From StotraSamhita

paJcadazO'dhyAyaH

zrIbhagavAnuvAca

jitEndriyasya yuktasya jitazvAsasya yOginaH| mayi dhArayatazcEta upatiSThanti siddhayaH||1||

zrIuddhava uvAca

kayA dhAraNayA kA svitkathaM vA siddhiracyuta| kati vA siddhayO brUhi yOginAM siddhidO bhavAn||2||

zrIbhagavAnuvAca

siddhayO'STAdaza prOktA dhAraNA yOgapAragaiH| tAsAmaSTau matpradhAnA dazaiva guNahEtavaH||3||

aNimA mahimA mUrtErlaghimA prAptirindriyaiH| prAkAmyaM zrutadRSTESu zaktiprEraNamIzitA||4||

guNESvasaGgO vazitA yatkAmastadavasyati| EtA mE siddhayaH saumya aSTAvautpattikA matAH||5||

anUrmimattvaM dEhE'smindUrazravaNadarzanam| manOjavaH kAmarUpaM parakAyapravEzanam||6||

svacchandamRtyurdEvAnAM sahakrIDAnudarzanam| yathAsaGkalpasaMsiddhirAjJApratihatA gatiH||7||

trikAlajJatvamadvandvaM paracittAdyabhijJatA| agnyarkAmbuviSAdInAM pratiSTambhO'parAjayaH||8||

EtAzcOddEzataH prOktA yOgadhAraNasiddhayaH| yayA dhAraNayA yA syAdyathA vA syAnnibOdha mE||9||

bhUtasUkSmAtmani mayi tanmAtraM dhArayEnmanaH| aNimAnamavApnOti tanmAtrOpAsakO mama||10||

mahattattvAtmani mayi yathAsaMsthaM manO dadhat| mahimAnamavApnOti bhUtAnAM ca pRthakpRthak||11||

paramANumayE cittaM bhUtAnAM mayi raJjayan| kAlasUkSmArthatAM yOgI laghimAnamavApnuyAt||12||

dhArayanmayyahaM tattvE manO vaikArikE'khilam| sarvEndriyANAmAtmatvaM prAptiM prApnOti manmanAH||13||

mahatyAtmani yaH sUtrE dhArayEnmayi mAnasam| prAkAmyaM pAramESThyaM mE vindatE'vyaktajanmanaH||14||

viSNau tryadhIzvarE cittaM dhArayEtkAlavigrahE| sa IzitvamavApnOti kSEtrajJakSEtracOdanAm||15||

nArAyaNE turIyAkhyE bhagavacchabdazabditE| manO mayyAdadhadyOgI maddharmA vazitAmiyAt||16||

nirguNE brahmaNi mayi dhArayanvizadaM manaH| paramAnandamApnOti yatra kAmO'vasIyatE||17||

zvEtadvIpapatau cittaM zuddhE dharmamayE mayi| dhArayaJchvEtatAM yAti SaDUrmirahitO naraH||18||

mayyAkAzAtmani prANE manasA ghOSamudvahan| tatrOpalabdhA bhUtAnAM haMsO vAcaH zRNOtyasau||19||

cakSustvaSTari saMyOjya tvaSTAramapi cakSuSi| mAM tatra manasA dhyAyanvizvaM pazyati dUrataH||20||

manO mayi susaMyOjya dEhaM tadanuvAyunA| maddhAraNAnubhAvEna tatrAtmA yatra vai manaH||21||

yadA mana upAdAya yadyadrUpaM bubhUSati| tattadbhavEnmanOrUpaM madyOgabalamAzrayaH||22||

parakAyaM vizansiddha AtmAnaM tatra bhAvayEt| piNDaM hitvA vizEtprANO vAyubhUtaH SaDaGghrivat||23||

pArSNyApIDya gudaM prANaM hRduraHkaNThamUrdhasu| ArOpya brahmarandhrENa brahma nItvOtsRjEttanum||24||

vihariSyansurAkrIDE matsthaM sattvaM vibhAvayEt| vimAnEnOpatiSThanti sattvavRttIH surastriyaH||25||

yathA saGkalpayEdbuddhyA yadA vA matparaH pumAn| mayi satyE manO yuJjaMstathA tatsamupAznutE||26||

yO vai madbhAvamApanna IziturvazituH pumAn| kutazcinna vihanyEta tasya cAjJA yathA mama||27||

madbhaktyA zuddhasattvasya yOginO dhAraNAvidaH| tasya traikAlikI buddhirjanmamRtyUpabRMhitA||28||

agnyAdibhirna hanyEta munEryOgamayaM vapuH| madyOgazAntacittasya yAdasAmudakaM yathA||29||

madvibhUtIrabhidhyAyanzrIvatsAstravibhUSitAH| dhvajAtapatravyajanaiH sa bhavEdaparAjitaH||30||

upAsakasya mAmEvaM yOgadhAraNayA munEH| siddhayaH pUrvakathitA upatiSThantyazESataH||31||

jitEndriyasya dAntasya jitazvAsAtmanO munEH| maddhAraNAM dhArayataH kA sA siddhiH sudurlabhA||32||

antarAyAnvadantyEtA yuJjatO yOgamuttamam| mayA sampadyamAnasya kAlakSapaNahEtavaH||33||

janmauSadhitapOmantrairyAvatIriha siddhayaH| yOgEnApnOti tAH sarvA nAnyairyOgagatiM vrajEt||34||

sarvAsAmapi siddhInAM hEtuH patirahaM prabhuH| ahaM yOgasya sAGkhyasya dharmasya brahmavAdinAm||35||

ahamAtmAntarO bAhyO'nAvRtaH sarvadEhinAm yathA bhUtAni bhUtESu bahirantaH svayaM tathA||36||

||iti zrImadbhAgavatE mahApurANE pAramahaMsyAM saMhitAyAM EkAdazaskandhE paJcadazO'dhyAyaH||

See Also

• http://vedabase.net/sb/11/15/en