From StotraSamhita

SaSThO'dhyAyaH

zrIzuka uvAca

tataH prAcEtasO'siknyAmanunItaH svayambhuvA| SaSTiM saJjanayAmAsa duhitRRH pitRvatsalAH||1||

daza dharmAya kAyAdAddviSaTtriNava cEndavE| bhUtAGgiraHkRzAzvEbhyO dvE dvE tArkSyAya cAparAH||2||

nAmadhEyAnyamUSAM tvaM sApatyAnAM ca mE zRNu| yAsAM prasUtiprasavairlOkA ApUritAstrayaH||3||

bhAnurlambA kakudyAmirvizvA sAdhyA marutvatI| vasurmuhUrtA saGkalpA dharmapatnyaH sutAJzRNu||4||

bhAnOstu dEvaRSabha indrasEnastatO nRpa| vidyOta AsIllambAyAstatazca stanayitnavaH||5||

kakudaH saGkaTastasya kIkaTastanayO yataH| bhuvO durgANi yAmEyaH svargO nandistatO'bhavat||6||

vizvEdEvAstu vizvAyA aprajAMstAnpracakSatE| sAdhyOgaNazca sAdhyAyA arthasiddhistu tatsutaH||7||

marutvAMzca jayantazca marutvatyA babhUvatuH| jayantO vAsudEvAMza upEndra iti yaM viduH||8||

mauhUrtikA dEvagaNA muhUrtAyAzca jajJirE| yE vai phalaM prayacchanti bhUtAnAM svasvakAlajam||9||

saGkalpAyAstu saGkalpaH kAmaH saGkalpajaH smRtaH| vasavO'STau vasOH putrAstESAM nAmAni mE zRNu||10||

drONaH prANO dhruvO'rkO'gnirdOSO vAsturvibhAvasuH| drONasyAbhimatEH patnyA harSazOkabhayAdayaH||11||

prANasyOrjasvatI bhAryA saha AyuH purOjavaH| dhruvasya bhAryA dharaNirasUta vividhAH puraH||12||

arkasya vAsanA bhAryA putrAstarSAdayaH smRtAH| agnErbhAryA vasOrdhArA putrA draviNakAdayaH||13||

skandazca kRttikAputrO yE vizAkhAdayastataH| dOSasya zarvarIputraH zizumArO harEH kalA||14||

vAstOrAGgirasIputrO vizvakarmAkRtIpatiH| tatO manuzcAkSuSO'bhUdvizvE sAdhyA manOH sutAH||15||

vibhAvasOrasUtOSA vyuSTaM rOciSamAtapam| paJcayAmO'tha bhUtAni yEna jAgrati karmasu||16||

sarUpAsUta bhUtasya bhAryA rudrAMzca kOTizaH| raivatO'jO bhavO bhImO vAma ugrO vRSAkapiH||17||

ajaikapAdahirbradhnO bahurUpO mahAniti| rudrasya pArSadAzcAnyE ghOrAH prEtavinAyakAH||18||

prajApatEraGgirasaH svadhA patnI pitRRnatha| atharvAGgirasaM vEdaM putratvE cAkarOtsatI||19||

kRzAzvO'rciSi bhAryAyAM dhUmakEtumajIjanat| dhiSaNAyAM vEdazirO dEvalaM vayunaM manum||20||

tArkSyasya vinatA kadrUH pataGgI yAminIti ca| pataGgyasUta patagAnyAminI zalabhAnatha||21||

suparNAsUta garuDaM sAkSAdyajJEzavAhanam| sUryasUtamanUruM ca kadrUrnAgAnanEkazaH||22||

kRttikAdIni nakSatrANIndOH patnyastu bhArata| dakSazApAtsO'napatyastAsu yakSmagrahArditaH||23||

punaH prasAdya taM sOmaH kalA lEbhE kSayE ditAH| zRNu nAmAni lOkAnAM mAtRRNAM zaGkarANi ca||24||

atha kazyapapatnInAM yatprasUtamidaM jagat| aditirditirdanuH kASThA ariSTA surasA ilA||25||

muniH krOdhavazA tAmrA surabhiH saramA timiH| timEryAdOgaNA AsanzvApadAH saramAsutAH||26||

surabhErmahiSA gAvO yE cAnyE dvizaphA nRpa| tAmrAyAH zyEnagRdhrAdyA munErapsarasAM gaNAH||27||

dandazUkAdayaH sarpA rAjankrOdhavazAtmajAH| ilAyA bhUruhAH sarvE yAtudhAnAzca saurasAH||28||

ariSTAyAstu gandharvAH kASThAyA dvizaphEtarAH| sutA danOrEkaSaSTistESAM prAdhAnikAJzRNu||29||

dvimUrdhA zambarO'riSTO hayagrIvO vibhAvasuH| ayOmukhaH zaGkuzirAH svarbhAnuH kapilO'ruNaH||30||

pulOmA vRSaparvA ca EkacakrO'nutApanaH| dhUmrakEzO virUpAkSO vipracittizca durjayaH||31||

svarbhAnOH suprabhAM kanyAmuvAha namuciH kila| vRSaparvaNastu zarmiSThAM yayAtirnAhuSO balI||32||

vaizvAnarasutA yAzca catasrazcArudarzanAH| upadAnavI hayazirA pulOmA kAlakA tathA||33||

upadAnavIM hiraNyAkSaH kraturhayazirAM nRpa| pulOmAM kAlakAM ca dvE vaizvAnarasutE tu kaH||34||

upayEmE'tha bhagavAnkazyapO brahmacOditaH| paulOmAH kAlakEyAzca dAnavA yuddhazAlinaH||35||

tayOH SaSTisahasrANi yajJaghnAMstE pituH pitA| jaghAna svargatO rAjannEka indrapriyaGkaraH||36||

vipracittiH siMhikAyAM zataM caikamajIjanat| rAhujyESThaM kEtuzataM grahatvaM ya upAgatAH||37||

athAtaH zrUyatAM vaMzO yO'ditEranupUrvazaH| yatra nArAyaNO dEvaH svAMzEnAvAtaradvibhuH||38||

vivasvAnaryamA pUSA tvaSTAtha savitA bhagaH| dhAtA vidhAtA varuNO mitraH zatru urukramaH||39||

vivasvataH zrAddhadEvaM saMjJAsUyata vai manum mithunaM ca mahAbhAgA yamaM dEvaM yamIM tathA saiva bhUtvAtha vaDavA nAsatyau suSuvE bhuvi||40||

chAyA zanaizcaraM lEbhE sAvarNiM ca manuM tataH| kanyAM ca tapatIM yA vai vavrE saMvaraNaM patim||41||

aryamNO mAtRkA patnI tayOzcarSaNayaH sutAH| yatra vai mAnuSI jAtirbrahmaNA cOpakalpitA||42||

pUSAnapatyaH piSTAdO bhagnadantO'bhavatpurA| yO'sau dakSAya kupitaM jahAsa vivRtadvijaH||43||

tvaSTurdaityAtmajA bhAryA racanA nAma kanyakA| sannivEzastayOrjajJE vizvarUpazca vIryavAn||44||

taM vavrirE suragaNA svasrIyaM dviSatAmapi vimatEna parityaktA guruNAGgirasEna yat||45||

||iti zrImadbhAgavatE mahApurANE pAramahaMsyAM saMhitAyAM SaSThaskandhE SaSThO'dhyAyaH||

See Also

• http://vedabase.net/sb/6/6/en