From StotraSamhita
< Bhagavatam | Skandha 10
EkOnacatvAriMzO'dhyAyaH
zrIzuka uvAca
sukhOpaviSTaH paryaGkE ramakRSNOrumAnitaH| lEbhE manOrathAnsarvAnpathi yAnsa cakAra ha||1|| |
kimalabhyaM bhagavati prasannE zrInikEtanE| tathApi tatparA rAjanna hi vAJchanti kiJcana||2|| |
sAyantanAzanaM kRtvA bhagavAndEvakIsutaH| suhRtsu vRttaM kaMsasya papracchAnyaccikIrSitam||3|| |
zrIbhagavAnuvAca
tAta saumyAgataH kaccitsvAgataM bhadramastu vaH| api svajJAtibandhUnAmanamIvamanAmayam||4|| |
kiM nu naH kuzalaM pRcchE EdhamAnE kulAmayE| kaMsE mAtulanAmnAGga svAnAM nastatprajAsu ca||5|| |
ahO asmadabhUdbhUri pitrOrvRjinamAryayOH| yaddhEtOH putramaraNaM yaddhEtOrbandhanaM tayOH||6|| |
diSTyAdya darzanaM svAnAM mahyaM vaH saumya kAGkSitam| saJjAtaM varNyatAM tAta tavAgamanakAraNam||7|| |
zrIzuka uvAca
pRSTO bhagavatA sarvaM varNayAmAsa mAdhavaH| vairAnubandhaM yaduSu vasudEvavadhOdyamam||8|| |
yatsandEzO yadarthaM vA dUtaH samprESitaH svayam| yaduktaM nAradEnAsya svajanmAnakadundubhEH||9|| |
zrutvAkrUravacaH kRSNO balazca paravIrahA| prahasya nandaM pitaraM rAjJA diSTaM vijajJatuH||10|| |
gOpAnsamAdizatsO'pi gRhyatAM sarvagOrasaH| upAyanAni gRhNIdhvaM yujyantAM zakaTAni ca||11|| |
yAsyAmaH zvO madhupurIM dAsyAmO nRpatE rasAn drakSyAmaH sumahatparva yAnti jAnapadAH kila EvamAghOSayatkSatrA nandagOpaH svagOkulE||12|| |
gOpyastAstadupazrutya babhUvurvyathitA bhRzam| rAmakRSNau purIM nEtumakrUraM vrajamAgatam||13|| |
kAzcittatkRtahRttApa zvAsamlAnamukhazriyaH| sraMsaddukUlavalaya kEzagranthyazca kAzcana||14|| |
anyAzca tadanudhyAna nivRttAzESavRttayaH| nAbhyajAnannimaM lOkamAtmalOkaM gatA iva||15|| |
smarantyazcAparAH zaurEranurAgasmitEritAH| hRdispRzazcitrapadA giraH sammumuhuH striyaH||16|| |
gatiM sulalitAM cESTAM snigdhahAsAvalOkanam| zOkApahAni narmANi prOddAmacaritAni ca||17|| |
cintayantyO mukundasya bhItA virahakAtarAH| samEtAH saGghazaH prOcurazrumukhyO'cyutAzayAH||18|| |
zrIgOpya UcuH
ahO vidhAtastava na kvaciddayA saMyOjya maitryA praNayEna dEhinaH| tAMzcAkRtArthAnviyunaGkSyapArthakaM vikrIDitaM tE'rbhakacESTitaM yathA||19|| |
yastvaM pradarzyAsitakuntalAvRtaM mukundavaktraM sukapOlamunnasam| zOkApanOdasmitalEzasundaraM karOSi pArOkSyamasAdhu tE kRtam||20|| |
krUrastvamakrUrasamAkhyayA sma naz cakSurhi dattaM harasE batAjJavat| yEnaikadEzE'khilasargasauSThavaM tvadIyamadrAkSma vayaM madhudviSaH||21|| |
na nandasUnuH kSaNabhaGgasauhRdaH samIkSatE naH svakRtAturA bata| vihAya gEhAnsvajanAnsutAnpatIMs taddAsyamaddhOpagatA navapriyaH||22|| |
sukhaM prabhAtA rajanIyamAziSaH satyA babhUvuH purayOSitAM dhruvam| yAH saMpraviSTasya mukhaM vrajaspatEH pAsyantyapAGgOtkalitasmitAsavam||23|| |
tAsAM mukundO madhumaJjubhASitair gRhItacittaH paravAnmanasvyapi| kathaM punarnaH pratiyAsyatE'balA grAmyAH salajjasmitavibhramairbhraman||24|| |
adya dhruvaM tatra dRzO bhaviSyatE dAzArhabhOjAndhakavRSNisAtvatAm| mahOtsavaH zrIramaNaM guNAspadaM drakSyanti yE cAdhvani dEvakIsutam||25|| |
maitadvidhasyAkaruNasya nAma bhUdakrUra ityEtadatIva dAruNaH| yO'sAvanAzvAsya suduHkhitamjanaM priyAtpriyaM nESyati pAramadhvanaH||26|| |
anArdradhIrESa samAsthitO rathaM tamanvamI ca tvarayanti durmadAH| gOpA anObhiH sthavirairupEkSitaM daivaM ca nO'dya pratikUlamIhatE||27|| |
