From StotraSamhita

paJcapaJcAzattamO'dhyAyaH

zrIzuka uvAca

kAmastu vAsudEvAMzO dagdhaH prAgrudramanyunA| dEhOpapattayE bhUyastamEva pratyapadyata||1||

sa Eva jAtO vaidarbhyAM kRSNavIryasamudbhavaH| pradyumna iti vikhyAtaH sarvatO'navamaH pituH||2||

taM zambaraH kAmarUpI hRtvA tOkamanirdazam| sa viditvAtmanaH zatruM prAsyOdanvatyagAdgRham||3||

taM nirjagAra balavAnmInaH sO'pyaparaiH saha| vRtO jAlEna mahatA gRhItO matsyajIvibhiH||4||

taM zambarAya kaivartA upAjahrurupAyanam| sUdA mahAnasaM nItvA vadyansudhitinAdbhutam||5||

dRSTvA tadudarE bAlammAyAvatyai nyavEdayan nAradO'kathayatsarvaM tasyAH zaGkitacEtasaH bAlasya tattvamutpattiM matsyOdaranivEzanam||6||

sA ca kAmasya vai patnI ratirnAma yazasvinI| patyurnirdagdhadEhasya dEhOtpattimpratIkSatI||7||

nirUpitA zambarENa sA sUdaudanasAdhanE| kAmadEvaM zizuM buddhvA cakrE snEhaM tadArbhakE||8||

nAtidIrghENa kAlEna sa kArSNi rUDhayauvanaH| janayAmAsa nArINAM vIkSantInAM ca vibhramam||9||

sA tampatiM padmadalAyatEkSaNaM pralambabAhuM naralOkasundaram| savrIDahAsOttabhitabhruvEkSatI prItyOpatasthE ratiraGga saurataiH||10||

tAmaha bhagavAnkArSNirmAtastE matiranyathA| mAtRbhAvamatikramya vartasE kAminI yathA||11||

ratiruvAca

bhavAnnArAyaNasutaH zambarENa hRtO gRhAt| ahaM tE'dhikRtA patnI ratiH kAmO bhavAnprabhO||12||

ESa tvAnirdazaM sindhAvakSipacchambarO'suraH| matsyO'grasIttadudarAditaH prAptO bhavAnprabhO||13||

tamimaM jahi durdharSaM durjayaM zatrumAtmanaH| mAyAzatavidaM taM ca mAyAbhirmOhanAdibhiH||14||

parIzOcati tE mAtA kurarIva gataprajA| putrasnEhAkulA dInA vivatsA gaurivAturA||15||

prabhASyaivaM dadau vidyAM pradyumnAya mahAtmanE| mAyAvatI mahAmAyAM sarvamAyAvinAzinIm||16||

sa ca zambaramabhyEtya saMyugAya samAhvayat| aviSahyaistamAkSEpaiH kSipansaJjanayankalim||17||

sO'dhikSiptO durvAcObhiH padAhata ivOragaH| nizcakrAma gadApANiramarSAttAmralOcanaH||18||

gadAmAvidhya tarasA pradyumnAya mahAtmanE| prakSipya vyanadannAdaM vajraniSpESaniSThuram||19||

tAmApatantIM bhagavAnpradyumnO gadayA gadAm| apAsya zatravE kruddhaH prAhiNOtsvagadAM nRpa||20||

sa ca mAyAM samAzritya daitEyIM mayadarzitam| mumucE'stramayaM varSaM kArSNau vaihAyasO'suraH||21||

bAdhyamAnO'stravarSENa raukmiNEyO mahArathaH| sattvAtmikAM mahAvidyAM sarvamAyOpamardinIm||22||

tatO gauhyakagAndharva paizAcOragarAkSasIH| prAyuGkta zatazO daityaH kArSNirvyadhamayatsa tAH||23||

nizAtamasimudyamya sakirITaM sakuNDalam| zambarasya ziraH kAyAttAmrazmazrvOjasAharat||24||

AkIryamANO divijaiH stuvadbhiH kusumOtkaraiH| bhAryayAmbaracAriNyA puraM nItO vihAyasA||25||

antaHpuravaraM rAjanlalanAzatasaGkulam| vivEza patnyA gaganAdvidyutEva balAhakaH||26||

taM dRSTvA jaladazyAmaM pItakauzEyavAsasam| pralambabAhuM tAmrAkSaM susmitaM rucirAnanam||27||

svalaGkRtamukhAmbhOjaM nIlavakrAlakAlibhiH| kRSNaM matvA striyO hrItA nililyustatra tatra ha||28||

avadhArya zanairISadvailakSaNyEna yOSitaH| upajagmuH pramuditAH sastrI ratnaM suvismitAH||29||

atha tatrAsitApAGgI vaidarbhI valgubhASiNI| asmaratsvasutaM naSTaM snEhasnutapayOdharA||30||

kO nvayamnaravaidUryaH kasya vA kamalEkSaNaH| dhRtaH kayA vA jaTharE kEyaM labdhA tvanEna vA||31||

mama cApyAtmajO naSTO nItO yaH sUtikAgRhAt| EtattulyavayOrUpO yadi jIvati kutracit||32||

kathaM tvanEna samprAptaM sArUpyaM zArGgadhanvanaH| AkRtyAvayavairgatyA svarahAsAvalOkanaiH||33||

sa Eva vA bhavEnnUnaM yO mE garbhE dhRtO'rbhakaH| amuSminprItiradhikA vAmaH sphurati mE bhujaH||34||

EvaM mImAMsamaNAyAM vaidarbhyAM dEvakIsutaH| dEvakyAnakadundubhyAmuttamaHzlOka Agamat||35||

vijJAtArthO'pi bhagavAMstUSNImAsa janArdanaH| nAradO'kathayatsarvaM zambarAharaNAdikam||36||

tacchrutvA mahadAzcaryaM kRSNAntaHpurayOSitaH| abhyanandanbahUnabdAnnaSTaM mRtamivAgatam||37||

dEvakI vasudEvazca kRSNarAmau tathA striyaH| dampatI tau pariSvajya rukmiNI ca yayurmudam||38||

naSTaM pradyumnamAyAtamAkarNya dvArakaukasaH| ahO mRta ivAyAtO bAlO diSTyEti hAbruvan||39||

yaM vai muhuH pitRsarUpanijEzabhAvAs tanmAtarO yadabhajanraharUDhabhAvAH citraM na tatkhalu ramAspadabimbabimbE kAmE smarE'kSaviSayE kimutAnyanAryaH||40||

||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE paJcapaJcAzattamO'dhyAyaH||

See Also

• http://vedabase.net/sb/10/55/en