From StotraSamhita
< Bhagavatam | Skandha 04
SaDviMzO'dhyAyaH
nArada uvAca
sa EkadA mahESvAsO rathaM paJcAzvamAzugam| dvISaM dvicakramEkAkSaM trivENuM paJcabandhuram||1|| |
EkarazmyEkadamanamEkanIDaM dvikUbaram| paJcapraharaNaM sapta varUthaM paJcavikramam||2|| |
haimOpaskaramAruhya svarNavarmAkSayESudhiH| EkAdazacamUnAthaH paJcaprasthamagAdvanam||3|| |
cacAra mRgayAM tatra dRpta AttESukArmukaH| vihAya jAyAmatadarhAM mRgavyasanalAlasaH||4|| |
AsurIM vRttimAzritya ghOrAtmA niranugrahaH| nyahanannizitairbANairvanESu vanagOcarAn||5|| |
tIrthESu pratidRSTESu rAjA mEdhyAnpazUnvanE| yAvadarthamalaM lubdhO hanyAditi niyamyatE||6|| |
ya EvaM karma niyataM vidvAnkurvIta mAnavaH| karmaNA tEna rAjEndra jJAnEna na sa lipyatE||7|| |
anyathA karma kurvANO mAnArUDhO nibadhyatE| guNapravAhapatitO naSTaprajJO vrajatyadhaH||8|| |
tatra nirbhinnagAtrANAM citravAjaiH zilImukhaiH| viplavO'bhUdduHkhitAnAM duHsahaH karuNAtmanAm||9|| |
zazAnvarAhAnmahiSAngavayAnruruzalyakAn| mEdhyAnanyAMzca vividhAnvinighnanzramamadhyagAt||10|| |
tataH kSuttRTparizrAntO nivRttO gRhamEyivAn| kRtasnAnOcitAhAraH saMvivEza gataklamaH||11|| |
AtmAnamarhayAM cakrE dhUpAlEpasragAdibhiH| sAdhvalaGkRtasarvAGgO mahiSyAmAdadhE manaH||12|| |
tRptO hRSTaH sudRptazca kandarpAkRSTamAnasaH| na vyacaSTa varArOhAM gRhiNIM gRhamEdhinIm||13|| |
antaHpurastriyO'pRcchadvimanA iva vEdiSat| api vaH kuzalaM rAmAH sEzvarINAM yathA purA||14|| |
na tathaitarhi rOcantE gRhESu gRhasampadaH yadi na syAdgRhE mAtA patnI vA patidEvatA vyaGgE ratha iva prAjJaH kO nAmAsIta dInavat||15|| |
kva vartatE sA lalanA majjantaM vyasanArNavE| yA mAmuddharatE prajJAM dIpayantI padE padE||16|| |
rAmA UcuH
naranAtha na jAnImastvatpriyA yadvyavasyati| bhUtalE niravastArE zayAnAM pazya zatruhan||17|| |
nArada uvAca
puraJjanaH svamahiSIM nirIkSyAvadhutAM bhuvi| tatsaGgOnmathitajJAnO vaiklavyaM paramaM yayau||18|| |
sAntvayanzlakSNayA vAcA hRdayEna vidUyatA| prEyasyAH snEhasaMrambha liGgamAtmani nAbhyagAt||19|| |
anuninyE'tha zanakairvIrO'nunayakOvidaH| pasparza pAdayugalamAha cOtsaGgalAlitAm||20|| |
puraJjana uvAca
nUnaM tvakRtapuNyAstE bhRtyA yESvIzvarAH zubhE| kRtAgaHsvAtmasAtkRtvA zikSAdaNDaM na yuJjatE||21|| |
paramO'nugrahO daNDO bhRtyESu prabhuNArpitaH| bAlO na vEda tattanvi bandhukRtyamamarSaNaH||22|| |
sA tvaM mukhaM sudati subhrvanurAgabhAra vrIDAvilambavilasaddhasitAvalOkam| nIlAlakAlibhirupaskRtamunnasaM naH svAnAM pradarzaya manasvini valguvAkyam||23|| |
tasmindadhE damamahaM tava vIrapatni yO'nyatra bhUsurakulAtkRtakilbiSastam| pazyE na vItabhayamunmuditaM trilOkyAmanyatra vai muraripOritaratra dAsAt||24|| |
vaktraM na tE vitilakaM malinaM viharSaM saMrambhabhImamavimRSTamapEtarAgam| pazyE stanAvapi zucOpahatau sujAtau bimbAdharaM vigatakuGkumapaGkarAgam||25|| |
tanmE prasIda suhRdaH kRtakilbiSasya svairaM gatasya mRgayAM vyasanAturasya kA dEvaraM vazagataM kusumAstravEga visrastapauMsnamuzatI na bhajEta kRtyE||26|| |
||iti zrImadbhAgavatE mahApurANE pAramahaMsyAM saMhitAyAM caturthaskandhE SaDviMzO'dhyAyaH||