nivArayAmaH samupEtya mAdhavaM kiM nO'kariSyankulavRddhabAndhavAH| mukundasaGgAnnimiSArdhadustyajAddaivEna vidhvaMsitadInacEtasAm||28|| |
yasyAnurAgalalitasmitavalgumantra lIlAvalOkaparirambhaNarAsagOSThAm| nItAH sma naH kSaNamiva kSaNadA vinA taM gOpyaH kathaM nvatitarEma tamO durantam||29|| |
yO'hnaH kSayE vrajamanantasakhaH parItO gOpairvizankhurarajazchuritAlakasrak| vENuM kvaNansmitakatAkSanirIkSaNEna cittaM kSiNOtyamumRtE nu kathaM bhavEma||30|| |
zrIzuka uvAca
EvaM bruvANA virahAturA bhRzaM vrajastriyaH kRSNaviSaktamAnasAH| visRjya lajjAM ruruduH sma susvaraM gOvinda dAmOdara mAdhavEti||31|| |
strINAmEvaM rudantInAmuditE savitaryatha| akrUrazcOdayAmAsa kRtamaitrAdikO ratham||32|| |
gOpAstamanvasajjanta nandAdyAH zakaTaistataH| AdAyOpAyanaM bhUri kumbhAngOrasasambhRtAn||33|| |
gOpyazca dayitaM kRSNamanuvrajyAnuraJjitAH| pratyAdEzaM bhagavataH kAGkSantyazcAvatasthirE||34|| |
tAstathA tapyatIrvIkSya svaprasthANE yadUttamaH| sAntvayAmasa saprEmairAyAsya iti dautyakaiH||35|| |
yAvadAlakSyatE kEturyAvadrENU rathasya ca| anuprasthApitAtmAnO lEkhyAnIvOpalakSitAH||36|| |
tA nirAzA nivavRturgOvindavinivartanE| vizOkA ahanI ninyurgAyantyaH priyacESTitam||37|| |
bhagavAnapi samprAptO rAmAkrUrayutO nRpa| rathEna vAyuvEgEna kAlindImaghanAzinIm||38|| |
tatrOpaspRzya pAnIyaM pItvA mRSTaM maNiprabham| vRkSaSaNDamupavrajya sarAmO rathamAvizat||39|| |
akrUrastAvupAmantrya nivEzya ca rathOpari| kAlindyA hradamAgatya snAnaM vidhivadAcarat||40|| |
nimajjya tasminsalilE japanbrahma sanAtanam| tAvEva dadRzE'krUrO rAmakRSNau samanvitau||41|| |
tau rathasthau kathamiha sutAvAnakadundubhEH| tarhi svitsyandanE na sta ityunmajjya vyacaSTa saH||42|| |
tatrApi ca yathApUrvamAsInau punarEva saH| nyamajjaddarzanaM yanmE mRSA kiM salilE tayOH||43|| |
bhUyastatrApi sO'drAkSItstUyamAnamahIzvaram| siddhacAraNagandharvairasurairnatakandharaiH||44|| |
sahasrazirasaM dEvaM sahasraphaNamaulinam| nIlAmbaraM visazvEtaM zRGgaiH zvEtamiva sthitam||45|| |
tasyOtsaGgE ghanasyAmaM pItakauzEyavAsasam| puruSaM caturbhujaM zAntampadmapatrAruNEkSaNam||46|| |
cAruprasannavadanaM cAruhAsanirIkSaNam| subhrUnnasaM carukarNaM sukapOlAruNAdharam||47|| |
pralambapIvarabhujaM tuGgAMsOraHsthalazriyam| kambukaNThaM nimnanAbhiM valimatpallavOdaram||48|| |
bRhatkatitatazrONi karabhOrudvayAnvitam| cArujAnuyugaM cAru jaGghAyugalasaMyutam||49|| |
tuGgagulphAruNanakha vrAtadIdhitibhirvRtam| navAGgulyaGguSThadalairvilasatpAdapaGkajam||50|| |
sumahArhamaNivrAta kirITakaTakAGgadaiH| kaTisUtrabrahmasUtra hAranUpurakuNDalaiH||51|| |
bhrAjamAnaM padmakaraM zaGkhacakragadAdharam| zrIvatsavakSasaM bhrAjatkaustubhaM vanamAlinam||52|| |
sunandanandapramukhaiH parSadaiH sanakAdibhiH| surEzairbrahmarudrAdyairnavabhizca dvijOttamaiH||53|| |
prahrAdanAradavasu pramukhairbhAgavatOttamaiH| stUyamAnaM pRthagbhAvairvacObhiramalAtmabhiH||54|| |
zriyA puSTyA girA kAntyA kIrtyA tuSTyElayOrjayA| vidyayAvidyayA zaktyA mAyayA ca niSEvitam||55|| |
vilOkya subhRzaM prItO bhaktyA paramayA yutaH| hRSyattanUruhO bhAva pariklinnAtmalOcanaH||56|| |
girA gadgadayAstauSItsattvamAlambya sAtvataH praNamya mUrdhnAvahitaH kRtAJjalipuTaH zanaiH||57|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE EkOnacatvAriMzO'dhyAyaH||
