From StotraSamhita

aSTAviMzO'dhyAyaH

zrIbhagavAnuvAca

parasvabhAvakarmANi na prazaMsEnna garhayEt| vizvamEkAmakaM pazyanprakRtyA puruSENa ca||1||

parasvabhAvakarmANi yaH prazaMsati nindati| sa Azu bhrazyatE svArthAdasatyabhinivEzataH||2||

taijasE nidrayApannE piNDasthO naSTacEtanaH| mAyAM prApnOti mRtyuM vA tadvannAnArthadRkpumAn||3||

kiM bhadraM kimabhadraM vA dvaitasyAvastunaH kiyat| vAcOditaM tadanRtaM manasA dhyAtamEva ca||4||

chAyApratyAhvayAbhAsA hyasantO'pyarthakAriNaH| EvaM dEhAdayO bhAvA yacchantyAmRtyutO bhayam||5||

Atmaiva tadidaM vizvaM sRjyatE sRjati prabhuH| trAyatE trAti vizvAtmA hriyatE haratIzvaraH||6||

tasmAnna hyAtmanO'nyasmAdanyO bhAvO nirUpitaH nirUpitE'yaM trividhA nirmUla bhAtirAtmani idaM guNamayaM viddhi trividhaM mAyayA kRtam||7||

EtadvidvAnmaduditaM jJAnavijJAnanaipuNam| na nindati na ca stauti lOkE carati sUryavat||8||

pratyakSENAnumAnEna nigamEnAtmasaMvidA| AdyantavadasajjJAtvA niHsaGgO vicarEdiha||9||

zrIuddhava uvAca

naivAtmanO na dEhasya saMsRtirdraSTRdRzyayOH| anAtmasvadRzOrIza kasya syAdupalabhyatE||10||

AtmAvyayO'guNaH zuddhaH svayaM jyOtiranAvRtaH| agnivaddAruvadaciddEhaH kasyEha saMsRtiH||11||

zrIbhagavAnuvAca

yAvaddEhEndriyaprANairAtmanaH sannikarSaNam| saMsAraH phalavAMstAvadapArthO'pyavivEkinaH||12||

arthE hyavidyamAnE'pi saMsRtirna nivartatE| dhyAyatO viSayAnasya svapnE'narthAgamO yathA||13||

yathA hyapratibuddhasya prasvApO bahvanarthabhRt| sa Eva pratibuddhasya na vai mOhAya kalpatE||14||

zOkaharSabhayakrOdha lObhamOhaspRhAdayaH| ahaGkArasya dRzyantE janmamRtyuzca nAtmanaH||15||

dEhEndriyaprANamanO'bhimAnO jIvO'ntarAtmA guNakarmamUrtiH| sUtraM mahAnityurudhEva gItaH saMsAra AdhAvati kAlatantraH||16||

amUlamEtadbahurUparUpitaM manOvacaHprANazarIrakarma| jJAnAsinOpAsanayA zitEna cchittvA munirgAM vicaratyatRSNaH||17||

jJAnaM vivEkO nigamastapazca pratyakSamaitihyamathAnumAnam| AdyantayOrasya yadEva kEvalaM kAlazca hEtuzca tadEva madhyE||18||

yathA hiraNyaM svakRtaM purastAtpazcAcca sarvasya hiraNmayasya| tadEva madhyE vyavahAryamANaM nAnApadEzairahamasya tadvat||19||

vijJAnamEtattriyavasthamaGga guNatrayaM kAraNakaryakartR| samanvayEna vyatirEkatazca yEnaiva turyENa tadEva satyam||20||

na yatpurastAduta yanna pazcAnmadhyE ca tanna vyapadEzamAtram| bhUtaM prasiddhaM ca parENa yadyattadEva tatsyAditi mE manISA||21||

avidyamAnO'pyavabhAsatE yO vaikArikO rAjasasarga EsaH| brahma svayaM jyOtiratO vibhAti brahmEndriyArthAtmavikAracitram||22||

