO nRpAn| matsyOzInarakauzalya vidarbhakurusRJjayAn||12|| |
kAmbOjakaikayAnmadrAnkuntInAnartakEralAn anyAMzcaivAtmapakSIyAnparAMzca zatazO nRpa nandAdInsuhRdO gOpAngOpIzcOtkaNThitAzciram||13|| |
anyOnyasandarzanaharSaraMhasA prOtphullahRdvaktrasarOruhazriyaH| AzliSya gADhaM nayanaiH sravajjalA hRSyattvacO ruddhagirO yayurmudam||14|| |
striyazca saMvIkSya mithO'tisauhRda smitAmalApAGgadRzO'bhirEbhirE| stanaiH stanAnkuGkumapaGkarUSitAn nihatya dOrbhiH praNayAzrulOcanAH||15|| |
tatO'bhivAdya tE vRddhAnyaviSThairabhivAditAH| svAgataM kuzalaM pRSTvA cakruH kRSNakathA mithaH||16|| |
pRthA bhrAtRRnsvasRRrvIkSya tatputrAnpitarAvapi| bhrAtRpatnIrmukundaM ca jahau saGkathayA zucaH||17|| |
kuntyuvAca
Arya bhrAtarahaM manyE AtmAnamakRtAziSam| yadvA Apatsu madvArtAM nAnusmaratha sattamAH||18|| |
suhRdO jJAtayaH putrA bhrAtaraH pitarAvapi| nAnusmaranti svajanaM yasya daivamadakSiNam||19|| |
zrIvasudEva uvAca
amba mAsmAnasUyEthA daivakrIDanakAnnarAn| Izasya hi vazE lOkaH kurutE kAryatE'tha vA||20|| |
kaMsapratApitAH sarvE vayaM yAtA dizaM dizam| EtarhyEva punaH sthAnaM daivEnAsAditAH svasaH||21|| |
zrIzuka uvAca
vasudEvOgrasEnAdyairyadubhistE'rcitA nRpAH| Asannacyutasandarza paramAnandanirvRtAH||22|| |
bhISmO drONO'mbikAputrO gAndhArI sasutA tathA| sadArAH pANDavAH kuntI saJjayO viduraH kRpaH||23|| |
kuntIbhOjO virATazca bhISmakO nagnajinmahAn| purujiddrupadaH zalyO dhRSTakEtuH sa kAzirAT||24|| |
damaghOSO vizAlAkSO maithilO madrakEkayau| yudhAmanyuH suzarmA ca sasutA bAhlikAdayaH||25|| |
rAjAnO yE ca rAjEndra yudhiSThiramanuvratAH| zrInikEtaM vapuH zaurEH sastrIkaM vIkSya vismitAH||26|| |
atha tE rAmakRSNAbhyAM samyakprAptasamarhaNAH| prazazaMsurmudA yuktA vRSNInkRSNaparigrahAn||27|| |
ahO bhOjapatE yUyaM janmabhAjO nRNAmiha| yatpazyathAsakRtkRSNaM durdarzamapi yOginAm||28|| |
yadvizrutiH zrutinutEdamalaM punAti pAdAvanEjanapayazca vacazca zAstram| bhUH kAlabharjitabhagApi yadaGghripadma sparzOtthazaktirabhivarSati nO'khilArthAn||29|| |
taddarzanasparzanAnupathaprajalpa zayyAsanAzanasayaunasapiNDabandhaH| yESAM gRhE nirayavartmani vartatAM vaH svargApavargaviramaH svayamAsa viSNuH||30|| |
zrIzuka uvAca
nandastatra yadUnprAptAnjJAtvA kRSNapurOgamAn| tatrAgamadvRtO gOpairanaHsthArthairdidRkSayA||31|| |
taM dRSTvA vRSNayO hRSTAstanvaH prANamivOtthitAH| pariSasvajirE gADhaM ciradarzanakAtarAH||32|| |
vasudEvaH pariSvajya samprItaH prEmavihvalaH| smarankaMsakRtAnklEzAnputranyAsaM ca gOkulE||33|| |
kRSNarAmau pariSvajya pitarAvabhivAdya ca| na kiJcanOcatuH prEmNA sAzrukaNThau kurUdvaha||34|| |
tAvAtmAsanamArOpya bAhubhyAM parirabhya ca| yazOdA ca mahAbhAgA sutau vijahatuH zucaH||35|| |
rOhiNI dEvakI cAtha pariSvajya vrajEzvarIm| smarantyau tatkRtAM maitrIM bASpakaNThyau samUcatuH||36|| |
kA vismarEta vAM maitrImanivRttAM vrajEzvari| avApyApyaindramaizvaryaM yasyA nEha pratikriyA||37|| |
EtAvadRSTapitarau yuvayOH sma pitrOH samprINanAbhyudayapOSaNapAlanAni| prApyOSaturbhavati pakSma ha yadvadakSNOr nyastAvakutra ca bhayau na satAM paraH svaH||38|| |
zrIzuka uvAca
gOpyazca kRSNamupalabhya cirAdabhISTaM yatprEkSaNE dRziSu pakSmakRtaM zapanti| dRgbhirhRdIkRtamalaM parirabhya sarvAs tadbhAvamApurapi nityayujAM durApam||39|| |
bhagavAMstAstathAbhUtA vivikta upasaGgataH| AzliSyAnAmayaM pRSTvA prahasannidamabravIt||40|| |
api smaratha naH sakhyaH svAnAmarthacikIrSayA| gatAMzcirAyitAJchatru pakSakSapaNacEtasaH||41|| |
apyavadhyAyathAsmAnsvidakRtajJAvizaGkayA| nUnaM bhUtAni bhagavAnyunakti viyunakti ca||42|| |
vAyuryathA ghanAnIkaM tRNaM tUlaM rajAMsi ca| saMyOjyAkSipatE bhUyastathA bhUtAni bhUtakRt||43|| |
mayi bhaktirhi bhUtAnAmamRtatvAya kalpatE| diSTyA yadAsInmatsnEhO bhavatInAM madApanaH||44|| |
ahaM hi sarvabhUtAnAmAdirantO'ntaraM bahiH| bhautikAnAM yathA khaM vArbhUrvAyurjyOtiraGganAH||45|| |
EvaM hyEtAni bhUtAni bhUtESvAtmAtmanA tataH| ubhayaM mayyatha parE pazyatAbhAtamakSarE||46|| |
zrIzuka uvAca
adhyAtmazikSayA gOpya EvaM kRSNEna zikSitAH| tadanusmaraNadhvasta jIvakOzAstamadhyagan||47|| |
Ahuzca tE nalinanAbha padAravindaM yOgEzvarairhRdi vicintyamagAdhabOdhaiH saMsArakUpapatitOttaraNAvalambaM gEhaM juSAmapi manasyudiyAtsadA naH||48|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE dvyazItitamO'dhyAyaH||
