From StotraSamhita
< Bhagavatam | Skandha 05
trayOviMzO'dhyAyaH
zrIzuka uvAca
atha tasmAtparatastrayOdazalakSayOjanAntaratO yattadviSNOH paramaM padamabhivadanti yatra ha mahAbhAgavatO dhruva auttAnapAdiragninEndrENa prajApatinA kazyapEna dharmENa ca samakAlayugbhiH sabahumAnaM dakSiNataH kriyamANa idAnImapi kalpajIvinAmAjIvya upAstE tasyEhAnubhAva upavarNitaH||1|| |
sa hi sarvESAM jyOtirgaNAnAM grahanakSatrAdInAmanimiSENAvyaktaraMhasA bhagavatA kAlEna bhrAmyamANAnAM sthANurivAvaSTambha IzvarENa vihitaH zazvadavabhAsatE||2|| |
yathA mEDhIstambha AkramaNapazavaH saMyOjitAstribhistribhiH savanairyathAsthAnaM maNDalAni carantyEvaM bhagaNA grahAdaya EtasminnantarbahiryOgEna kAlacakra AyOjitA dhruvamEvAvalambya vAyunOdIryamANA AkalpAntaM paricaGkramanti nabhasi yathA mEghAH zyEnAdayO vAyuvazAH karmasArathayaH parivartantE EvaM jyOtirgaNAH prakRtipuruSasaMyOgAnugRhItAH karmanirmitagatayO bhuvi na patanti||3|| |
kEcanaitajjyOtiranIkaM zizumArasaMsthAnEna bhagavatO vAsudEvasya yOga dhAraNAyAmanuvarNayanti||4|| |
yasya pucchAgrE'vAkSirasaH kuNDalIbhUtadEhasya dhruva upakalpitastasya lAGgUlE prajApatiragnirindrO dharma iti pucchamUlE dhAtA vidhAtA ca kaTyAM saptarSayaH tasya dakSiNAvartakuNDalI bhUtazarIrasya yAnyudagayanAni dakSiNapArzvE tu nakSatrANyupakalpayanti dakSiNAyanAni tu savyE yathA zizumArasya kuNDalAbhOgasannivEzasya pArzvayOrubhayOrapyavayavAH samasaGkhyA bhavanti pRSThE tvajavIthI AkAzagaGgA cOdarataH||5|| |
punarvasupuSyau dakSiNavAmayOH zrONyOrArdrAzlESE ca dakSiNavAmayOH pazcimayOH pAdayOrabhijiduttarASADhE dakSiNavAmayOrnAsikayOryathAsaGkhyaM zravaNapUrvASADhE dakSiNa vAmayOrlOcanayOrdhaniSThA mUlaM ca dakSiNavAmayOH karNayOrmaghAdInyaSTa nakSatrANi dakSiNAyanAni vAmapArzvavaGkriSu yuJjIta tathaiva mRgazIrSAdInyudagayanAni dakSiNapArzvavaGkriSu prAtilOmyEna prayuJjIta zatabhiSAjyESThE skandhayOrdakSiNavAmayOrnyasEt||6|| |
uttarAhanAvagastiradharAhanau yamO mukhESu cAGgArakaH zanaizcara upasthE bRhaspatiH kakudi vakSasyAdityO hRdayE nArAyaNO manasi candrO nAbhyAmuzanA stanayOrazvinau budhaH prANApAnayO rAhurgalE kEtavaH sarvAGgESu rOmasu sarvE tArAgaNAH||7|| |
Etadu haiva bhagavatO viSNOH sarvadEvatAmayaM rUpamaharahaH sandhyAyAM prayatO vAgyatO nirIkSamANa upatiSThEta namO jyOtirlOkAya kAlAyanAyAnimiSAM patayE mahApuruSAyAbhidhImahIti||8|| |
graharkSatArAmayamAdhidaivikaM pApApahaM mantrakRtAM trikAlam namasyataH smaratO vA trikAlaM nazyEta tatkAlajamAzu pApam||9|| |
||iti zrImadbhAgavatE mahApurANE pAramahaMsyAM saMhitAyAM paJcamaskandhE trayOviMzO'dhyAyaH||