EvaM sphutaM brahmavivEkahEtubhiH parApavAdEna vizAradEna| chittvAtmasandEhamupAramEta svAnandatuSTO'khilakAmukEbhyaH||23||

nAtmA vapuH pArthivamindriyANi dEvA hyasurvAyurjalamhutAzaH| manO'nnamAtraM dhiSaNA ca sattvamahaGkRtiH khaM kSitirarthasAmyam||24||

samAhitaiH kaH karaNairguNAtmabhir guNO bhavEnmatsuviviktadhAmnaH| vikSipyamANairuta kiM nu dUSaNaM ghanairupEtairvigatai ravEH kim||25||

yathA nabhO vAyvanalAmbubhUguNair gatAgatairvartuguNairna sajjatE| tathAkSaraM sattvarajastamOmalair ahaMmatEH saMsRtihEtubhiH param||26||

tathApi saGgaH parivarjanIyO guNESu mAyAracitESu tAvat| madbhaktiyOgEna dRDhEna yAvadrajO nirasyEta manaHkaSAyaH||27||

yathAmayO'sAdhu cikitsitO nRNAM punaH punaH santudati prarOhan| EvaM manO'pakvakaSAyakarma kuyOginaM vidhyati sarvasaGgam||28||

kuyOginO yE vihitAntarAyairmanuSyabhUtaistridazOpasRSTaiH| tE prAktanAbhyAsabalEna bhUyO yuJjanti yOgaM na tu karmatantram||29||

karOti karma kriyatE ca jantuH kEnApyasau cOdita AnipatAt| na tatra vidvAnprakRtau sthitO'pi nivRttatRSNaH svasukhAnubhUtyA||30||

tiSThantamAsInamuta vrajantaM zayAnamukSantamadantamannam| svabhAvamanyatkimapIhamAnamAtmAnamAtmasthamatirna vEda||31||

yadi sma pazyatyasadindriyArthaM nAnAnumAnEna viruddhamanyat| na manyatE vastutayA manISI svApnaM yathOtthAya tirOdadhAnam||32||

pUrvaM gRhItaM guNakarmacitramajJAnamAtmanyaviviktamaGga| nivartatE tatpunarIkSayaiva na gRhyatE nApi visRyya AtmA||33||

yathA hi bhAnOrudayO nRcakSuSAM tamO nihanyAnna tu sadvidhattE| EvaM samIkSA nipuNA satI mE hanyAttamisraM puruSasya buddhEH||34||

ESa svayaM jyOtirajO'pramEyO mahAnubhUtiH sakalAnubhUtiH| EkO'dvitIyO vacasAM virAmE yEnESitA vAgasavazcaranti||35||

EtAvAnAtmasammOhO yadvikalpastu kEvalE| AtmanRtE svamAtmAnamavalambO na yasya hi||36||

yannAmAkRtibhirgrAhyaM paJcavarNamabAdhitam| vyarthEnApyarthavAdO'yaM dvayaM paNDitamAninAm||37||

yOginO'pakvayOgasya yuJjataH kAya utthitaiH| upasargairvihanyEta tatrAyaM vihitO vidhiH||38||

yOgadhAraNayA kAMzcidAsanairdhAraNAnvitaiH| tapOmantrauSadhaiH kAMzcidupasargAnvinirdahEt||39||

kAMzcinmamAnudhyAnEna nAmasaGkIrtanAdibhiH| yOgEzvarAnuvRttyA vA hanyAdazubhadAnzanaiH||40||

kEciddEhamimaM dhIrAH sukalpaM vayasi sthiram| vidhAya vividhOpAyairatha yuJjanti siddhayE||41||

na hi tatkuzalAdRtyaM tadAyAsO hyapArthakaH| antavattvAccharIrasya phalasyEva vanaspatEH||42||

yOgaM niSEvatO nityaM kAyazcEtkalpatAmiyAt| tacchraddadhyAnna matimAnyOgamutsRjya matparaH||43||

yOgacaryAmimAM yOgI vicaranmadapAzrayaH nAntarAyairvihanyEta niHspRhaH svasukhAnubhUH||44||

||iti zrImadbhAgavatE mahApurANE pAramahaMsyAM saMhitAyAM EkAdazaskandhE aSTAviMzO'dhyAyaH||

See Also

• http://vedabase.net/sb/11/28/en