From StotraSamhita
< Bhagavatam | Skandha 06
trayOdazO'dhyAyaH
zrIzuka uvAca
vRtrE hatE trayO lOkA vinA zakrENa bhUrida| sapAlA hyabhavansadyO vijvarA nirvRtEndriyAH||1|| |
dEvarSipitRbhUtAni daityA dEvAnugAH svayam| pratijagmuH svadhiSNyAni brahmEzEndrAdayastataH||2|| |
zrIrAjOvAca
indrasyAnirvRtErhEtuM zrOtumicchAmi bhO munE| yEnAsansukhinO dEvA harErduHkhaM kutO'bhavat||3|| |
zrIzuka uvAca
vRtravikramasaMvignAH sarvE dEvAH saharSibhiH| tadvadhAyArthayannindraM naicchadbhItO bRhadvadhAt||4|| |
indra uvAca
strIbhUdrumajalairEnO vizvarUpavadhOdbhavam| vibhaktamanugRhNadbhirvRtrahatyAM kva mArjmyaham||5|| |
zrIzuka uvAca
RSayastadupAkarNya mahEndramidamabruvan| yAjayiSyAma bhadraM tE hayamEdhEna mA sma bhaiH||6|| |
hayamEdhEna puruSaM paramAtmAnamIzvaram| iSTvA nArAyaNaM dEvaM mOkSyasE'pi jagadvadhAt||7|| |
brahmahA pitRhA gOghnO mAtRhAcAryahAghavAn| zvAdaH pulkasakO vApi zuddhyEranyasya kIrtanAt||8|| |
tamazvamEdhEna mahAmakhEna zraddhAnvitO'smAbhiranuSThitEna| hatvApi sabrahmacarAcaraM tvaM na lipyasE kiM khalanigrahENa||9|| |
zrIzuka uvAca
EvaM saJcOditO viprairmarutvAnahanadripum| brahmahatyA hatE tasminnAsasAda vRSAkapim||10|| |
tayEndraH smAsahattApaM nirvRtirnAmumAvizat| hrImantaM vAcyatAM prAptaM sukhayantyapi nO guNAH||11|| |
tAM dadarzAnudhAvantIM cANDAlImiva rUpiNIm| jarayA vEpamAnAGgIM yakSmagrastAmasRkpaTAm||12|| |
vikIrya palitAnkEzAMstiSTha tiSThEti bhASiNIm| mInagandhyasugandhEna kurvatIM mArgadUSaNam||13|| |
nabhO gatO dizaH sarvAH sahasrAkSO vizAmpatE| prAgudIcIM dizaM tUrNaM praviSTO nRpa mAnasam||14|| |
sa AvasatpuSkaranAlatantUnalabdhabhOgO yadihAgnidUtaH| varSANi sAhasramalakSitO'ntaH saJcintayanbrahmavadhAdvimOkSam||15|| |
tAvattriNAkaM nahuSaH zazAsa vidyAtapOyOgabalAnubhAvaH| sa sampadaizvaryamadAndhabuddhirnItastirazcAM gatimindrapatnyA||16|| |
tatO gatO brahmagirOpahUta RtambharadhyAnanivAritAghaH| pApastu digdEvatayA hataujAstaM nAbhyabhUdavitaM viSNupatnyA||17|| |
taM ca brahmarSayO'bhyEtya hayamEdhEna bhArata| yathAvaddIkSayAM cakruH puruSArAdhanEna ha||18|| |
athEjyamAnE puruSE sarvadEvamayAtmani| azvamEdhE mahEndrENa vitatE brahmavAdibhiH||19|| |
sa vai tvASTravadhO bhUyAnapi pApacayO nRpa| nItastEnaiva zUnyAya nIhAra iva bhAnunA||20|| |
sa vAjimEdhEna yathOditEna vitAyamAnEna marIcimizraiH| iSTvAdhiyajJaM puruSaM purANamindrO mahAnAsa vidhUtapApaH||21|| |
idaM mahAkhyAnamazESapApmanAM prakSAlanaM tIrthapadAnukIrtanam| bhaktyucchrayaM bhaktajanAnuvarNanaM mahEndramOkSaM vijayaM marutvataH||22|| |
paThEyurAkhyAnamidaM sadA budhAH zRNvantyathO parvaNi parvaNIndriyam dhanyaM yazasyaM nikhilAghamOcanaM ripuJjayaM svastyayanaM tathAyuSam||23|| |
||iti zrImadbhAgavatE mahApurANE pAramahaMsyAM saMhitAyAM SaSThaskandhE trayOdazO'dhyAyaH||
