aSTAdazO'dhyAyaH

tathA ca bhadrazravA nAma dharmasutastatkulapatayaH puruSA bhadrAzvavarSE sAkSAdbhagavatO
vAsudEvasya priyAM tanuM dharmamayIM hayazIrSAbhidhAnAM paramENa samAdhinA
sannidhApyEdamabhigRNanta upadhAvanti||1||

OM namO bhagavatE dharmAyAtmavizOdhanAya nama iti||2||

ahO vicitraM bhagavadvicESTitaM ghnantaM janO'yaM hi miSanna pazyati|
dhyAyannasadyarhi vikarma sEvituM nirhRtya putraM pitaraM jijIviSati||3||

vadanti vizvaM kavayaH sma nazvaraM pazyanti cAdhyAtmavidO vipazcitaH|
tathApi muhyanti tavAja mAyayA suvismitaM kRtyamajaM natO'smi tam||4||

vizvOdbhavasthAnanirOdhakarma tE hyakarturaGgIkRtamapyapAvRtaH|
yuktaM na citraM tvayi kAryakAraNE sarvAtmani vyatiriktE ca vastutaH||5||

vEdAnyugAntE tamasA tiraskRtAnrasAtalAdyO nRturaGgavigrahaH|
pratyAdadE vai kavayE'bhiyAcatE tasmai namastE'vitathEhitAya iti||6||

harivarSE cApi bhagavAnnaraharirUpENAstE tadrUpagrahaNanimittamuttaratrAbhidhAsyE
taddayitaM rUpaM mahApuruSaguNabhAjanO mahAbhAgavatO daityadAnavakulatIrthIkaraNazIlAcaritaH
prahlAdO'vyavadhAnAnanyabhaktiyOgEna saha tadvarSapuruSairupAstE idaM cOdAharati||7||

OM namO bhagavatE narasiMhAya namastEjastEjasE AvirAvirbhava vajranakha vajradaMSTra
karmAzayAnrandhaya randhaya tamO grasa grasa OM svAhA abhayamabhayamAtmani bhUyiSThA OM kSraum||8||

svastyastu vizvasya khalaH prasIdatAM dhyAyantu bhUtAni zivaM mithO dhiyA|
manazca bhadraM bhajatAdadhOkSajE AvEzyatAM nO matirapyahaitukI||9||

mAgAradArAtmajavittabandhuSu saGgO yadi syAdbhagavatpriyESu naH|
yaH prANavRttyA parituSTa AtmavAnsiddhyatyadUrAnna tathEndriyapriyaH||10||

yatsaGgalabdhaM nijavIryavaibhavaM tIrthaM muhuH saMspRzatAM hi mAnasam|
haratyajO'ntaH zrutibhirgatO'GgajaM kO vai na sEvEta mukundavikramam||11||

yasyAsti bhaktirbhagavatyakiJcanA sarvairguNaistatra samAsatE surAH|
harAvabhaktasya kutO mahadguNA manOrathEnAsati dhAvatO bahiH||12||

harirhi sAkSAdbhagavAnzarIriNAmAtmA jhaSANAmiva tOyamIpsitam|
hitvA mahAMstaM yadi sajjatE gRhE tadA mahattvaM vayasA dampatInAm||13||

tasmAdrajOrAgaviSAdamanyu mAnaspRhAbhayadainyAdhimUlam|
hitvA gRhaM saMsRticakravAlaM nRsiMhapAdaM bhajatAkutObhayamiti||14||

kEtumAlE'pi bhagavAnkAmadEvasvarUpENa lakSmyAH priyacikIrSayA prajApatErduhitNAM putrANAM
tadvarSapatInAM puruSAyuSAhOrAtraparisaGkhyAnAnAM yAsAM garbhA mahApuruSamahAstratEjasOdvEjita
manasAM vidhvastA vyasavaH saMvatsarAntE vinipatanti||15||

atIva sulalitagativilAsavilasitarucirahAsalEzAvalOkalIlayA
kiJciduttambhitasundarabhrUmaNDala
subhagavadanAravindazriyA ramAM ramayannindriyANi ramayatE||16||

tadbhagavatO mAyAmayaM rUpaM paramasamAdhiyOgEna ramA dEvI saMvatsarasya rAtriSu
prajApatErduhitRbhirupEtAhaHsu ca tadbhartRbhirupAstE idaM cOdAharati||17||

OM hrAM hrIM hrUM OM namO bhagavatE hRSIkEzAya sarvaguNavizESairvilakSitAtmanE AkUtInAM
cittInAM cEtasAM vizESANAM cAdhipatayE SODazakalAya cchandOmayAyAnnamayAyAmRtamayAya sarvamayAya
sahasE OjasE balAya kAntAya kAmAya namastE ubhayatra bhUyAt||18||

striyO vrataistvA hRSIkEzvaraM svatO hyArAdhya lOkE patimAzAsatE'nyam|
tAsAM na tE vai paripAntyapatyaM priyaM dhanAyUMSi yatO'svatantrAH||19||

sa vai patiH syAdakutObhayaH svayaM samantataH pAti bhayAturaM janam|
sa Eka EvEtarathA mithO bhayaM naivAtmalAbhAdadhi manyatE param||20||

yA tasya tE pAdasarOruhArhaNaM nikAmayEtsAkhilakAmalampaTA|
tadEva rAsIpsitamIpsitO'rcitO yadbhagnayAcJA bhagavanpratapyatE||21||

matprAptayE'jEzasurAsurAdayastapyanta ugraM tapa aindriyE dhiyaH|
RtE bhavatpAdaparAyaNAnna mAM vindantyahaM tvaddhRdayA yatO'jita||22||

sa tvaM mamApyacyuta zIrSNi vanditaM karAmbujaM yattvadadhAyi sAtvatAm|
bibharSi mAM lakSma varENya mAyayA ka IzvarasyEhitamUhituM vibhuriti||23||

ramyakE ca bhagavataH priyatamaM mAtsyamavatArarUpaM tadvarSapuruSasya manOH prAk
pradarzitaM sa idAnImapi mahatA bhaktiyOgEnArAdhayatIdaM cOdAharati||24||

OM namO bhagavatE mukhyatamAya namaH sattvAya prANAyaujasE sahasE balAya mahAmatsyAya
nama iti||25||

antarbahizcAkhilalOkapAlakairadRSTarUpO vicarasyurusvanaH|
sa IzvarastvaM ya idaM vazE'nayannAmnA yathA dArumayIM naraH striyam||26||

yaM lOkapAlAH kila matsarajvarA hitvA yatantO'pi pRthaksamEtya ca|
pAtuM na zEkurdvipadazcatuSpadaH sarIsRpaM sthANu yadatra dRzyatE||27||

bhavAnyugAntArNava UrmimAlini kSONImimAmOSadhivIrudhAM nidhim|
mayA sahOru kramatE'ja OjasA tasmai jagatprANagaNAtmanE nama iti||28||

hiraNmayE'pi bhagavAnnivasati kUrmatanuM bibhrANastasya tatpriyatamAM tanumaryamA saha
varSapuruSaiH pitRgaNAdhipatirupadhAvati mantramimaM cAnujapati||29||

OM namO bhagavatE akUpArAya sarvasattvaguNavizESaNAyAnupalakSitasthAnAya namO varSmaNE
namO bhUmnE namO namO'vasthAnAya namastE||30||

yadrUpamEtannijamAyayArpitamarthasvarUpaM bahurUparUpitam|
saGkhyA na yasyAstyayathOpalambhanAttasmai namastE'vyapadEzarUpiNE||31||

jarAyujaM svEdajamaNDajOdbhidaM carAcaraM dEvarSipitRbhUtamaindriyam|
dyauH khaM kSitiH zailasaritsamudra dvIpagraharkSEtyabhidhEya EkaH||32||

yasminnasaGkhyEyavizESanAma rUpAkRtau kavibhiH kalpitEyam|
saGkhyA yayA tattvadRzApanIyatE tasmai namaH sAGkhyanidarzanAya tE iti||33||

uttarESu ca kuruSu bhagavAnyajJapuruSaH kRtavarAharUpa AstE taM tu dEvI haiSA bhUH saha
kurubhiraskhalitabhaktiyOgEnOpadhAvati imAM ca paramAmupaniSadamAvartayati||34||

OM namO bhagavatE mantratattvaliGgAya yajJakratavE mahAdhvarAvayavAya mahApuruSAya namaH
karmazuklAya triyugAya namastE||35||

yasya svarUpaM kavayO vipazcitO guNESu dAruSviva jAtavEdasam|
mathnanti mathnA manasA didRkSavO gUDhaM kriyArthairnama IritAtmanE||36||

dravyakriyAhEtvayanEzakartRbhirmAyAguNairvastunirIkSitAtmanE|
anvIkSayAGgAtizayAtmabuddhibhirnirastamAyAkRtayE namO namaH||37||

karOti vizvasthitisaMyamOdayaM yasyEpsitaM nEpsitamIkSiturguNaiH|
mAyA yathAyO bhramatE tadAzrayaM grAvNO namastE guNakarmasAkSiNE||38||

pramathya daityaM prativAraNaM mRdhE yO mAM rasAyA jagadAdisUkaraH
kRtvAgradaMSTrE niragAdudanvataH krIDannivEbhaH praNatAsmi taM vibhumiti||39||